Tabàky—Kosmetiko nga Gikan sa Kahoy

◼ Diha sa init nga habagatan-kasadpang bahin sa Madagascar, ang kababayen-an mangitag mga kabhang sa kinhason sa kabaybayonan aron ibaligya ngadto sa mga turista. Ang ilang mga nawong gipahirag puti, lapot nga substansiya nga gitawag ug tabàky. Kining talagsaong lapot nga substansiya nga ipahid diha sa nawong maoy proteksiyon sa panit batok sa init sa adlaw ug nagsilbi usab nga kosmetiko.

Ang tabàky hinimo gikan sa linghod nga panit sa kahoyng masonjoany ug fihamy (gitawag usab ug aviavy). Simple lang ang paagi sa paghimo niini: Ang gamayng linghod nga panit inusnos diha sa bato ug anam-anam kining patuloan ug tubig aron molapot. Dayon kining lapot nga substansiya ihidhid sa nawong ginamit ang gamayng kahoy o plastik nga linginon o talinison ug tumoy.

Ang ubang mga babaye mamutang ug tabàky sa tibuok nilang nawong, gawas sa palibot sa mata. Ang uban mamutang niini diha lang sa agtang, aping, o suwang. Ang tabàky gamiton sa pagtabon sa mga lama-lama sa nawong ug aron dili maglana ang panit, o gamiton ingong kosmetiko. Usahay dugangan kinig ubang mga sambog, busa makahimo kag nagkalainlaing disenyo ug makapatungha kag lainlaing kolor ug grano.

Kinsay makatuo nga ang usa ka kosmetiko makuha gikan sa kahoy? Sa Madagascar, nga layo sa mga sentro sa uso sama sa Paris ug New York, ang tabàky maoy usa ka talagsaon apan praktikal nga kosmetiko.