Ang Teknik sa Paghimog Espresso

Kape ang usa sa labing kinaham nga ilimnon sa kalibotan kay binilyong tasa sa kape ang ginainom tuig-tuig.

ALANG sa mga hingape, ang hustong pagkapreparar nga espresso mao ang “kinalamiang kape,” nag-ingon ang basahong Scientific American, “kay ang linaing proseso sa paghimo niini makapagula sa kinaiyanhong lami sa liso sa kape.” Ang pagpreparar sa espresso nga kape maoy pinaagi sa pagpabuga ug alisngaw o pagpasirit ug init nga tubig diha sa pino nga pagkagaling nga liso sa kape.

“Ang mga tawo lamian gayod sa espresso diha sa mga kapehan ug gusto usab silang mohimo ug ingon niini ka lami nga kape diha sa ilang balay,” matod pa sa usa ka tag-iyag pabrika sa kape ngadto sa Pagmata! Duna nay mapalit nga mga makina karon sa paghimog espresso. Gani, sa ubang nasod nagkadaghan nang tawo ang makainom ug espresso nga gipreparar diha mismo sa ilang balay.

Hingape ka ba? Gusto ka bang mahimong eksperto sa paghimog espresso nga kape? Unsaon man paghimo ug lami kaayong espresso? Kini ang gipangutana sa Pagmata! sa duha ka eksperto nga tigsangag ug kape, si John ug ang iyang amahan nga si Gerardo, nga nagpuyo sa Sydney, Australia.

Pagkuha sa Hustong “Blend”

Diha sa pabrika ni John ug Gerardo, may mga sako sa hilawng liso sa kape nga gikan sa lainlaing bahin sa kalibotan. “Akong isagol-sagol ang hilawng mga liso sa lainlaing klase sa kape alang sa usa ka partikular nga blend sa kape,” miingon si John. “Ang matag klase sa liso sa kape dunay kaugalingong kinaiyahan nga makapatungha ug lainlaing lami. Magsige ka ug eksperimento aron makuha nimo ang partikular nga lami sa kape nga imong gusto. Gani, unom ka bulan akong nag-eksperimento sa pagkuha sa lami sa among himalitang espresso blend.” Busa ginasekreto sa mga tigsangag ug kape ang ilang naimbentong mga blend!

Si Gerardo, nga eksperto sa pagsangag, maoy nagdumala sa pagsangag kay ang lami sa espresso nga kape nagdependeg dako sa paagi sa pagsangag. Samtang ang liso nagkagay sa sulod sa nagtuyok nga dram, kini moinit hangtod nga mopitipiti ug mobukad. Busa mangalimyon ang lana sa kape. Kini nga lana ang makapahumot ug makapalami sa espresso. Aron mahimong eksperto ang usa sa pagsangag, siya kinahanglang mahibalo sa gikinahanglan nga kainiton ug kadugayon sa pagsangag.

Sa nasangag na ang kape, gihuwad ni Gerardo ang init, brawon ug kolor nga mga liso diha sa puthawng basket ug gipahanginan aron dili mapagod. “Ang kape nga usa o duha ka adlaw nang nasangag mosamot ka lami,” miingon si John. Ang lana nga makahatag ug lami magpabilin sa liso ug ang sinangag nga liso sa kape pwede nang himoong espresso.

Ang Proseso sa Paghimog Espresso

“Ang proseso sa paghimog espresso mao ang kinamaayohan apan kinalisdan pod,” miingon si John. Aron makahimog lami kaayong espresso nga kape kinahanglang sundon kining tulo ka importanteng mga proseso: paggaling (1), pagdasok sa mga ginaling diha sa filter basket sa coffee machine (2), pagpatubod sa espresso (3). “Importante ang hustong paggaling sa liso,” miingon si John. “Kon dagko ra ang pagkagaling sa liso, ang espresso nga kape malapsaw. Kon sobra ra ka pino, pait ang kape ug sunog kinig lami. Dagko man o pino nga pagkagaling,  imong mahibaloan kon unsa ka daghan ang lana diha sa kape pinaagi sa krema o bulabula sa ibabaw sa kape.”

Human sa paggaling, migamit si John ug tamper aron madasok ang ginaling diha sa filter basket. Sunod, iyang gitaod ang filter basket ug gipaandar ang coffee machine. Dayon mitubod ang init nga kape. Sa pagkakita pa lang ni John, nahibaloan dayon niya nga dagko ra ang pagkagaling. “Kinahanglang mag-eksperimento ka aron makuha ang hustong timplada,” siya miingon. “Atong testingan usab ang mas pinong ginaling ug idasok kinig maayo aron mas hinay ang pagtubod.”

Giangay pag-usab ni John ang coffee machine ug gipaandar na usab kini. Mitubod ang kape nga sama ka lapot sa mainit-init nga dugos. Mipahiyom si John sa dihang nanuhotsuhot ang kahumot sa kape. “Kinahanglang patyon ang coffee machine kon mag-30 segundos na kay kon mosobra, ang kape mopait ug ang caffeine modaghan,” matod pa niya.

“Sa akong tan-aw nakahimo kita ug lami kaayong espresso nga kape,” miingon si John dihang nakakita sa lapot nga krema. “Kinsay gustong magkape?”

Ang uban gusto ug puro nga kape. Sa ato pa, wala silay idugang sa kape gawas sa gamayng asukar. Apan dugangan sa uban ang ilang kape ug init nga gatas aron mahimong cappuccino, latte, o uban pang klase sa espresso. “Karon kapin sa 90 porsiyento sa tanang espresso nga kape nga ginabaligya sinambogan ug gatas,” nag-ingon ang Fresh Cup Magazine. a

Ang bibo nga panag-estoryahay samtang mag-inom sa imong kinaham nga kape o tsa makahatag ug simpleng kalipay sa kinabuhi. “Kini magpasuod sa mga tawo,” matod pa ni John. “Tingali mao kini ang nakapalipay sa pag-inom ug lamiang kape o tsa!”

[Footnote]

[Kahon/Hulagway sa panid 15]

PAGPALIT UG PAGTIPIG SA KAPE

“Mawad-an ug lami ang sinangag nga liso sa kape paglabayg usa ka semana, ang ginaling nga kape paglabayg usa ka oras, ug ang brewed coffee paglabayg pipila ka minutos,” nag-ingon ang usa ka basahon bahin sa pagpalit ug kape. Busa kon magpalit kag liso sa kape, labing maayong mopalit ug ginagmay lang ug tipigan kini sa bugnawng dapit nga dili mainitan sa adlaw. Apan ayaw kinig ibutang diha sa repridyeretor, kay kini maumog ug mawad-ag lami. Ug inigkahumag galing, i-brew dayon kini.

[Picture Credit Line sa panid 15]

Photo 3: Images courtesy of Sunbeam Corporation, Australia