Ang Hunahuna sa Bibliya

Angay Bang Dunay Panagbahin-bahin Tali sa Klero ug sa mga Membro?

Hataas nga Reverendo, Labawng Reverendo, Padre, Labing Balaang Amahan, Rabbi, Iyang Kamahalan, Iyang Kasantosan, Iyang Pagkabalaan—kini ang pipila sa mga titulo nga nagpalahi sa klero gikan sa mga membro. Kadaghanang relihiyon dunay panagbahin-bahin tali sa klero ug sa mga membro, apan kahikayan ba kini sa Diyos, o tradisyon sa tawo? Labaw sa tanan, giuyonan ba kini sa Diyos?

“DIHA sa Bag-ong Tugon ug sa panahon sa mga apostoles walay gihisgotang panagbahin-bahin tali sa klero ug sa mga membro,” nag-ingon ang propesor sa teolohiya nga si Cletus Wessels. Ang Encyclopedia of Christianity nag-ingon: “Anam-anam nga mitungha ang panagbahin-bahin dihang ang mga klero gitamod nga labaw samtang ang uban maoy mga membro . . . Ang ‘ordinaryo’ nga mga membro sa simbahan giisip nga mga tawong walay alamag bahin sa Diyos ug sa Bibliya.” Misamot pa kini sa ikatulong siglo C.E.—paglabay ug kapin sa duha ka gatos ka tuig gikan kang Jesu-Kristo!

Kon ang panagbahin-bahin tali sa klero ug sa mga membro dili pinasukad sa sulondan nga gipakita sa mga apostoles ni Jesus ug sa ubang unang mga Kristohanon, sayop ba diay kini? Ang Bibliya nag-ingon nga sayop kini. Tagda kon ngano.

“Kamong Tanan Managsoon”

Ang Pulong sa Diyos nag-ingon kanato nga ang tanang Kristohanon mag-alagad ingong mga ministro sa Diyos ug walay usa ang labaw o ubos sa uban. (2 Corinto 3:5, 6) “Klaro kaayo nga walay labaw o walay ubos” taliwala sa unang mga Kristohanon, nag-ingon ang magsusulat bahin sa relihiyon nga si Alexandre Faivre. Kini nahiuyon sa gisulti ni Jesus sa iyang mga sumusunod: “Kamong tanan managsoon.”—Mateo 23:8, Maayong Balita Biblia.

Siyempre ang hamtong sa espirituwal nga mga lalaki mag-alagad ingong mga magtatan-aw, ug sila mga magbalantay ug magtutudlo usab. (Buhat 20:28) Apan kini nga mga lalaki walay suweldo. Kadaghanan kanila maoy ordinaryong mga lalaki nga nanginabuhi—mga bana ug mga amahan. Dugang pa, sila takos sa pag-alagad ingong mga magtatan-aw dili tungod kay nakatungha sila sa mga seminaryo kondili tungod kay sila kugihan sa pagtuon sa Pulong sa Diyos ug ilang ginaugmad ang mga hiyas nga angay nilang ugmaron sumala sa sukdanan sa Diyos. Lakip niining mga hiyasa ang ‘pagkamakasaranganon, maayog panghunahuna, mahusay, maabiabihon, may katakos sa pagpanudlo, . . . makataronganon, dili palaaway, dili mahigugmaon sa salapi, usa ka tawo nga nagdumala sa iyang kaugalingong panimalay sa maayong paagi.’—1 Timoteo 3:1-7.

Kon Nganong Maalamon ang Pagtuman sa Gipamulong sa Bibliya

“Ayaw pagsaylo sa mga butang nga nahisulat,” nag-ingon ang Bibliya. (1 Corinto 4:6) Ikasubo nga dihang ang mga tawo dili motuman sa sugo sa Diyos, kasagaran madaot ang ilang relasyon kaniya, ug tinuod kana sa kahikayan sa panagbahin-bahin tali sa klero ug sa mga membro. Sa unsang paagi? Palihog tagda kining unom ka punto.

1. Ang pagkalabaw sa klero nga matang nagpakita nga ang usa kinahanglan nga “tinawag” aron mahimong ministro sa Diyos. Apan ang Bibliya nag-ingon nga ang tanang matuod nga mga Kristohanon kinahanglang mag-alagad sa Diyos ug magdayeg sa iyang ngalan. (Roma 10:9, 10) Kon bahin sa pag-alagad sulod sa kongregasyon, ang tanang Kristohanong mga lalaki gidasig sa pagkab-ot niini nga pribilehiyo, nga maoy naandan sa mga Saksi ni Jehova.—1 Timoteo 3:1.

2. Ang panagbahin-bahin tali sa klero ug sa mga membro nagtuboy sa klero nga matang, ug dayag kini sa paggamit ug relihiyosong mga titulo sa pagpasidungog kanila. Apan si Jesus miingon: “Siya  nga nagagawi sa iyang kaugalingon ingon nga mas ubos taliwala kaninyong tanan mao ang usa nga dako.” (Lucas 9:48) Bahin niining hiyas sa pagkamapaubsanon, iyang gisultihan ang iyang mga sumusunod sa dili paggamit ug relihiyosong mga titulo.—Mateo 23:8-12.

3. Ang suweldadong klero nga matang makapabug-at sa mga membro, ilabina kon ang klero maluho ug estilo sa kinabuhi. Sa laing bahin, ang Kristohanong mga magtatan-aw dunay mga trabaho aron matagan-an ang ilang pinansiyal nga mga panginahanglan. Busa sila nagpakitag maayong panig-ingnan sa uban. a—Buhat 18:1-3; 20:33, 34; 2 Tesalonica 3:7-10.

4. Sanglit ang klerigo nagsalig man sa uban nga maoy motagana sa iyang pinansiyal nga mga panginahanglan, mahimong matental siya sa pagtuis sa mensahe sa Bibliya aron pahimut-an ang iyang mga sakop. Sa pagkatinuod, ang Kasulatan nagtagna nga mahitabo kini. “Aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan.”—2 Timoteo 4:3.

5. Tungod niini nga panagbahin-bahin, gisalig sa mga membro ngadto sa klero ang mga butang may kalabotan sa pagsimba, samtang sila manimba na lang kada semana. Apan ang tanang Kristohanon kinahanglang magmahunahunaon sa ilang espirituwal nga mga panginahanglan ug magmakugihon sa pagtuon sa Bibliya.—Mateo 4:4; 5:3.

6. Kon ang mga membro walay alamag sa Bibliya, malimbongan dayon sila sa mga klero o pahimuslan pa. Sa pagkatinuod, daghang pagpangabuso ang nahitabo kaniadto pa. b—Buhat 20:29, 30.

Aron masunod ang sumbanan nga gihatag sa Bibliya, ang mga Saksi ni Jehova walay klero nga matang, kondili sila dunay walay suweldong espirituwal nga mga magbalantay ug mga magtutudlo nga kinabubut-ong nag-atiman sa katawhan sa Diyos. Susiha kini mismo pinaagi sa pagtambong sa tigom sa Kingdom Hall diha sa inyong lugar.

[Mga footnote]

NAKAPAMALANDONG KA BA?

◼ Unsay angayng panglantaw sa tanang katawhan sa Diyos sa usag usa?—Mateo 23:8.

◼ Sa unsang paagi ang Kristohanong mga lalaki mahimong kuwalipikado sa pag-alagad ingong mga magtatan-aw sa kongregasyon?—1 Timoteo 3:1-7.

◼ Nganong ang panagbahin-bahin tali sa klero ug sa mga membro walay panalangin sa Diyos?—1 Corinto 4:6.

[Blurb sa panid 23]

Dili sama sa mga klerigo, si Jesus wala mag-isip sa iyang kaugalingon nga labaw