Gikan sa Among mga Magbabasa

Mga Batan-on Nangutana . . . Unsa man Gayoy Daotan sa Pagpamalikas? (Marso 2008) Ako gipadako ingong Kristohanon, apan nakakat-on ako sa pagpamalikas. Naningkamot ako sa paghunong sa pagpamalikas apan wala ako molampos. Apan kini nga artikulo nakatabang kanako sa pagkontrolar sa akong kaugalingon. Sama sa gihisgotan sa artikulo, dili ko gustong abusohan ang gasa sa pagsulti. Busa karon mamalandong una kog maayo sa dili pa mosulti. Daghan kaayong salamat.

C. P., Brazil

Ako 12 anyos. Daghan kaayong mamalikas sa among eskuylahan, ug nabalaka kong malibkas ang akong dila. Mosulat na unta ko sa paghangyo sa paghimog artikulo bahin niini diha sa “Mga Batan-on Nangutana” dihang miabot kini nga artikulo diha sa Pagmata! Napahinumdoman ako sa artikulo kon nganong daotan ang pagpamalikas, ug nadasig gayod ako. Padayon sa pagsulat ug mga artikulo nga susama niini!

A. P., Amerika

Pagpanglimpiyo ug mga balay ang among panginabuhi sa akong bana, ug giingnan kami sa usa sa among mga suki bahin sa iyang “panaad sa bag-ong tuig” nga dili na siya mamalikas. Siya miingon nga kada adlaw siya nga nag-ampo sa Diyos sa pagtabang kaniya sa paghunong sa iyang daotang batasan. Gihangyo usab ko niya sa pagdalag bisan unsang basahon bahin sa maong ulohan. Nag-ampo ako bahin niini, ug dayon sama sa akong naandan, akong gi-download ang kinaulahiang mga magasin gikan sa Web site nga www.pr418.com ug gikopya kini ngadto sa akong MP3 player. Hunahunaa lang ang akong kalipay pagkasunod adlaw dihang nadunggan nako ang mga ulohan nga hisgotan niini. Bisan tuod gisulat kining artikuloha para sa mga batan-on, nahibalo ko nga duna gayod siyay mapupo nga praktikal nga tambag gikan niini. Naghinamhinam kaayo ko sa pagpaambit niini kaniya.

S. C., Amerika

Kontrol sa Trapiko sa Kahanginan—Sa Unsang Paagi Gihimo Niining Luwas ang Imong Pagbiyahe? (Abril 2008) Human nako mabasa kini nga artikulo, ako nakaingon, “Andam na kong mosakayg ayroplano.” Ako nadasig ug mibating mas luwas tungod sa pagpatin-aw sa Pagmata! nga ang mga tigkontrol sa trapiko sa kahanginan interesado gayod sa atong kaluwasan. Salamat.

T. S., Brazil

Unsay Imong Tubag? Ako 12 anyos ug nagpuyo sa habagatang bahin sa Ireland. Gusto ko kamong pasalamatan sa mga pangutana nga gidisenyo para sa mga bata diha sa pangataposang mga panid sa Pagmata! Ganahan kaayo ko niini kay makapalihok kini sa utok sa mga bata. Palihog padayon sa pagpatik niini. Salamat pag-usab.

A. C., Ireland