Mabuntog sa Gugma ang Pagpihig

“Usa ka bag-ong matang sa relihiyosong komunidad mitungha sa unang higayon sa kasaysayan: dili usa ka grupo sa katawhan nga nagsimba sa ilang nasod, kondili usa ka grupo sa mga boluntaryo, nga wala maghatag ug importansiya sa ilang pagkabutang, rasa ug nasod: mga lalaki ug babaye nanagtigom sa pagsimba sa ilang diyos.” —A History of Christianity, sinulat ni Paul Johnson.

SAMTANG mikaylap ang tinuod nga Kristiyanidad sa tibuok Imperyo sa Roma, ang mga tawo nakakitag usa ka butang nga makapahingangha—usa ka grupo sa mga tawo nga lainlaig nasyonalidad nga nagsimba sa Diyos ug nagkinabuhi nga malinawon ug nagkahiusa. Ang sekreto sa ilang pagkamalinawon mao ang tinuod nga gugma nga gipasukad, dili sa emosyon, kondili sa mga prinsipyo nga gitudlo sa Diyos.

Ang maong mga prinsipyo gitudlo ug gibuhat mismo ni Jesu-Kristo, kinsa nahimong biktima sa pagdumot ug grabeng pagpihig. (1 Pedro 2:21-23) Una sa tanan, siya taga-Galilea, diin kasagaran sa mga molupyo niining dapita mga mag-uuma ug mga mangingisda nga gitamay sa Hudiyohanong mga lider sa relihiyon sa Jerusalem. (Juan 7:45-52) Gawas pa, si Jesus maoy talagsaong magtutudlo kinsa gihigugma ug gitahod sa ordinaryong mga tawo. Tungod niini, ang mga lider sa relihiyon nasina pag-ayo mao nga sila nagpakaylap ug bakak nga mga impormasyon bahin kaniya ug nagplano pa gani sa pagpatay kaniya!—Marcos 15:9, 10; Juan 9:16, 22; 11:45-53.

Apan si Jesus wala ‘mobalos ug daotan sa daotan.’ (Roma 12:17) Pananglitan, sa dihang usa ka Pariseo—membro sa Hudiyohanong sekta nga supak kang Jesus—miduol kaniya ug sinserong nangutana, maluloton siyang gitubag ni Jesus. (Juan 3:1-21) Nakigpangaon pa gani si Jesus uban sa mga Pariseo, lakip sa usa nga may pagpihig kaniya. Batasan kaniadto ang paghugas ug tiil sa bisita; apan wala kana himoa sa Pariseo ngadto kang Jesus. Nahiubos ba si Jesus? Wala. Gani, gipahimuslan ni Jesus kining higayona sa pagtudlo ug maayo kaayong leksiyon bahin sa kaluoy ug pagpasaylo.—Lucas 7:36-50; 11:37.

Gihigugma ni Jesus ang mga Tinamay

Usa sa iladong mga sambingay ni Jesus mao ang bahin sa buotang Samarianhon, nga sa kaugalingon niyang gasto, iyang gitabangan ang usa ka Hudiyo nga gikulata ug gitulis. (Lucas 10:30-37) Nganong talagsaon man kaayo ang gihimo sa maong Samarianhon? Sa tinuod nga kahimtang, ang mga Hudiyo ug mga Samarianhon nagtamayay sa usag usa. Gani, ang “Samarianhon” kasagarang gamiton sa mga Hudiyo ingong pulong sa pagtamay, nga mao usay ilang gitawag kang Jesus. (Juan 8:48) Tungod niana, si Jesus naggamit ug puwersado kaayong ilustrasyon bahin sa gugma nga way pagpihig alang sa isigkatawo.

 Gipaluyohan ni Jesus ang iyang gipamulong pinaagig mga buhat, nga nag-ayo sa usa ka sanlahon nga Samarianhon. (Lucas 17:11-19) Dugang pa, iyang gitudloan ang ubang madinawatong mga Samarianhon, ug nakig-estorya pa ganig dugay sa usa ka babayeng Samarianhon—nga usa ka talagsaong hitabo. (Juan 4:7-30, 39-42) Nganong talagsaon man kini? Ang estriktong mga rabbi nga Hudiyo dili gayod makig-estorya ug babaye diha sa publiko—bisag suod pa nga paryente—labi na gyod kon Samarianhon!

Apan unsay panglantaw sa Diyos sa usa ka tawo nga may pagpihig sa uban apan naningkamot sa paglangkat niana gikan sa iyang kasingkasing? Ang Bibliya naghatag ug makapahupayng impormasyon.

Ang Diyos Mapailobon Kanato

Sa unang siglo, daghang Kristohanon nga mga Hudiyo naimpluwensiyahan sa primero sa dugay nang pagpihig batok sa mga dili-Hudiyo, diin daghan kanila nahimong mga magtutuo. Giunsa pagsulbad ni Jehova nga Diyos kining makapabahin-bahin nga problema? Mapailobon niyang gitudloan ang Kristohanong kongregasyon. (Buhat 15:1-5) Maayo kaayog resulta ang maong pailob, kay sama sa gihisgotan sa sinugdanan niini nga artikulo, sila “wala maghatag ug importansiya sa ilang pagkabutang, rasa ug nasod.” Busa “ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.”—Buhat 16:5.

Unsay leksiyon niini? Ayawg surender, kondili padayon sa pagdangop sa Diyos, kinsa madagayaong naghatag ug kaalam ug moral nga kalig-on niadtong magpadayon sa pagpangayo nga matinuohon. (Santiago 1:5, 6) Nakahinumdom ka ba kang Jennifer, Timothy, John, ug Olga nga gihisgotan sa unang artikulo niini nga seryal? Sa naghayskul na si Jennifer, siya mihamtong na sa espirituwal ug nakakat-on sa dili pagtagad sa mga pagpanginsulto bahin sa iyang rasa ug gidak-on. Unya sa dihang laing babaye na usab ang giinsulto sa iyang mga klasmet, gilabanan ug gihupay siya ni Jennifer.

Unsay nakatabang kang Timothy sa pagpabiling kalmado dihang giinsulto siya sa iyang mga eskolmet? Siya miingon: “Nabalaka ako nga mapasipalahan ang ngalan ni Jehova nga Diyos. Gawas pa, gihinumdoman ko kanunay nga kinahanglang padayon natong ‘daogon ang daotan pinaagi sa maayo’ ug dili ‘magpadaog sa daotan.’—Roma 12:21.

Nabuntog ni John ang iyang pagpihig sa iyang klasmet nga membro sa tribong Hausa. “Sa tin-edyer pa,” matod niya, “may nailhan akong mga estudyanteng Hausa nga akong naamigo. Akong nakauban ang usa kanila sa usa ka asaynment sa eskuylahan, ug nagkasinabot kaayo mi. Karon naningkamot ko sa paglantaw sa mga tawo ingong mga indibiduwal, dili ingong bahin sa usa ka rasa o tribo.”

 Si Olga ug ang iyang kauban nga misyonarya wala mahadlok dihang gilutos sa madumtanong mga magsusupak, apan sila nagpabiling lig-on ug masaligon nga duna ray modawat sa mensahe sa Bibliya. Daghan tuod ang midawat. “Paglabay ug mga 50 ka tuig,” matod ni Olga, “giduol ko sa usa ka lalaki ug gitunolan akog nindot nga bag. Kini dunay sulod nga gagmayng mga bato nga gikulitan ug Kristohanong mga hiyas sama sa pagkamaayo, kalulot, gugma, ug pakigdait. Dayon iya akong giingnan nga usa siya sa mga batang lalaki nga mibato nako kaniadto ug karon ako na siyang igsoon sa pagtuo. Unya gihatagan ko niya ug sa iyang asawa ug duha ka dosenang puting rosas gawas pa sa bag nga may gagmayng mga bato.”

Dihang Mawala na ang Pagpihig ug Diskriminasyon!

Sa dili madugay, ang pagpihig ug diskriminasyon mawala na. Sa unsang paagi? Una sa tanan, ang bugtong Magmamando sa yuta, si Jesu-Kristo, “dili mohukom sumala sa makita lamang sa iyang mga mata.” (Isaias 11:1-5) Dugang pa, ang mga ginsakpan ni Jesus sa yuta nianang panahona hingpit na unyang magpasundayag sa iyang tinamdan, kay ang tanan natudloan na niya ug sa iyang Amahan, si Jehova nga Diyos.—Isaias 11:9.

Ang maong pagpanudlo sa Diyos ug ni Jesu-Kristo ginahimo na karon, nga nag-andam sa katawhan sa Diyos alang sa kinabuhi diha sa usa ka bag-ong sistema sa mga butang. Busa pahimusli kining libreng edukasyonal nga programa pinaagi sa pagtuon sa Bibliya. a Ang Diyos dili mapihigon; iyang kabubut-on nga ang tanang matang sa mga tawo “mangaluwas unta ug makadangat sa tukmang kahibalo sa kamatuoran.”—1 Timoteo 2:3, 4.

[Footnote]

[Blurb sa panid 8]

Sa dili madugay, ang pagpihig ug diskriminasyon mawala na

[Kahon/Hulagway sa panid 8, 9]

MGA PRINSIPYO SA BIBLIYA NGA ANGAYNG IPADAPAT

◼ “Ayaw balosi si bisan kinsa ug daotan. . . . Padayong daoga ang daotan pinaagi sa maayo.” (Roma 12:17-21) Ang punto? Kon buhatan kag daotan sa uban, pagtuon kon unsay angay nga isanong ngadto kanila. “Sila nagdumot kanako nga walay pasikaranan,” miingon si Jesu-Kristo. Apan siya wala magdumot kanila.—Juan 15:25.

◼ “Dili kita magpaimportante sa kaugalingon, . . . nga magsinahay sa usag usa.” (Galacia 5:26) Ang kasina ug garbo makadaot sa atong relasyon sa Diyos, nga sagad moresultag pagdumot ug pagpihig.—Marcos 7:20-23.

◼ “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Pangutan-a ang imong kaugalingon, ‘Unsay akong gusto nga itagad sa uban kanako?’ Tagda ang uban nga walay pinalabi, bisag unsa pay ilang edad, kolor sa panit, pinulongan, o kultura.

◼ “Buksi ang inyong kasingkasing ngadto sa usag usa maingon nga gibuksan ni Kristo ang iyang kasingkasing nganha kaninyo.” (Roma 15:7, Phillips) Naningkamot ka ba sa pagpakigsuod sa mga tawo nga lahi ug kagikan o kultura, ilabina kon sila imong mga isigkaalagad sa Diyos?—2 Corinto 6:11.

◼ “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Bisag unsaon ka pa pagtratar sa uban, ang Diyos dili gayod mobiya kanimo kon magmaunongon ka kaniya.

[Hulagway sa panid 7]

Gitabangan sa usa ka buotang Samarianhon ang usa ka Hudiyo nga gitulis