Pagpaniid sa Kalibotan

◼ “Sa pagkakaron, ang Rusya dunay mga dos bilyones toneladas nga makahilong mga biya sa teritoryo niini, ug walay maayong paagi sa pagdispatsar niini.”—RIA NOVOSTI, RUSYA.

◼ Ang mga pirata sa kadagatan midaghan na karon. Pananglitan sa 2007, “263 ka pag-atake sa mga pirata ang nahitabo.”—THE WALL STREET JOURNAL, U.S.A.

Alkoholikong Ilimnon ug Pagmabdos

Matag tuig sa Germany mga 10,000 ka bata nangatawo nga may mga depekto tungod sa alkoholikong ilimnon, nag-ingon ang Süddeutsche Zeitung. Mga 4,000 niining mga bataa grabeg depekto nga wala nay kaayohan. “Walay makatino kon unsa ka daghan ang puwedeng imnon samtang nagsabak,” nag-ingon ang Drug Commissioner nga si Sabine Bätzing. “Kinahanglan ipaamgo nato sa mga doktor, mananabang, ug mga mabdos nga bisan ang panalagsang pag-inom [sa mabdos] mahimong makadaot sa utok ug lawas sa bata o moresultag mga problema sa kinaiya.”

Pag-atiman ug Garden—Maayo sa Imong Panglawas

“Nadiskobrehan sa mga tigdukiduki nga ang pagpananom—dako man o gamay ang imong mahimo—maayo sa imong panglawas,” nag-ingon ang Psychology Today. Gipakita sa panukiduki nga kon “ang pipila ka matang sa gigming nga mga bakterya diha sa yuta” mahanggap o matulon, kini “makapalig-on gayod sa sistema sa imyunidad sa tawo.” Busa ang magasin nag-ingon nga “maayo sa panglawas ang mga elemento sa yuta nga masulod sa ginhawaan sa tawo maingon nga makapatambok kini sa mga tanom nga nanubo niini.”

Kinadugayang Way-Hunong nga Paglupad

Ang mga siyentipiko sa U.S. Geological Survey (USGS) nagtaho sa “kinadugayang way-hunong nga paglupad sa usa ka langgam.” Ang usa grupo sa mga godwit gisundan pinaagig satelayt samtang naghimo sa ilang tinuig nga paglalin latas sa Pacific Ocean. Usa ka bayeng godwit nakahimog walo ka adlaw, 11,650 kilometros nga way-hunong nga paglupad gikan sa Alaska ngadto sa New Zealand. Pag-abot niya sa New Zealand, “nakuhaan ug katunga ang iyang timbang nga 700 gramos,” nag-ingon ang magasing The Week. Sa ilang pagbalik, ang mga godwit milupad gikan sa New Zealand paingon sa China ug dayon balik sa Alaska—idabuwelta nga biyahe nga moabot ug 29,000 kilometros. “Kon ang 29,000 kilometros mao ang aberids nga gilay-on sa ilang tinuig nga paglupad,” nag-ingon ang USGS, “nan ang usa ka hingkod nga godwit makalupad ug mga 463,000 kilometros sa iyang tibuok kinabuhi.”

Pagdakop sa mga Kawatag Kaktus

Gipangawat ang dagko kaayong mga kaktus sa Saguaro National Park, Arizona, sa Amerika. “Tanan gustog saguaro nga kaktus sa ilang nataran,” nag-ingon si Jim McGinnis, kawani sa espesyal nga mga imbestigasyon sa Departamento sa Agrikultura sa Arizona. Busa makakita ka gayod ug mga sakyanan diha sa desyerto nga nagkargag kaktus. Ang mga kawatan kasagarang manguhag usa ngadto sa duha ka metros ka taas nga mga kaktus, nga mahalin ug usa ka libo ka dolyar o kapin pa. Aron masanta ang pagpangawat, ang mga opisyales nagplano sa pagsuksok ug mga microchip sa punoan sa mga kaktus. Masakpan sa mga scanner kon kinawat ba ang gipamaligyang mga kaktus diha sa mga baligyaanag tanom o sa mga dunay negosyong landscaping.