‘Usa ka Hunos nga si Jehova Lang ang Makabukas’

◼ Niadtong 2007, ang sayis anyos nga si Erika ug ang kuwatro anyos nga si Mattia namatyan ug amahan. Apan ang kaguol sa mga bata nahupayan tungod sa paglaom sa pagkabanhaw.—Buhat 24:15.

Gustong ipaambit ni Erika ang iyang pinasukad sa Bibliya nga paglaom ngadto sa uban, ilabina diha sa iyang eskuylahan sa Sicily. Pananglitan, sa dihang ang iyang higalang si Beatrice miingon nga ang amahan ni Erika tua na sa langit, si Erika matinahorong mitubag nga ang Bibliya nag-ingon nga ang iyang amahan wala moadto sa langit. “Aw hain man diay siya?” si Beatrice nangutana.

“Sa lubnganan,” mitubag si Erika. Sa pagkadungog niana, si Beatrice gustong mahibalo kon unsa ang lubnganan.

“Kini samag hunos nga mobukas ug mosira,” miingon si Erika. “Apan dihang masirado na kining hunosa, dili ka makabukas niana. Si Jehova lamang ang makabukas niana inig-abot sa bag-ong kalibotan.”

Dayon gisaysay ni Erika sa iyang higala nga Jehova ang ngalan sa Diyos, ug ang yuta Iyang himoon nga usa ka paraiso, diin didto walay nay sakit, ug nga ang mga patay mabuhi pag-usab. Dayon giingnan ni Erika si Beatrice sa pagpananghid sa iyang Mama kon mosugot ba ang iyang Mama nga modawat siyag libro ingong gasa nga naghisgot bahin niining mga butanga.

Dihang giingnan ni Beatrice si Erika nga misugot ang iyang Mama, gihatagan ni Erika ang iyang higala ug librong Pagkakat-on Gikan sa Dakong Magtutudlo. Si Erika nagpadayon sa pagpakig-estorya ngadto sa uban bahin sa iyang nakat-onan sa Bibliya ug nakahatag pa siya niining libroha ngadto sa iyang maestra.

Siyempre, si Erika ug ang iyang manghod nga lalaki maguol gihapon sa kamatayon sa ilang amahan. Apan ang paglaom sa pagkabanhaw nakahupay kanila. Kining mga bataa, sama sa daghan pang uban sa tibuok kalibotan, nagpasalamat kang Jehova, ang Diyos nga makahatag gayod ug kahupayan.—Mateo 21:16; 2 Corinto 1:3, 4.

Makahangyo kag kopya niining nindot ug mga hulagway nga libro nga may 256 ka panid nga samag gidak-on niining magasina. Pil-api lang ang kupon ug ipadala kini ngadto sa adres nga makita diha sa kupon o sa nahiangayng adres nga nalista sa panid 5 niining magasina.

□ Interesado akong makadawat ug kopya sa libro nga gipakita dinhi.

□ Palihog kontaka ako bahin sa usa ka libreng pagtuon sa Bibliya sa balay.