Nanghawid Pag-ayo sa Tuong Kamot sa Diyos

◼ Si Jezreel natawo nga may talagsaong sakit sa panit nga gitawag ug congenital lamellar ichthyoses. Tungod niining sakita mamakpak ug mangubal ang iyang panit. “Ang akong dagway makaluod,” matod ni Jezreel, “apan dili kini mananakod.”

Napatambalan na si Jezreel diha sa nagkalainlaing mga ospital sukad sa masuso pa. Pag-edad niyag dos anyos, siya gilain diha sa ospital aron dili siya maimpeksiyon. Apan wala gihapon maayo ang iyang sakit. Siya gipatan-aw ug sikyatrista sa pagtabang kaniya sa pagsagubang sa iyang kaguol.

Gilikayan si Jezreel sa mga tawong nagtuo nga basig mananakod ang iyang sakit. Naglisod siya sa bata pa siya kay gusto siyang makigdula-dula sa ubang kabataan. Siya miingon, “Ila akong giyagayagaan ug gitawag nga Minatay ug Taga-laing Planeta.”

Sa laing bahin, tungod sa iyang sakit nakapaambit si Jezreel sa iyang binase sa Bibliya nga paglaom ngadto sa uban. Kasagaran duolon siya sa mga tawo ug mangutana kon nasunog ba siya. Dihang motubag siya nga wala, sila mangutana kon nganong ingon niana ang iyang dagway. Iyang sultihan sila sa iyang sakit sa panit ug nga wala pay tambal niini sa pagkakaron.

Dayon siya moingon, “Aduna akoy kinamaayohang paglaom kay si Jehova nga Diyos nagsaad nga kadtong magmasinugtanon sa iyang mga balaod mopuyo sa usa ka bag-ong kalibotan nga wala nay sakit ug pag-antos.” (Pinadayag 21:3, 4) Pinaagi niini, si Jezreel nakasugod ug mga panagtuon sa Bibliya sa mga tawo, ug nalipay siya sa pagkakita sa pipila kanila nga nangahimong iyang mga isigkamagsisimba kang Jehova.

“Nagpasalamat ako nga natawo ingong Kristohanon,” matod ni Jezreel, “ug kay Saksi ni Jehova, duna akoy suod nga mga higala. Wala ako nila ayri tungod sa akong panagway. Nabawtismohan ako sa edad nga 17, ug sulod sa 14 ka tuig nakaalagad ako sa atong Maglalalang sa daghang paagi.”

Kanunayng hinumdoman ni Jezreel ang makapadasig nga mga pulong ni Jehova diha sa Isaias 41:10, 13, nga nag-ingon: “Ayaw kahadlok, kay ako uban kanimo. . . . Ako sa pagkatinuod magahawid kanimo sa akong tuong kamot sa pagkamatarong. Kay ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”

Ang paghawid pag-ayo sa tuong kamot ni Jehova nakatabang kang Jezreel sa dili pagkabalaka pag-ayo kon unsay hunahunaon sa mga tawo bahin sa iyang panagway ug sa pagsagubang sa bisan unsang mga problema nga nalangkit niining sakita. Duyog sa minilyong uban pa, siya nagpaabot sa katumanan sa daghang saad sa Diyos.