Sunogon ba ang Daotang mga Tawo Didto sa Impiyerno?
Ang Hunahuna sa Bibliya
Sunogon ba ang Daotang mga Tawo Didto sa Impiyerno?
SI Gertrude, usa ka Pentekostal nga magwawali, nagtuo gayod ug impiyerno. Para niya kon walay impiyerno, walay tinuod nga hustisya. Siya miingon nga kon ang mga daotan dili sunogon didto sa impiyerno, dili gayod masilotan ang grabeng krimen nga nahimo. Nagtuo gayod si Gertrude niini. Siya miingon, “Morag dili ako makasimba sa Diyos kon ang mga daotan dili sunogon didto sa impiyerno.”
Ang daotan ba sunogon didto sa impiyerno, ingon sa gitudlo sa kadaghanang relihiyon? Kon dili, unsay ilang silot?
Ang Unang Pagpahamtang sa Diyos ug Silot
Sumala sa Bibliya, gilalang sa Diyos ang unang tawhanong paris nga hingpit. (Genesis 1:27; Deuteronomio 32:4) Iyang gibutang sila sa usa ka paraiso nga tanaman ug gihatagag higayon nga mabuhi sa walay kataposan. Apan dunay usa ka butang nga gidili kang Adan ug Eva. Sila gipasidan-an sa Diyos: “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.”—Genesis 2:16, 17.
Ikasubo nga ang atong unang mga ginikanan wala magmatinumanon ug wala magmasinugtanon sa Diyos. Busa gisilotan sila sa Maglalalang ug kamatayon. “Sa singot sa imong nawong ikaw magakaon sa tinapay hangtod nga ikaw mobalik sa yuta, kay gikan niini ikaw gikuha. Kay abog ikaw ug sa abog ikaw mopauli.”—Genesis 3:19.
Kon nameligro pang sunogon si Adan ug Eva didto sa impiyerno, dili ba pasidan-an unta sila sa Diyos bahin niini nga silot? Sa pagkatinuod ang Diyos wala gayod maghisgot bahin sa maong pag-antos human mamatay. Ngano god intawon nga mag-antos sila? Sila walay imortal nga kalag nga magpabiling buhi human mamatay. Ang Bibliya tin-awng nag-ingon: “Ang kalag nga makasala—kini mismo mamatay.”—Ezequiel 18:4. a
Ingong Maghahatag ug kinabuhi, ang atong Maglalalang nahibalo sa tanan bahin sa kinabuhi ug kamatayon. Siya nag-ingon diha sa iyang Pulong nga ‘ang mga patay . . . walay nahibaloan nga bisan unsa.’ (Ecclesiastes 9:5) Busa si Adan ug Eva wala gayod mag-antos sa impiyerno dihang sila namatay. Sila mibalik ngadto sa abog ug wala na maglungtad. Sila “walay nahibaloan nga bisan unsa.”
Mag-antos ba Kita Human Mamatay?
Ang Bibliya nag-ingon diha sa Roma 5:12: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo.” Nan, makataronganon ba ang pagtuo nga ang mga tawo mag-antos didto sa impiyerno tungod sa ilang mga sala, samtang si Adan, ang mismong nakaingon sa kamatayon sa tanang tawo, mibalik lang sa abog human mamatay?—1 Corinto 15:22.
Kita nailalom sa samang balaod nga gihatag ngadto kang Adan. “Ang suhol nga ginabayad sa sala mao ang kamatayon.” Dugang pa, inigkamatay sa tawo, siya “nahigawas na gikan sa iyang sala.” (Roma 6:7, 23) Kon ang maayo ug daotang mga tawo mamatay ug walay mag-antos human mamatay, hain na ang hustisya sa Diyos?
Ang Hustisya sa Diyos
Wala mausab ang katuyoan sa Diyos alang sa masinugtanong katawhan sukad nga iyang gilalang ang unang magtiayon ug gisugo sa pagbaton ug mga anak ug sa pag-atiman sa yuta. (Genesis 1:28) Dayag nga kini gihapon ang iyang katuyoan dihang siya miingon sa ulahi: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29.
Matikdi nga ang mga matarong magapuyo dinhi sa yuta. Sila makatagamtam ug hingpit, himsog, ug malipayon nga kinabuhi. Ang orihinal nga katuyoan sa Diyos nga mao ang pagpuno sa yuta ug matarong nga mga tawo ‘molampos gayod.’ Kini mahitabo dihang iyang pulihan kining daotang sistema sa mga butang ug usa ka bag-ong kalibotan.—Isaias 55:11; Daniel 2:44; Pinadayag 21:4.
Ang bilyon-bilyong tawo nga nangamatay kinsa walay alamag sa mga kinahanglanon sa Diyos pagabanhawon ug makadawat ug instruksiyon alang sa kinabuhi diha sa bag-ong kalibotan sa Diyos. (Isaias 11:9; Juan 5:28, 29) Sa laing bahin, ang tanang dili masinugtanon sa mga balaod sa Diyos pagasilotan ug “ikaduhang kamatayon.” Kini maoy kamatayon nga wala nay paglaom sa pagkabanhaw.—Jeremias 51:57.
Kay mahigugmaon man siya nga Diyos, si Jehova dili gayod mosakit ug mga tawo didto sa impiyerno. (1 Juan 4:8) Dili usab siya motugot nga magpadayon ang pagkadaotan hangtod sa hangtod. Busa, ang Salmo 145:20 nagpasalig kanato nga “si Jehova nagabantay sa tanang nahigugma kaniya, apan iyang pagalaglagon ang tanang daotan.” Dili ba mahigugmaon ug makataronganon man kana?
[Footnote]
a Sa Bibliya, ang “kalag” nagpasabot sa tawo mismo—dili usa ka butang nga bulag sa lawas. Ang Genesis 2:7 nag-ingon: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.” Si Adan wala hatagig kalag nga bulag sa iyang lawas. Hinunoa, si Adan mismo maoy buhing kalag.
NAKAPAMALANDONG KA BA?
◼ Kita ba dunay kalag nga dili mamatay?—Ezequiel 18:4.
◼ Unsay kahimtang sa mga patay?—Ecclesiastes 9:5.
◼ Sa unsang paagi silotan sa Diyos ang mga daotan?—Salmo 145:20.
[Blurb sa panid 10]
‘Ang mga patay . . . walay nahibaloan nga bisan unsa.’—Ecclesiastes 9:5
[Picture Credit Line sa panid 11]
Photo: www.comstock.com