Usa ka Haligi Diha sa Dagat

◼ Nakakita ka na bag buhawi? Niadtong Disyembre 25, 2005 duol sa baybayon sa Tahiti, naporma ang usa ka buhawi. Kini samag taas nga embudo sa nag-alimpulos nga hangin ug tubig tali sa dagat ug kalangitan nga miabot ug mga 30 minutos. Dayon kini inanayng nabungkag ug nahanaw.

Ang buhawi usahay gitawag nga alimpulos sa dagat, apan kasagaran kini dili sama ka kusog sa alimpulos. Kini sagad moabot lag mga diyes minutos, apan ang ubang buhawi moabot ug usa ka oras. Kay sa dagat man kini maporma, diyutay ra ang makakita niini. Busa naglisod ang mga eksperto sa pagsabot niini. Sumala sa mga taho, ang buhawi modahunog nga morag tren.

Sa naghubit sa iyang hilabihang kaguol, usa ka salmista sa Bibliya sa karaang panahon misulat: “Ang halawom nga katubigan nagatawag sa halawom nga katubigan sa dinaguok sa imong mga busay.” (Salmo 42:7) Ang ubang mga diksiyonaryo nag-ingon nga ang Hebreohanong pulong nga gihubad ug “busay” mahimong nagtumong sa usa ka buhawi. Busa ang gibati sa salmista mahimong ikatandi sa usa ka buhawi. Siya miingon nga ang iyang kalag ‘nawad-ag paglaom’ ug nahimong “gubot” sa sulod niya. Bisan pa niana, siya nakabatog kahupayan gikan sa iyang Diyos. “Paghulat sa Diyos,” siya miingon, “kay pagadayegon ko pa siya ingon nga akong dakong kaluwasan ug ingon nga akong Diyos.”—Salmo 42:11.

Sama sa salmista, kita mahimong makaagom ug mga problema nga sama ug buhawi. Apan kon maghulat kita sa Diyos, kita iyang luwason.