Ang Hunahuna sa Bibliya

Daotan Bang Mag-ipon sa Dili pa Makasal?

MOPALIT ka bag sinina nga dili usa nimo isukod kon mosakar ba kini nimo? Tingali dili. Kay kon imo na kining mapalit ug imong makita nga dili diay kini igo nimo, nag-usik ka lang ug panahon ug kuwarta.

Kini nga pangatarongan gipadapat sa daghang tawo diha sa kaminyoon. Nagtuo sila nga mas maayo nga ang lalaki ug babaye mag-ipon una sa dili pa manaad nga mahimong bana ug asawa. ‘Kay kon dili magkasinabot,’ sila miingon, ‘pwede silang magbulag nga dili na kinahanglang mag-atubang sa lisod ug mahal kaayong proseso sa pagdiborsiyo.’

Tingali ang uban nga may ingon niini nga panghunahuna nakakita sa ilang minyong higala nga nag-antos sa daogdaogang kapikas. O tingali sila nakakita sa makaguol nga epekto sa usa ka kaminyoon nga wala nay gugma. Tungod niini, tingali sila maghunahuna nga mas maayong mag-ipon una.

Unsay hunahuna sa Bibliya bahin niini? Sa pagtubag, ato unang hisgotan kon unsay giingon sa Pulong sa Diyos bahin sa kaminyoon.

“Usa ka Unod”

Gipasiugda sa Bibliya nga dungganon ang kaminyoon, ug tinuod kini kay si Jehova nga Diyos ang naghikay niini. (Genesis 2:21-24) Sukad sa sinugdan, katuyoan ni Jehova nga pinaagi sa kaminyoon ang lalaki ug babaye mahimong “usa ka unod.” (Genesis 2:24) Human sa pagkutlo niining mga pulonga, si Jesus midugang: “Kon unsay gihiusa pagyugo sa Diyos ayaw ipabulag ni bisan kinsang tawo.”—Mateo 19:6.

Tinuod, ang ubang magtiayon magbulag o magdiborsiyo sa ulahi. a Apan kon mahitabo man kini, dili kini tungod kay dunay diperensiya ang kahikayan sa kaminyoon, kondili tungod kay ang usa sa kapikas o silang duha wala motuman sa ilang gipanaad sa adlaw sa ilang kasal.

Sa pag-ilustrar: Ibutang ta nga ang magtiayon dunay awto, apan wala nila kini atimana sumala sa instruksiyon sa tigbuhat niini. Kon madaot ang awto, kinsay mabasol? Ang tigbuhat ba sa awto o ang tag-iya nga wala motuman sa instruksiyon?

Kining prinsipyoha ikapadapat usab diha sa kaminyoon. Kon palig-onon sa bana ug asawa ang ilang panagtiayon ug maningkamot sa pagsulbad sa ilang mga problema pinaagi sa pagpadapat  sa mga prinsipyo sa Bibliya, walay posibilidad nga magbulag sila. Kon ang duha ka tawo magpakasal, sila nanaad sa usag usa, ug kana nga panaad mopabati kanilag kasegurohan. Busa ang kaminyoon mahimong basehanan sa mahigugmaong panagtiayon.

‘Likayi ang Pagpakighilawas’

Ang uban tingali mangutana: ‘Nganong dili man lang mag-ipon una? Dili ba ang pag-ipon una sa dili pa mohimog panaad sa kaminyoon nagpakitag pagtahod sa pagkasagrado sa kaminyoon?’

Tin-aw ang tubag sa Bibliya. Si Pablo miingon: ‘Likayi ang pagpakighilawas.’ (1 Tesalonica 4:3, Maayong Balita Biblia) Ang terminong ‘pakighilawas’ nagtumong sa tanang seksuwal nga relasyon gawas sa kaminyoon. Naglakip kini sa seksuwal nga relasyon sa mga nag-ipon nga wala makasal, bisag nagplano silang magpakasal. Busa sumala sa Bibliya, sayop nga mag-ipon una bisag nagplano na silang magpakasal.

Dili na ba praktikal ang tambag sa Bibliya sa atong panahon? Mao kanay pagtuo sa uban. Sa pagkatinuod, diha sa daghang kayutaan gilantaw sa uban nga normal ang pag-ipon—may plano mang magpakasal o wala. Apan hunahunaa ang resulta. Nakaplagan ba niadtong nanag-ipon ang sekreto sa pagpalampos sa kaminyoon? Mas malipayon ba sila kay niadtong nagpakasal? Daghan ba niadtong nag-ipon una nagmaunongon human sa kasal? Gipakita sa mga pagtuon nga sukwahi ang mga resulta. Sumala sa pagtuon, kadtong nag-ipon una mas daghag problema ug sa ulahi nagbulag.

Miingon ang ubang mga eksperto nga ang maong mga pagtuon dili kasaligan. Ang usa ka sikologo miingon: “Ang mga kahimtang niadtong nag-ipon una lahi kay niadtong nagpakasal daan.” Para niya ang pagpuyo-puyo dili mao ang isyu, kondili ang isyu mao ang “pagpabili sa pagkahimong minyo.”

Bisag tinuod pa kana, nagpakita lang kana nga hinungdanon ang pagsunod sa hunahuna sa Diyos bahin sa kaminyoon. Ang Bibliya nag-ingon: “Himoa nga dungganon ang kaminyoon taliwala sa tanan.” (Hebreohanon 13:4) Dihang ang lalaki ug babaye manaad nga magpabiling usa ka unod ug dayon magpakitag pagtahod sa kahikayan sa kaminyoon, ang ilang panagtiayon dili daling mabungkag.—Ecclesiastes 4:12.

Busa kon atong balikan ang ilustrasyon sa sinugdan, makataronganon nga sukdon una ang sinina sa dili pa kini paliton. Apan ang katumbas niini dili ang pagpuyo-puyo, kondili ang paggahin ug igong panahon sa pag-ila pag maayo sa tawo nga imong gihunahunaang pakaslan. Kining hinungdanon apan kasagarang wala hatagig importansiya nga lakang maoy usa sa mga sekreto sa malamposong pamilya.

[Footnote]

NAKAPAMALANDONG KA BA?

◼ Nganong gidili sa Bibliya ang pagpakigsekso sa dili kapikas sa kaminyoon? —Salmo 84:11; 1 Corinto 6:18.

◼ Unsang mga hiyas ang angay nimong pangitaon sa usa ka kapikas?—Ruth 1:16, 17; Proverbio 31:10-31.

[Kahon sa panid 29]

‘NAKASALA BATOK SA KAUGALINGONG LAWAS’

Ang Bibliya nag-ingon: “Siya nga nagapakighilawas nagapakasala batok sa iyang kaugalingong lawas.” (1 Corinto 6:18) Sa dili pa dugayng katuigan napamatud-an nga tinuod kining mga pulonga kay minilyon ang nangamatay tungod sa AIDS ug sa ubang mga sakit nga mapasa pinaagig pagpakigsekso. Apan dili kay kana ra. Gipakita sa mga pagtuon nga ang depresyon ug pagsulay sa paghikog kasagaran diha sa mga batan-on nga nakigsekso. Ang imoralidad mosangpot usab ug wala kinahanglanang pagsabak, diin ang uban matental sa pagpakuha sa ilang gisabak. Busa kita makaingon nga praktikal gihapon karon ang moral nga sukdanan sa Bibliya.