Mga Pananglitan sa Malamposong mga Pamilya—Bahin Dos

Sumala sa gihisgotan sa “Mga Pananglitan sa Malamposong mga Pamilya—Bahin 1,” ang mga prinsipyo sa Bibliya makapalig-on sa mga pamilya panahon sa kalisdanan. a Alang sa mga nagsunod sa iyang mga sukdanan, si Jehova nga Diyos nagsaad: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.”—Salmo 32:8.

Pagsagubang sa problema sa panalapi. Ang kuwarta maoy kasagarang awayan sa magtiayon. Apan ang mga prinsipyo sa Bibliya makatabang sa mga pamilya sa pagbaton ug hustong tinamdan bahin niini. Si Jesus miingon: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. . . . Ang inyong langitnong Amahan nahibalo nga gikinahanglan ninyo kining tanang butanga.”—Mateo 6:25, 32.

Sa panid 23, si Issachar nga taga-Amerika nagsugilon kon giunsa niya ug sa iyang pamilya pagsagubang ang problema sa panalapi dihang naguba ang ilang balay tungod sa Bagyong Katrina.

Kon may membro sa pamilya nga magsakit. Tanang tawo magsakit. Kasagaran, ang sakit temporaryo ug mamaayo ra. Apan komosta kon dunay laygay nga sakit ang usa ka membro sa pamilya? Ang Bibliya nag-ingon nga mahimong mapalig-on ni Jehova ang masakiton. (Salmo 41:1-3) Sa unsang paagi gamiton ni Jehova ang pamilya sa pagtabang sa masakitong membro?

Sa panid 24, si Hajime, usa ka padre depamilya sa Japan, nagsugilon kon sa unsang paagi siya ug ang iyang pamilya nagtinabangay sa pag-atiman sa iyang asawa nga si Noriko human siya nadayagnos nga may grabeng sakit.

Dihang mamatyan ug anak. Ang kamatayon sa usa ka anak maoy usa sa kinasakitan sa mga trahedya sa pamilya. Si Jehova nagsaad nga iyang pahiran ang tanang luha sa kaguol tungod sa kamatayon sa usa ka anak. (Pinadayag 21:1-4) Bisan karon, siya naghupay niadtong mga namatyan.—Salmo 147:3.

Sa panid 25, si Fernando ug Dilma nga taga-Amerika nagsugilon kon sa unsang paagi ang Bibliya nakapalig-on kanila sa pagsagubang sa kamatayon sa ilang masuso nga anak nga babaye.

Ang Bibliya maoy kasaligang giya alang sa mga pamilya nga nag-atubang ug kalisdanan, sumala sa gipakita sa mga asoy sa mosunod nga mga panid.

[Footnote]

 [Kahon/Mga hulagway sa panid 23]

Pagsagubang sa Problema sa Panalapi

Sumala sa giasoy ni Issachar Nichols, taga-Amerika

“Gipayhag sa Bagyong Katrina ang among balay. Ang eskuylahan nga akong gitrabahoan nalunopan sulod sa usa ka bulan ug tunga.”

SA TING-INIT sa 2005, ako ug ang akong asawa nga si Michelle, uban sa among dos anyos nga anak, si Sydney, nagpuyo sa Bay St. Louis, Mississippi, U.S.A. Kay mga Saksi ni Jehova man kami, nagplano kami ni Michelle sa pagpakigbahin pag dugang sa Kristohanong ministeryo. Maestro ako, ug ang eskuylahan nga akong gitudloan duol ra sa New Orleans, Louisiana. Tulo ka adlaw lang ang akong trabaho sa usa ka semana busa makapanahon ako sa pagtudlo sa uban bahin sa Bibliya. Wala kami maglisod sa among adlaw-adlaw nga kalihokan. Dayon gibalita nga taliabot ang Bagyong Katrina. Mibakwet dayon kami.

Sa natapos ang bagyo, napayhag ang among balay sa Bay St. Louis ug maingon man ang eskuylahan sa New Orleans diin ako nagtudlo. Nakapatukod kamig balay gikan sa nadawat namong kuwarta sa insyurans ug sa gobyerno, apan naglisod ako sa pagpangitag regular nga kapanginabuhian. Dugang pa, ang akong asawa nasakit tungod sa virus gikan sa hugawng tubig. Nadaot ang iyang sistema sa imyunidad, ug human niadto natakboyan siyag West Nile virus kay napaakan ug lamok. Dugang pa, misaka ang bayranan sa insyurans ug ang adlaw-adlawng mga galastohan.

Aron makapasibo sa among bag-ong kahimtang, kami nakakat-on sa pagdaginot, bisan sa kinahanglanong mga butang. Wala ako mamilig trabaho.

Sa pagkatinuod, dili lalim nga mapildihan ug kabtangan. Apan mapasalamaton kami nga buhi gihapon. Ug ang nahitabo kanamo nagpakita lamang nga ang materyal nga mga butang dili gayod kasaligan. Gani, napahinumdoman kami sa mga pulong ni Jesus: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”—Lucas 12:15.

Nakaamgo usab kami nga bisag naguol kaayo kami nga napildihag mga kabtangan, daghan pa ang mas alaot kay kanamo—ang uban namatay pa gani. Busa pagkahuman sa bagyo mitabang dayon ako sa pagpang-apod-apod sa mga hinabang, nga naghupay usab sa uban nga napildihan.

Niining tanan nga mga kalisdanan, ang Salmo 102:17 nakahupay gayod kanamo. Kini naghisgot nga si Jehova nga Diyos mamati gayod sa pag-ampo niadtong napildihan sa tanang butang, ug dili motamay sa ilang pag-ampo. Ingong pamilya, kami mibati gayod nga iya kaming gitabangan!

[Kahon sa panid 23]

Human mihapak ang Bagyong Katrina ug Rita sa U.S. Gulf Coast niadtong 2005, ang mga Saksi ni Jehova nagporma dayon ug 13 ka sentro sa pag-apod-apod sa hinabang, siyam ka bodega, ug upat ka fuel depot. Mga 17,000 ka Saksi gikan sa Amerika ug sa 13 pa ka nasod miboluntaryo sa pagtabang. Sila nakaayo ug libolibong balay.

 [Kahon/Mga hulagway sa panid 24]

Kon May Membro sa Pamilya nga Magsakit

Sumala sa giasoy ni Hajime Ito, taga-Japan

“Lingaw-lingaw namo ni Noriko ang pagluto sa wala pa siya magsakit. Karon dili na siya makakaon o makainom pinaagi sa iyang baba ug dili na usab siya makasulti. Nag-wheelchair na siya ug nagginhawa pinaagig respirator.”

NIADTONG Mayo 2006, ang akong asawa nga si Noriko maglisod sa pagsulti. Maglisod usab siya sa pagkaon ug pag-inom. Pagka-Septiyembre nadayagnos siya nga may amyotrophic lateral sclerosis (ALS)—usa ka sakit nga magdaot sa mga nerve cell sa utok ug sa dugokan. Sa upat lang ka bulan, nausab pag-ayo ang among kinabuhi. Ug sinugdanan lamang kini sa iyang mga problema.

Dayon naparalisar ang dila ni Noriko ug ang iyang tuong kamot. Pinaagi sa usa ka operasyon nga gitawag ug gastrostomy, ang iyang pagkaon ipaagi sa tubo, ug tungod sa operasyon nga tracheostomy—ang iyang liog gilungagan diin diha moagi ang hangin—siya dili makasulti. Lisod kaayo kini alang kang Noriko kay siya aktibo kaayo. Kami mga Saksi ni Jehova, ug si Noriko ug ang among mga anak nga babaye pulos bug-os panahong mga ministro. Karon si Noriko nagdepende sa respirator aron makaginhawa, ug siya naghigda lang kanunay.

Bisan pa niini, si Noriko wala mosurender! Pananglitan, siya motambong sa Kristohanong mga tigom nga maglingkod sa wheelchair, nga dunay kab-itanag respirator. Ang iyang pangdungog nadaot, busa isulat sa akong anak ang gihisgotan sa tigom diha sa dagkong letra aron mabasa kini ni Noriko. Ug bisan tuod napugos siya sa pag-undang sa bug-os panahong ministeryo, magpadala gihapon siyag sulat sa mga tawo sa pagtudlo kanila sa mensahe sa paglaom diha sa Bibliya pinaagig linaing gamit nga gitaod diha sa among kompiyuter.—2 Pedro 3:13; Pinadayag 21:1-4.

Ang among pamilya nagtinabangay sa pag-atiman kang Noriko. Ang akong mga anak nangitag bag-ong trabaho aron makagugol silag mas daghang panahon sa pagtabang. Kaming tulo nagtinabangay sa pag-atiman sa adlaw-adlawng mga gimbuhaton sa balay nga ginahimo ni Noriko.

Usahay inigkabuntag akong makita si Noriko nga morag gikapoy. Moingon ako sa akong kaugalingon, ‘Akong sultihan siya nga magrelaks-relaks lang siya karon.’ Apan si Noriko gustong magpaambit sa mensahe sa Bibliya ngadto sa uban. Sa mag-andam ako sa kompiyuter nga iyang gamiton, mohayag dayon ang iyang mga mata sa kalipay! Kon magsulat na siya, moarang-arang ang iyang pamati. Akong nakita kon unsa ka hinungdanon ang pagkahimong ‘puliki kanunay diha sa buluhaton sa Ginoo.’—1 Corinto 15:58.

Ang kasinatian ni Jason Stuart nga dunay sakit nga ALS, nga giasoy diha sa Enero 2006 nga gula sa Pagmata!, nakatabang pag-ayo kang Noriko sa paghupot ug positibong tinamdan. Gani, dihang nangutana ang mga kawani sa ospital kon nganong maayo siyag tinamdan, sultihan sila ni Noriko bahin niini nga artikulo, ug amo silang gihatagan ug mga kopya niini. Ang akong asawa napalig-on gayod sa pagtudlo sa uban bahin sa iyang pagtuo.

Kami ni Noriko mga 30 ka tuig nang minyo, apan sa miaging tulo ka tuig, daghan akog napabilhan kaniya nga kaniadto wala lang nako tagda. Nalipay kaayo ako nga siyay akong gipakaslan!

 [Kahon/Mga hulagway sa panid 25]

Dihang Mamatyan ug Anak

Sumala sa giasoy ni Fernando ug Dilma Freitas, taga-Amerika

“Dili gayod matukib ang kasakit nga bation kon mamatyan kag anak. Dili gayod kini lalim.”

ANG among anak nga si Precious namatay niadtong Abril 16, 2006. Diyes diyas pa lang siya. Dihang tulo ka bulan pang nagmabdos ang akong asawa, nakita nga grabe ang sakit sa kasingkasing sa bata. Sa hapit na siyang ipanganak, nasuta nga mamatay ra siya human mahimugso—kon mabuhi man ugaling siya. Naglisod kami sa pagdawat niini. Kami dunay tulo ka himsog nga mga anak. Ug dili kami makatuo nga mamatay siya.

Pagkahimugso ni Precious, nadayagnos sa usa ka espesyalista sa chromosomal disorder nga siya dunay talagsaong sakit nga gitawag ug Trisomy 18, nga motakboy sa 1 sa matag 5,000 ka masuso. Naklaro nga dili siya mabuhig dugay. Naguol gayod kami kay kami wala kaayoy mahimo. Ang mahimo lang namo mao ang pagpakig-uban niya sa mubong panahon. Ug mao kanay among gihimo.

Mapasalamaton kaayo kami sa napulo ka adlaw nga nakauban namo si Precious. Sulod niining panahona gipabati namo ug sa among tulo ka anak nga babaye nga amo siyang gimahal. Amo siyang gikugos-kugos, gipakig-estoryahan, gigakos-gakos, gihalok-halokan, ug giletratohan. Gisultihan pa gani namo siya kon kang kinsa siya naliwat. Adlaw-adlaw kaming duawon sa espesyalista nga nagdayagnos kang Precious diha sa ospital. Mihilak siya ug miingon nga naguol usab siya. Gidrowing niya si Precious samtang nakig-estorya kanamo aron dili siya malimot kaniya. Iya kaming gihatagan ug kopya.

Kay mga Saksi ni Jehova man kami, nagtuo gayod kami sa gitudlo sa Bibliya nga ipasig-uli sa Diyos ang paraisong mga kahimtang sa atong yuta ug iya gayong banhawon ang mga patay—lakip sa mga masuso, sama kang Precious. (Job 14:14, 15; Juan 5:28, 29) Nagpaabot kami sa adlaw nga among makugos ug magakos siya pag-usab. Matag higayong madungog namo ang pulong “paraiso,” malipay gayod kami niini nga paglaom! Kami malipayon nga si Precious anaa sa panumdoman sa Diyos ug wala mag-antos.—Ecclesiastes 9:5, 10.