Mga Pananglitan sa Malamposong mga Pamilya—Bahin Uno

Sumala sa gihisgotan na niining espesyal nga gula sa Pagmata!, ang malamposong mga pamilya duna usay mga problema. Tinuod kini kay kita nagkinabuhi na sa gihisgotan sa Bibliya nga “makuyaw nga mga panahong lisod sagubangon.” (2 Timoteo 3:1) Ang matag pamilya duna gayoy mga problema.

Apan hinumdomi nga ang kalamposan wala magdepende nianang gituohan sa mga tawo nga hingpit nga mga kahimtang. Hinunoa, si Jesus miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang mga pamilya nga nag-una sa ilang espirituwal nga panginahanglan pinaagi sa pagpadapat sa mga prinsipyo sa Bibliya nakakaplag sa sekreto sa kalamposan—bisan pa sa dili maayong mga kahimtang. Tagda kini nga mga pananglitan.

Pag-atiman ug anak nga may depekto. Gihatagan sa Bibliya ug dakong importansiya ang pag-atiman sa mga membro sa pamilya, lakip na niadtong may linaing panginahanglan. Kini nag-ingon: “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.”—1 Timoteo 5:8.

Sa panid 15, si Victor, nga usa ka padre depamilya nga taga-Habagatang Aprika, nagsugilon kon giunsa nila pag-atiman sa iyang asawa ang ilang anak nga may depekto sa kapig 40 ka tuig.

Nagdako nga sinagop. Ang mga prinsipyo sa Bibliya makatabang sa tawo sa pagbaton ug timbang nga panglantaw sa iyang kaugalingon—bisag giabandonar siya sa iyang pursoso nga mga ginikanan. Ang Bibliya nag-ingon nga si Jehova nga Diyos maoy “magtatabang” sa mga batang ilo sa amahan.—Salmo 10:14.

Sa panid 16, si Kenyatta, usa ka batan-ong babaye nga taga-Amerika, nagsugilon kon sa unsang paagi siya nakakat-on sa pagsagubang sa iyang negatibong pagbati kay wala gayod siya makaila sa iyang pursoso nga mga ginikanan.

Pagsagubang sa kamatayon sa usa ka ginikanan. Dili gayod lalim nga mamatyan ug ginikanan. Ang Bibliya makatabang. Ang awtor niini, si Jehova, maoy “Diyos sa tanang paghupay.”—2 Corinto 1:3.

Sa panid 17, si Angela, usa ka batan-ong babaye nga taga-Australia, nagsugilon kon sa unsang paagi nakatabang ang iyang suod nga relasyon sa Diyos sa pagsagubang sa kamatayon sa iyang ginikanan.

Ang tanang pamilya may mga problema nga sagubangon. Ang mga asoy sa mosunod nga mga panid nagpakita nga kadtong nagapadapat sa mga prinsipyo sa Bibliya nakakaplag ug sekreto sa pagsagubang sa ilang mga problema.

 [Kahon/Mga hulagway sa panid 15]

Pag-atiman ug Anak nga May Depekto

Sumala sa giasoy ni Victor Maynes, taga-Habagatang Aprika

“Sukad natawo si Andrew, kami maoy moilis, mokaligo, ug mopakaon kaniya. Siya 44 anyos na karon.”

NAGDUDA kami nga may diperensiya si Andrew kay dili gihapon siya makalakaw bisag kapin na siyag usa ka tuig. Dayon nianang panahona siya mikirig. Gipaospital dayon namo si Andrew ug among nahibaloan nga siya patolon diay. Apan dili kay kana ray iyang diperensiya. Nakita sa dugang eksaminasyon nga may diperensiya ang iyang utok.

Human sa pagsulay sa lainlaing matang sa pagtambal, panagsa na lang patolon si Andrew. May panahon nga kinahanglang motomar siyag upat ka lainlaing tambal tulo ka beses sa usa ka adlaw. Siyempre, dili matambalan ang diperensiya sa iyang utok. Bisan 44 anyos na si Andrew, siya may pangutok nga samag singko o sayis anyos nga bata.

Gitambagan kami sa mga doktor sa pagpasulod kang Andrew diha sa usa ka pasilidad nga tig-atiman sa mga tawong may depekto sama kaniya, apan kami gayoy nangunay sa pag-atiman kaniya. Maatiman ra namo siya diha sa balay, bisag dili kini lalim.

Busa kaming tanan sa pamilya maoy nag-atiman kaniya. Ang uban namong mga anak—duha ka babaye ug usa ka lalaki nga nagpuyo uban namo—dako kaayog tabang ug mapasalamaton ako kanila! Dugang pa, kay mga Saksi ni Jehova man kami, gitabangan usab kami sa among mga kauban sa kongregasyon. Usahay, silay moluto para namo o mobantay kang Andrew kon mosangyaw kami o may uban pang buhaton.

Kanunay namong hinumdoman ang mga pulong sa Isaias 33:24, diin ang Diyos nagpasalig nga sa umaabot “walay pumoluyo nga moingon: ‘Ako masakiton.’” Nagtuo gayod kami nga tumanon sa Diyos ang iyang katuyoan sa pagpatunghag usa ka bag-ong kalibotan ug sa pagwagtang sa tanang balatian. (2 Pedro 3:13) Busa nagpaabot kami sa panahon dihang maayo na si Andrew. Nagtuo gayod kami sa giingon ni Jesus nga kon among unahon ang intereses sa Gingharian sa Diyos, tagan-an ra kami sa among mga panginahanglan. (Mateo 6:33) Tinuod kana kay wala gayoy nakulang kanamo.

Dili hinuon tanan makaatiman ug membro sa pamilya nga may depekto diha sa balay. Alang niadtong nag-atiman ug may depektong membro diha sa balay, ang akong unang ikasugyot mao ang kinasingkasing ug regular nga pag-ampo. (1 Pedro 5:6, 7) Ikaduha, atimana ug mahala pag-ayo ang imong anak, ug ayaw paghunahuna nga wala siyay katakos sa pagkat-on bahin kang Jehova nga Diyos. (Efeso 6:4) Ikatulo, ilangkit ang tibuok pamilya, ug patabanga sila. Ikaupat, pabatia ang imong anak nga siya gihigugma gayod sa tibuok pamilya. Siyempre, dili managsama ang tanang kahimtang. Sa among kabahin, wala gayod kami magbasol nga kami maoy nangunay sa pag-atiman kang Andrew. Para nako, siya ang labing hiligugmaong bata—ang labing hiligugmaong tawo.

 [Kahon/Mga hulagway sa panid 16]

Nagdako nga Sinagop

Sumala sa giasoy ni Kenyatta Young, taga-Amerika

“Kon ikaw humabdos, kadugo nimo ang usa sa imong mga ginikanan. Apan kay sinagop man ako, pareho sila nga dili nako kadugo. Wala gani ako mahibalo kon kang kinsa ako naliwat.”

WALA ako mahibalo kon kinsay akong amahan, ug wala ako makaila sa akong tinuod nga inahan. Siya palahubog ug nagdroga dihang iya akong gisabak. Sa natawo ako, gibutang ako sa balay sa mga ilo ug nagpuyo sa nagkalainlaing balay sa mga ilo, dayon gisagop ako sa wala pa akoy dos anyos.

Sa dihang gipakita sa kawani sa gobyerno nga tigpangitag mosagop ang akong letrato ngadto sa akong ama-ama, iya dayon akong gisagop. Nakaangay ako dihadiha sa akong ina-ina. Ako siyang giingnan nga siyay akong inahan ug nga gusto kong mokuyog niya.

Apan nahinumdom ako sa bata pa ko nga mahadlok kong makahimog sayop kay basig ibalik unya ko sa balay sa mga ilo. Naglikay ako nga magsakit o magminaldita sama sa ubang mga bata. Mag-amping gyod ko nga dili ubhon o sip-onon! Pasaligan ako kanunay sa akong ama-ama ug ina-ina nga ila akong gimahal ug nga dili nila ako iabandonar.

Bisag hamtong na, mobati usahay ako nga ang ilang gugma kanako dili sama sa uban nga nagdako uban sa ilang pursoso nga mga ginikanan. Dihang ako nang nadawat kini, dunay moingon nako, “Magpasalamat ka nga buotan ang misagop kanimo!” Mapasalamaton ako, apan ang mga komento nga sama niini nagpabati kanako nga daw may diperensiya ako ug lisod akong higugmaon.

Lisod hunahunaon nga basig dili na nako mailhan ang akong tinuod nga amahan. Usahay sakit ang akong buot sa akong tinuod nga inahan kay wala siya magtinarong sa iyang kinabuhi nga tungod niini iya akong giabandonar, nga para niya daw ako walay bili. Apan usahay maluoy sab ko niya. Maghunahuna ako kanunay nga kon ugaling magkita kami, ako gayod siyang pahibaloon nga maayo ra ako ug nga dili siya angayng makonsensiya nga iya akong giabandonar.

Ang nagsagop kanako mga Saksi ni Jehova, ug usa sa kinamaayohang mga gasa nga akong nadawat gikan kanila mao ang kahibalo sa Bibliya. Nakahupay gayod kanako ang giingon sa Salmo 27:10: “Kon ugaling biyaan ako sa akong amahan ug sa akong inahan, si Jehova mismo magsagop kanako.” Tinuod gayod kini sa akong kahimtang. Ug dunay mga kaayohan ang pagkasinagop. Pananglitan, interesado akog mga tawo—sa ilang kagikan ug sa ilang kinabuhi—tingali tungod kay wala ako makaila sa akong tinuod nga pamilya. Gusto akog mga tawo, ug importante gayod kana sa Kristohanong ministeryo. Kay Saksi ni Jehova man ako ug nagsangyaw bahin sa Bibliya, may kompiyansa ako sa akong kaugalingon ug may katuyoan ang akong kinabuhi. Kon maguol ko, mosangyaw ko ug motabang sa uban. Pinaagi sa pagtudlo sa mga tawo bahin sa Bibliya, masuod ako kanila. Ang matag usa dunay ikasugilon bahin sa iyang kinabuhi.

 [Kahon/Mga hulagway sa panid 17]

Pagsagubang sa Kamatayon sa Usa ka Ginikanan

Sumala sa giasoy ni Angela Rutgers, taga-Australia

“Dihang namatay si Papa, mibati ako nga daw wala na akoy kadangpan. Wala na ang tawo nga nahibalo sa tanan ug makasulbad sa tanan nakong mga problema.”

ANG akong amahan namatay napulo na ka tuig kanhi sa tin-edyer pa ako. Unom ka bulan una pa niana, gioperahan siya, ug samtang didto siya sa ospital, gisultihan kami sa doktor nga wala na silay mahimo. Si Mama nagkabuang sa pagpangitag dugang impormasyon, ang akong magulang nga lalaki nakuyapan, ug ako wala makasabot sa akong gibati. Paglabay sa unom ka bulan, si Papa namatay.

Naglibog ko sa akong gibati. Buot ko nga sabton unta ako sa akong mga higala, apan dili ko gusto nga ila akong kaluy-an. Busa giluom ko na lang ang tanan. Sa laing bahin, aron malingaw ako kon kauban sa akong mga higala, akong ipakita nga okey lang ko bisag dili tinuod. Sa mamalandong ako sa akong gihimo niadtong panahona, akong naamgohan nga mapailobon kaayo ang akong mga higala kanako!

Gibasol ba nako ang akong kaugalingon sa kamatayon ni Papa? Oo! Nagmahay ako nga nagkulang ako sa pagsulti kaniya nga gimahal nako siya ug sa paggakos ug pagpakig-uban kaniya. Bisag kadaghan na nako giingnan ang akong kaugalingon, ‘Dili kana ang gustong ipahunahuna ni Papa kanimo,’ natugaw gihapon ako niini.

Kay Saksi ni Jehova man ako, nahupayan gayod ako sa paglaom sa pagkabanhaw nga gihisgotan sa Bibliya. (Juan 5:28, 29) Akong hunahunaon nga si Papa mibakasyon lang sa laing nasod ug may adlaw rang mopauli siya, apan wala lang ko mahibalo kon kanus-a. Sa tinuoray, kon may moingon nako, “Mobalik ra ang imong Papa sa pagkabanhaw,” wala ako madasig niini sa primero. Para nako, ‘Gusto kong karon na mabanhaw si Papa!’ Apan ang ilustrasyon bahin sa pagbakasyon sa laing nasod nakatabang. Kini nag-ilustrar sa pagkabanhaw sa umaabot, ug kini nakatabang kanako sa pagsagubang sa iyang kamatayon.

Gitabangan kami sa among mga isigka-Kristohanon. Nahinumdom ako sa usa ka igsoon nga miingon kanako nga dili gayod siya komportableng maghisgot bahin sa kamatayon sa akong amahan, apan siya miingon nga nabalaka siya kanako ug sa akong pamilya. Naghunahuna ko kanunay sa iyang giingon. Kini nakatabang kanako sa pagkaamgo nga bisag walay gisulti ang mga tawo niadtong panahona, nahibalo ko nga sila nabalaka kanako ug sa akong pamilya. Giapresyar gayod nako kini!

Paglabay ug upat ka bulan sa pagkamatay ni Papa, si Mama naggugol ug daghang panahon sa ministeryo, ug akong nakita nga kini nakahatag gayod kaniyag kalipay. Busa miduyog ako kaniya sa pagministeryo. Katingalahan gayod nga ang pagtabang sa uban dako gayod ug mahimo kanimo. Kini nakapalig-on sa akong pagtuo sa Pulong ni Jehova ug sa iyang mga saad, ug kini nakatabang kanako sa pagbug-os sa akong hunahuna sa mga palaaboton sa unahan.