Ang Pagdagsang sa Teknolohiya

SA Albania, bisan ang tawo nga nagsakay ug asno nag-cellphone. Sa India, bisan ang makililimos mohunong sa iyang pagpakilimos aron mo-text o motawag diha sa iyang cellphone. Ma-cellphone, ma-kompiyuter, ma-telebisyon man, ang teknolohiya nakaabot sa tanang suok sa kalibotan—dato ug pobre duna niini—ug importante kini sa kinabuhi sa kadaghanan.

Ang pagdagsang sa teknolohiya tingali mas nadayag diha sa pagdaghan sa mga cellphone, nga ang kadaghanan niini dili ordinaryong mga cellphone. Ang bag-ong mga modelo magamit sa pag-Internet, pagpadala o pagdawat ug e-mail ug pag-text, pagtan-awg TV, pagpaminawg musika, pagletrato, paggamit ug Global Positioning System (GPS), ug siyempre sa pagtelepono!

Sumala sa taho sa mantalaang Washington Post, ang usa ka multimedia smartphone “karon mas daghag mahimo kay sa kahimanan nga gigamit sa North American Air Defense Command niadtong 1965.” Kini nga mantalaan miingon usab: “Karon duna nay usa ka cellphone sa matag duha ka tawo sa Yuta,” ug diha sa labing menos 30 ka nasod mas daghan ang cellphone kay sa mga tawo. ‘Karon lang kita sukad nakaagi ug kusog kaayo nga pagdagsang sa teknolohiya,’ matod pa sa mantalaan.

Sa tibuok kalibotan halos 60 porsiyento sa tiggamit ug cellphone anaa sa pobreng kanasoran, busa kini ang unang modernong gamit sa pagpakigkomunikar nga nabatonan sa mga tawo niining mga dapita. Pananglitan, sa Afghanistan mga 140,000 ka tiggamit ug cellphone ang nadugang didto matag bulan sa 2008, samtang sa dili pa dugayng katuigan sa Aprika miuswag ug mga 50 porsiyento ang tiggamit ug cellphone matag tuig.

Apan ang pagdagsang sa mga gamit sa komunikasyon aduna usay mga problema. Tungod sa mga cellphone, pager, ug laptop nga mga kompiyuter, ang mga tawo makontak dayon bisan kanus-a ug bisan asa, busa ang ubang mga tiggamit niini mibati nga morag nagawngan sila niini. Anaa pod kanang “mga adik” sa teknolohiya, kinsa maghigwaos kon dili maka-Internet.

Tingali ang kasagarang problema nga nalangkit sa modernong teknolohiya mao ang pagkahimong “adik,” pagkalinga, ug pagkabalda. a Apan kini nga mga gamit makahatag usab ug dakong kaayohan. Unsaon nimo kini paggamit sa timbang ug maalamong paagi, nga dili makabalda sa uban? Hisgotan kini sa sunod nga artikulo.

[Footnote]