Ang Hunahuna sa Bibliya

Posible Bang Higugmaon Nato ang Atong mga Kaaway?

“Ako magaingon kaninyo,” miingon si Jesu-Kristo, “magpadayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit, sanglit siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.”—Mateo 5:44, 45.

SA IMONG hunahuna, ang relihiyon ba makaimpluwensiya sa tawo sa paghigugma ug sa pagpakigdait o makapukaw sa tawo sa pagdumot ug sa paghimog kapintasan? Nakita sa kadaghanan karon nga kini makapukaw sa tawo sa pagdumot ug sa paghimog kapintasan, ilabina kon kini mag-apil-apil sa politika, magmapihigon, o magtuboy ug paghigugma sa nasod. Bisan pa niana, ingon sa gipakita sa mga pulong ni Jesus, kadtong tinuod nga ‘mga anak sa Diyos’ mosundog sa pagpasundayag sa Diyos ug gugma—bisan ngadto sa ilang mga kaaway.

Laing alagad sa Diyos miingon: “Kon ang imong kaaway gigutom, pakan-a siya; kon siya giuhaw, hatagi siya ug tubig nga mainom . . . Ayaw pagpadaog sa daotan, kondili padayong daoga ang daotan pinaagi sa maayo.” (Roma 12:20, 21) Apan kini ba nga gugma mapasundayag niining nagkawatak-watak nga kalibotan? Oo ang tubag sa mga Saksi ni Jehova! Tagda ang panig-ingnan ni Jesus ug sa iyang unang mga sumusunod.

Ilang Gihigugma ang Ilang mga Kaaway

Si Jesus nagtudlo sa kamatuoran bahin sa Diyos, ug daghan ang malipayong namati kaniya. Apan ang uban mibatok kaniya tungod sa pagkawalay kahibalo. (Juan 7:12, 13; Buhat 2:36-38; 3:15, 17) Bisan pa niana, si Jesus nagpadayon sa pagpaambit sa iyang makahatag ug kinabuhi nga mensahe ngadto sa tanan, lakip sa mga magsusupak. (Marcos 12:13-34) Ngano? Kay siya nahibalo nga ang uban mahimong magbag-o, moila kaniya ingong Mesiyas, ug magpahiuyon sa ilang kinabuhi sa mga kamatuoran nga makita diha sa Pulong sa Diyos.—Juan 7:1, 37-46; 17:17.

Sa gabii una pa siya gidakop, si Jesus nagpakitag gugma sa iyang mga kaaway. Iya pa ganing giayo ang usa sa mga midakop kaniya, kansang dalunggan natigbasan ni apostol Pedro. Nianang higayona si Jesus naghatag ug usa ka hinungdanong prinsipyo nga nahimong giya sa iyang matuod nga mga sumusunod hangtod karon. Siya miingon: “Ang tanang mogamit sa espada mamatay pinaagi sa espada.”  (Mateo 26:48-52; Juan 18:10, 11) Paglabay ug mga 30 ka tuig, si Pedro misulat: “Si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob. . . . Sa nag-antos siya, wala siya manghulga, apan nagpadayon sa pagpiyal sa iyang kaugalingon ngadto sa [Diyos].” (1 Pedro 2:21, 23) Dayag nga si Pedro nakakat-on nga ang pagpakitag gugma, dili pagbalos, maoy angayng buhaton sa matuod nga mga sumusunod ni Kristo.—Mateo 5:9.

Ang tanang ‘magsunod pag-ayo sa mga tunob ni Jesus’ magpasundayag sa iyang mahigugmaon ug mapuangorong tinamdan. ‘Ang ulipon sa Ginoo dili kinahanglang makig-away, kondili kinahanglang magmalumo sa tanan, . . . nga magpadayon sa pagpugong sa kaugalingon bisan ilalom sa daotan,’ nag-ingon ang 2 Timoteo 2:24. Kining mga hiyasa kinahanglang makita diha sa paagi sa pagkinabuhi sa mga Kristohanon, nga may panagdait ug panaghiusa.

Makigdaitong ‘mga Embahador ni Kristo’

Si apostol Pablo misulat sa iyang mga isigkamagtutuo: “Busa kami mga embahador kapuli ni Kristo . . . Ingong mga kapuli ni Kristo kami nagpakiluoy: ‘Magpasig-uli kamo ngadto sa Diyos.’” (2 Corinto 5:20) Ang mga embahador dili mag-apil-apil sa mga kalihokan sa politika ug sa militar diha sa mga nasod nga ilang gialagaran. Hinunoa, sila magpabiling neyutral. Ang ilang trabaho mao ang paghawas ug pagpasiugda sa gobyerno nga ilang gihawasan.

Tinuod usab kini maylabot sa mga embahador ug mga hawas ni Kristo. Ilang giisip si Jesus ingong Hari ug ilang gipasiugda ang iyang langitnong Gingharian pinaagi sa malinawong pagmantala sa maayong balita. (Mateo 24:14; Juan 18:36) Busa si Pablo misulat sa mga Kristohanon sa iyang panahon: ‘Kita wala makiggubat sumala sa kon unsa kita diha sa unod. Kay ang mga hinagiban sa atong pagpakiggubat dili unodnon, kondili gamhanan tungod sa Diyos aron sa pagpukan sa . . . mga pangatarongan ug sa tanang hataas nga butang nga gibangon batok sa kahibalo sa Diyos.’—2 Corinto 10:3-5; Efeso 6:13-20.

Sa dihang gisulat kini ni Pablo, ang mga Kristohanon gilutos diha sa daghang kanasoran. Makahimo unta sila sa pagbalos. Hinunoa, nagpadayon sila sa paghigugma sa ilang mga kaaway ug sa pagpaambit sa mensahe sa pakigdait ngadto sa tanan nga maminaw. Ang Encyclopedia of Religion and War nag-ingon: “Ang unang mga sumusunod ni Jesus wala makigbahin sa gubat ug wala magsundalo,” nga nag-isip niining mga buhata ingong “supak sa prinsipyo ni Jesus maylabot sa gugma ug sa sugo nga higugmaon ang kaaway.” a

Sama sa unang mga Kristohanon, giila sa mga Saksi ni Jehova si Jesus ingong ilang Hari. Ilang giila usab siya ingong Hari sa Gingharian sa Diyos—usa ka langitnong kagamhanan nga sa dili madugay magpatunghag kalinaw ug kasegurohan sa yuta. (Daniel 2:44; Mateo 6:9, 10) Busa, kay mga embahador ug mga hawas, sila nagmantala sa kahalangdon niana nga Gingharian. Sa samang higayon, sila naningkamot nga mahimong maayong mga molupyo sa mga nasod nga ilang gipuy-an, nga nagbayad sa ilang mga buhis ug nagtuman sa balaod kon kini dili supak sa balaod sa Diyos.—Buhat 5:29; Roma 13:1, 7.

Apan ikasubo nga usahay ang mga Saksi masaypan ug sabot, gidaot, ug gilutos sama sa unang mga Kristohanon. Dili gayod sila manimalos. Hinunoa, sila naningkamot nga mahimong ‘makigdaiton sa tanang tawo,’ nga nanghinaot nga ang ubang mga magsusupak ‘mapasig-uli ngadto sa Diyos’ ug makabaton ug paglaom nga mabuhi sa walay kataposan. b—Roma 12:18; Juan 17:3.

[Mga footnote]

NAKAPAMALANDONG KA BA?

◼ Sa unsang paagi angayng trataron sa mga Kristohanon ang ilang mga kaaway?—Mateo 5:43-45; Roma 12:20, 21.

◼ Unsay reaksiyon ni Jesus dihang siya gilutos?—1 Pedro 2:21, 23.

◼ Nganong wala mag-apil-apil ang unang mga Kristohanon sa literal nga pagpakiggubat?—2 Corinto 5:20; 10:3-5.