Ang Kahinungdanon sa Pagpakitag Pagmahal

“HALOGA sila kanunay!” miingon ang usa ka propesor sa child psychiatry ngadto sa bag-ong inahan nga nanganak ug kaluha. Nagpatambag ang maong inahan kon unsay kinamaayohang paagi sa pagpadako sa iyang kaluha. Ang propesor midugang nga “ang gugma ug pagmahal kinahanglang ipakita sa lainlaing paagi sama sa paghalog ug paghalok, pagpangga, pagkamasinabtanon, pagkamalipayon, pagkamahinatagon, pagkamapinasayloon, ug makataronganong pagdisiplina. Dili ta angayng maghunahuna nga nahibalo na ang atong mga anak nga ato silang gihigugma.”

Ingon usab niana ang ideya ni Tiffany Field, nga direktor sa Touch Research Institute sa University of Miami, sa Florida, U.S.A. “Ang paghapohap sama ka hinungdanon sa pagkaon ug ehersisyo kay kana makatabang sa maayong pagdako sa bata,” siya mipahayag.

Ang mga adulto ba kinahanglan usab nga pakitaag pagmahal? Siyempre oo. Ang panukiduki sa sikologong si Claude Steiner nagpakita nga bisan unsa pay atong edad, makatabang kanato sa emosyonal nga paagi kon isulti o ipakita kanato nga kita gimahal. Si Laura, usa ka nars nga nag-atiman ug daghang tigulang, miingon: “Akong nakita nga dakog epekto diha sa mga tigulang kon sila pakitaag pagmahal. Kon ikaw magmaluloton kanila ug imo silang hapohapon, sila mosalig kanimo ug mosunod dayon kon unsay imong isulti. Gawas pa, kana nagpakita usab nga ikaw nagtahod sa ilang dignidad.”

Dugang pa, ang pagpakitag pagmahal makahatag usab ug kaayohan sa nagpakita niana ug niadtong pakitaan niana. Sama sa giingon ni Jesu-Kristo, “adunay labaw nga kalipay sa paghatag kay sa pagdawat.” (Buhat 20:35) Ikaw ilabinang malipay kon imong pakitaag pagmahal ang mga nabalaka, naguol pag-ayo, o walay pagsalig sa kaugalingon. Ang Bibliya naghisgot ug mga panghitabo diin ang maong matang sa mga tawo gipakitaag pagmahal.

Labihan tingaling lipaya sa “usa ka tawo nga punog sanla,” nga inayran sa kadaghanan, sa dihang siya maluluy-ong gihikap ni Jesu-Kristo!—Lucas 5:12, 13; Mateo 8:1-3.

Ang tigulang nang propeta nga si Daniel nalagsik gayod sa dihang ang usa ka manulonda sa Diyos nagpalig-on kaniya ug naghikap usab kaniya sa tulo ka beses. Kadtong mahigugmaong paghikap ug makapalig-ong mga pulong mao gayod ang gikinahanglan ni Daniel aron mahibalik ang kapiskay sa iyang lawas ug hunahuna.—Daniel 10:9-11, 15, 16, 18, 19.

Dihay higayon nga ang suod nga mga higala ni apostol Pablo mibiyaheg mga 50 kilometros gikan sa Efeso paingon sa Mileto aron makigkita kaniya. Didto giingnan sila ni Pablo nga basin dili na sila magkita pag-usab. Lagmit natandog gayod si Pablo sa dihang ang iyang maunongong mga higala “mihalog ug mihalok kaniya agig panamilit”!—Buhat 20:36, 37, Today’s English Version.

Busa, ang Bibliya ug ang modernong panukiduki nagdasig kanato sa pagpakitag pagmahal sa usag usa. Kon ato kining himoon, kini makahatag kanatog kaayohan sa pisikal ug sa emosyonal. Tin-aw nga dili lamang ang mga bata ang angayng pakitaag pagmahal.