Pagpaniid sa Kalibotan

◼ Sumala sa usa ka panukiduki sa dili pa dugay, “6 sa 10 ka Britaniko nagtuo nga ang relihiyon maoy hinungdan sa pagkabahinbahin.”—THE CATHOLIC HERALD, BRITANYA.

◼ Ang kinadak-ang planta sa koryente nga naggamit sa kahayag sa adlaw makaplagan sa Portugal. Ang mga solar cell niini mookupar ug 250 ka ektarya ug makasuplay kinig koryente sa mga 30,000 ka balay.—EL PAÍS, ESPANYA.

◼ Sa tibuok kalibotan, 900,000 ka batan-on ang mamatay kada tuig tungod sa aksidente—kapig 2,000 kada adlaw. Ang kasagarang hinungdan mao ang mga aksidente sa karsada, pagkalumos, ug pagkabiktima sa sunog.—DIE WELT, GERMANY.

◼ “Bisag dili na kaayo daghang kalasangan ang maupaw karon, mga 200 kilometro kuwadradong kalasangan gihapon ang mapuril kada adlaw sa tibuok kalibotan.”—FOOD AND AGRICULTURE ORGANIZATION OF THE UNITED NATIONS, ITALYA.

◼ Niadtong Enero 2009, lima ka pirata ang nalumos human bayri ang ilang grupo ug $3,000,000 (U.S.) sa ilang gi-hijack nga oil tanker nga taga-Saudi. Ang lawas sa usa kanila nadagsa sa baybayon ug nakaplagan diha sa iyang bulsa ang $153,000 nga giputos ug plastik.—ASSOCIATED PRESS, SOMALIA.

Mga Batan-on Nagtuo nga ang Ilang mga Kaedad Pinatuyangan sa Gusto

Sumala sa mantalaang de Volkskrant, ang mga batan-on sa Netherlands “nagtuo nga ang ilang mga kaedad pinatuyangan sa gusto” ug “sobra ra ang pagdayeg kanila. Ang resulta, nawad-an silag konsiderasyon sa uban.” Sa mga batan-ong nag-edad ug 16 hangtod sa 24, “2 sa matag 3 kanila . . . nagtuo nga mas importante ang ilang mga katungod kay sa ilang mga obligasyon,” mireport ang mantalaan. Ang kasagarang gituohan mao nga “ang mga batan-on daghan kaayog gipangayo . . . ug talagsa rang maghunahuna kon unsay ilang ikatabang sa komunidad.”

Mga Bata Naglutog Paniudto

Buot sa usa ka prinsipal sa Japan nga taas-taas ang panahon nga mag-uban ang mga ginikanan ug ilang mga anak, mao nga giasayn ang mga estudyante sa paglutog kaugalingon nilang paniudto kas-a sa usa ka bulan. Karon daghan nang eskuylahan ang naghimo niana. “Dili man hinuon ang bata ang mangunay pagluto sa primero,” matod sa IHT Asahi Shimbun sa Japan. “Ang matag grado adunay tumong. Ang mga bata sa ubos nga mga grado magpatabang sa ilang pamilya sa pagplano kon unsay potaheng lutoon ug sa pagpamalit sa mga sangkap niana. . . . Samtang kadtong anaa sa taas-taas nga mga grado magplano sa paglutog sustansiyadong pagkaon.” Unsay resulta? “Ang mga eskuylahan mireport nga ang mga bata nakakat-on sa pagluto, wala kaayoy nausik nga pagkaon, ug ang mga pamilya dunay bag-ong butang nga kahisgotan,” miingon ang mantalaan. Ang mga bata “nakakat-on usab nga pabilhan ang ginahimo sa ilang ginikanan alang kanila.”

Pagpanghinlo sa South Pole

Sa miaging tuig, ang Rusong mga eksperto sa ekolohiya sa North ug South Pole nga naghimog programa sa pagpanghinlo, nakakolektag 360 ka toneladang basura sa Antartika. Ang basura nga gilabay duol sa mga pasilidad nga ilang gitrabahoan sa South Pole naglakip sa wala-magamit nga materyales sa pagpanukod, mga makinaryang guba, ug basiyong mga baril. “Sumala sa kalagdaan alang sa pagpanalipod sa ekolohiya sa South Pole, ang matag nasod maoy mohipos sa ilang kaugalingong basura,” mireport ang magasin sa Rusya nga Itogi. “Ang mga Hapon mao ang labing kugihan sa pagtuman sa ilang mga obligasyon.”