Unsa ang Bituon nga Nagtultol sa “Mga Mago” Ngadto Kang Jesus?

Sumala sa popular nga mga estorya sa Pasko, ang bituon maoy usa ka maayong tilimad-on gikan sa langit. Tinuod ba kana?

◼ Ang tagsulat sa Bibliya nga si Mateo miasoy nga dihay “mga mago” gikan sa Sidlakan nga gitultolan sa usa ka talagsaong bituon paingon sa dapit diin gianak si Jesus. (Mateo 2:1-12, Ang Biblia) Sumala sa popular nga mga estorya sa Pasko, ang bituon maoy usa ka maayong tilimad-on gikan sa langit. Usa ka reperensiya nag-ingon nga ang maong bituon gituyo sa Diyos nga makita sa tulo ka mago aron pasidunggan ug ipaila si Jesus ingong iyang hinigugmang Anak. Apil pa gani diha sa mga panaygon sa Pasko ang maong bituon. Unsa kining bituona?

Ang uban moingon nga kadto usa lamang ka natural nga panghitabo sa langit. Daghang eskolar moingon nga ang maong bituon maoy nagtungod nga mga planeta. Apan ang The New Bible Dictionary nag-ingon nga kon magtungod ang mga planeta, kana dili matawag ug bituon. Bisan pag magtungod ang mga planeta, ang matag usa duna gihapoy kaugalingong kahayag ug dili kana morag usa ka bituon kon tan-awon. Ang uban nagtuo usab nga ang maong kahayag naggikan sa usa ka dakong bituon nga mibuto o kaha usa ka kometa. Apan matikdi nga walay bisan usa niini nga mga panghitabo ang makahimo sa paggiya sa mga mago paingon sa usa ka partikular nga siyudad ug mohunong diha sa usa ka balay.

Ang maong bituon ba mitungha tungod sa natural nga panghitabo o kadto gituyo sa Diyos? Tagda kini nga mga impormasyon: Ang “mga mago” dili matawag nga mga maalamon ug dili usab sila mga hari. Sumala sa kadaghanang hubad sa maong termino sa modernong Iningles, sila maoy mga astrologo. Ang ilang ginahimo gidili diha sa Balaang Kasulatan. (Deuteronomio 18:10-12) Matikdi nga ang maong mga mago lamang o astrologo ang “nakakita” sa bituon. Kon kadto tinuod nga bituon, nan makita unta kadto sa ubang mga tawo. Apan bisan gani si Haring Herodes nangutana sa maong mga astrologo bahin sa bituon. Gigiyahan sa maong bituon ang mga astrologo paingon sa Jerusalem, ug dayon kang Herodes, nga nagtinguha sa pagpatay sa batang si Jesus, ang umaabot nga Mesiyas. Human niana, ang mga astrologo gigiyahan sa maong bituon pahabagatan ngadto sa Betlehem diin didto si Jesus. Tungod niana, nameligro ang kinabuhi ni Jesus.

Kining tanan nagpamatuod nga ang maong bituon lagmit gikan kang Satanas nga Yawa. Ang Bibliya naghisgot nga siya naggamit sa “bakak nga mga ilhanan ug mga tilimad-on.” (2 Tesalonica 2:9) Busa ang matuod nga mga Kristohanon nahibalo nga si Satanas makahimo sa pagpakita sa maong bituon ngadto lamang sa mga astrologo ug sa pagmaniobra niana sa paggiya kanila paingon sa Anak sa Diyos, nga buot niyang patyon. Siyempre, walay bisan kinsa nga molabaw pa sa gahom ni Jehova nga Diyos. Maong napakyas gayod ang plano sa Yawa sa pagpatay kang Jesus.

Apan matikdi nga ang Diyos nagpahibalo sa milagrosong paagi sa pagkahimugso ni Jesus. Kay sa gabii nga natawo si Jesus, dihay usa ka manulonda nga nagpakita sa mga magbalantay sa karnero aron ipahibalo nga natawo na ang “Manluluwas.” Gigiyahan sa manulonda ang mga magbalantay aron ilang maduaw si Jesus. Dayon miduyog ang daghan pang manulonda sa pagdayeg sa Diyos. (Lucas 2:8-14) Busa, ang pagkahimugso ni Jesus gipahibalo sa Diyos pinaagi sa maong mga manulonda ug dili pinaagi sa bituon.