Balanseha ang Imong Panglantaw sa Trabaho

NIINING panahon sa krisis, ang mga tawo nabalaka pag-ayo kon sa unsang paagi sila makabatog permanenteng trabaho nga makasuportar sa panginahanglan sa pamilya. Dili gayod kini sayon ilabina kay daghang trabahante ang nawad-ag trabaho. Kon usa ka kanila, kinahanglan ka gayong maningkamot aron makakitag panginabuhian.—Tan-awa ang mga kahon sa panid 8 ug 9.

Apan ang kinabuhi dili lang pulos trabaho. Si Glenn, usa ka amahang taga-Australia, miingon: “Ang tinuod, ang tawong hapit nang mamatay dili mangandoy nga mas daghan siyag panahong nagugol sa iyang trabaho.” Siyempre, kinahanglan kang mogahin ug panahon sa pagtrabaho aron mahimong mapuslanon ug malipayon ang imong kinabuhi. Apan gahini usab ug panahon ang imong pamilya, ang paglingawlingaw, ug ang imong relasyon sa Diyos. Sa unsang paagi nimo mabalanse ang imong panahon alang niining importanteng mga butang sa imong kinabuhi?

Panahon Alang sa Trabaho ug Alang sa Kaugalingon

Ang Bibliya nag-awhag kanato nga magkugi aron matagan-an ang atong pamilya. (Efeso 4:28) Apan kini nag-awhag usab kanato sa ‘pagkaon, pag-inom, ug sa pagpahimulos sa bunga sa atong kahago.’ (Ecclesiastes 3:13) Sa pagkatinuod, ang pagsigeg obertaym nga halos wala nay pahulay o paglingawlingaw makapawala sa kalipay. Moresulta usab kinig grabeng mga sakit.

Ang pagsigeg trabaho nga halos wala nay pahulay mahimong hinungdan sa sobrang katambok, pagkapalainom, sakit sa kasingkasing, aksidente sa trabahoan, pagkaadik sa droga, sobrang kabalaka, sobrang kakapoy, depresyon, ug uban pang mga sakit  tungod sa tensiyon. Mahimong moresulta usab kinig kamatayon. Ang usa ka report mibanabana nga sa Japan mga 10,000 ka tawo ang mamatay matag tuig tungod sa sobrang pagtrabaho. Sama ra kini ka daghan sa mamatay sa mga aksidente sa sakyanan sa maong nasod matag tuig. Ang kamatayon tungod sa sobrang pagtrabaho, nga gitawag ug karoshi, nagakahitabo usab sa laing mga nasod.

Matikdi nga ang Bibliya maalamong nagtambag: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Busa gikinahanglan gayod ang pagkabalanse. Ayaw pagpaulipon sa imong trabaho. Ampingi ang imong mental, pisikal, ug emosyonal nga kahimsog pinaagi sa paggahin ug panahon sa pagpahulay ug sa pagtagamtam sa bunga sa imong kahago.

“Dili ang pagtrabaho ang pangunang katuyoan sa atong kinabuhi kondili kita manarbaho aron kita mabuhi,” miingon si Andrew, nga may tulo ka anak. Ang pagbalanse sa imong panahon sa pagtrabaho, pagpahulay, ug paglingawlingaw makatabang kanimo aron matagan-an ang panginahanglan sa imong pamilya. Apan dili kini sayon ilabina kon daghan kag bayranan.

Balanseha ang Imong Panahon sa Trabaho ug sa Pamilya

Karon daghang pamilya ang puliki kaayo ug halos wala nay panahon sa usag usa. Ang usa ka inahan nga taga-England miingon: “Nahurot ang akong panahon sa akong trabaho ug diyutay na lang ang akong panahon para sa akong mga anak.” Sa usa ka surbi sa America, ang pangunang suliran sa 1 sa 5 ka tin-edyer mao nga “ang ilang ginikanan kulang ug panahon kanila.” Ang laing surbi didto nagreport nga kasagaran sa nagtrabahong mga magtiayon mogahin lamag 12 minutos sa pagpakig-estorya sa usag usa matag adlaw.

 Tungod sa tensiyon sa trabaho, daghang tawo ang nagsusi kon unsay mas importante sa ilang kinabuhi ug dayon naghimog mga kausaban. Si Timothy, nga dunay duha ka gagmayng bata, miingon: “Ako kanunayng mag-obertaym, ug ang akong asawa magtrabaho ma-Sabado ug Dominggo. Panagsa ra ming magkita. Sa ngadto-ngadto among gisusi ang among paagi sa pagkinabuhi ug mihimo kamig kausaban sa among trabaho. Karon kami mas malipayon.” Si Brian, nga manedyer sa usa ka tindahan, miingon: “Sa dihang nagmabdos ang akong asawa sa among ikaduhang anak, nangita kog laing trabaho nga makahatag kanakog dakodakong panahon sa akong pamilya. Hinuon, ang akong kita karon sa usa ka tuig mas ubos ug $10,000 kon itandi sa akong trabaho sa una, apan mas daghan na kog panahon sa akong pamilya!” Si Melina mihunong sa iyang trabaho sa dihang natawo ang iyang anak nga babaye. “Dili gayod sayon kon usa lang ang nanginabuhi sa pamilya,” siya miingon. “Apan nagtuo mi sa akong bana nga mas maayo kon ako ang mangunay pag-atiman kang Emily kay sa ipaatiman siya sa uban.”

Angay usab natong hinumdoman nga daghang pamilya ang nangamas pag-ayo aron matagan-an ang ilang binulan nga galastohan. Ang ubang bana o asawa nga nagtrabaho duna pa gayoy sideline aron lang masuportahan ang ilang pangunang mga panginahanglan. Duna usay mga kahimtang nga ang magtiayon maoy nagtrabaho, mao nga ibilin nila sa mga apohan ang ilang mga anak o mosuweldo silag laing tawo nga mobantay.

Lagmit makahunahuna ka pag mga paagi aron mabalanse ang imong panahon sa trabaho ug sa mga obligasyon sa pamilya. Angay nimo kining hinumdoman: Ayaw ibaylo ang imong pamilya sa imong trabaho.

Kon imong balansehon ang imong panahon sa pagtrabaho, sa paglingawlingaw, ug sa imong pamilya, ikaw magmalipayon gayod. Atong hisgotan sa mosunod nga artikulo ang mas hinungdanong butang nga makatabang aron mahimong simple ug balanse ang atong kinabuhi.

[Blurb sa panid 5]

Ayaw pagpaulipon sa imong trabaho

[Blurb sa panid 5]

“Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.”—Ecclesiastes 4:6

[Blurb sa panid 6]

Ayaw ibaylo ang imong pamilya sa imong trabaho

[Kahon/Hulagway sa panid 6]

KUWARTA O LINGAWLINGAW?

Ang pipila ka eskolar sa ika-20ng siglo nagtuo nga tungod sa pag-uswag sa teknolohiya, dili na unya hago ug dugay ang trabaho ug “mas daghan nag panahon sa paglingawlingaw.”

Sa unang bahin sa katuigan sa 1930, si Propesor Julian Huxley miingon nga sa umaabot ang trabaho duha na lang ka adlaw matag semana. Ang negosyanteng si Walter Gifford mipahayag nga tungod sa teknolohiya mahimo na “sa tawo ang tanan niyang gusto . . . , may panahon na siya sa pagpauswag sa iyang pagkinabuhi ug sa pagpamalandong sa iyang relasyon sa Diyos.”

Apan matagbaw ba ang materyal nga mga panginahanglan sa tawo? Ang sosyologo nga si Henry Fairchild mapasigarbohong miingon nga sulod lamang sa mga upat ka oras nga pagtrabaho matag adlaw, ang mga pabrika makapatunghag mas daghang produkto kay sa gikinahanglan sa tawo.

Unsa ka tinuod kini nga mga komento? Buweno, kusog kaayo ang pag-uswag sa ekonomiya sa ika-20 ug ika-21ng siglo ug dili na kinahanglang motrabahog daghang oras. Apan unsay nahitabo? Si John de Graaf misulat: “Imbes daghan nag libreng panahon ang mga tawo, gigamit na hinuon nila kana sa pagpangitag dugang kuwarta ug mga kabtangan. Sa ato pa, atong gipalabi ang pagpangitag kuwarta kay sa paghatag ug panahon alang sa kaugalingon.”