Himoang Simple ug Balanse ang Imong Kinabuhi

ANG simple ug balanseng kinabuhi makapalipay gayod. Apan unsa ang nalangkit niana? Buweno, angay una nimong susihon kon unsay labing hinungdanon alang kanimo. Sa unsang paagi nimo kana himoon?

Pangutan-a ang imong kaugalingon: ‘Unsa nay akong mga nalampos? Unsa pa ang wala?’ Isulat sa ubos ang imong pangunang mga tumong:

1. ․․․․․

2. ․․․․․

3. ․․․․․

Daghan karon ang naghurot sa ilang panahon sa pagpangitag kuwarta kay para nila mubo lang ang kinabuhi. Sama rag sila miingon: “Mangaon kita ug manginom, kay ugma kita mangamatay.” (1 Corinto 15:32) Nagtuo sila nga ang tawo nabuhi aron lang motrabaho ug mapalit ang iyang gusto. Apan lahi ang panglantaw sa Bibliya.

Sa usa sa mga ilustrasyon ni Jesus, siya miasoy bahin sa usa ka tawong nagtigom ug daghang bahandi ug una pa niya kini mapahimusli siya namatay. “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.” (Lucas 12:16-21) Sayop ba ang gihimo sa maong tawo sa pagpaningkamot nga matagan-an ang iyang mga panginahanglan? Dili man hinuon. Ugaling lang, iyang gihurot ang iyang panahon sa pagpangitag bahandi ug wala na siya maggahin ug panahon alang sa Diyos. Tungod niana, ang tanan niyang hinagoan wala niya mapahimusli. Makapasubo gayod ang nahitabo kaniya!—Ecclesiastes 2:17-21; Mateo 16:26.

Sa laing bahin, si Jesus nagdasig kanato sa paghago alang sa mga butang nga makahatag kanatog dumalayong kaayohan. Siya miawhag: “Hagoi ninyo, dili ang pagkaon nga mahanaw, kondili ang pagkaon nga magpabilin alang sa kinabuhing walay kataposan.” (Juan 6:27) Una pa niana siya miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Pagkatalagsaon nga ganti!

Sa Unsang Paagi Mawala ang Imong Kabalaka?

Si Jesus nahibalo nga normal lang sa tawo nga mabalaka sa iyang materyal nga panginahanglan. Busa iyang giawhag ang iyang mga tinun-an: “Hunong na sa pagpangitag unsay inyong makaon ug unsay inyong mainom, ug hunong na sa  pagkamabalak-on; kay kining tanan mao ang mga butang nga maikagong ginapangagpas sa mga nasod sa kalibotan, apan ang inyong Amahan nahibalo nga nagkinahanglan kamo niining mga butanga. Bisan pa niana, pangitaa nga mapinadayonon ang iyang gingharian, ug kining mga butanga igadugang kaninyo.”—Lucas 12:29-31.

Daghang Kristohanon ang nagpasimple sa ilang kinabuhi agig pagpadapat sa maong makapadasig nga tambag ni Jesus. Si Juliet, nga taga-Malaysia, miingon: “Gikapoy ko ug wala na koy kalipay sa akong trabaho. Busa nag-ampo mi sa akong bana nga tabangan mi ni Jehova nga pasimplehon ang among kinabuhi. Ug gitubag dayon kana. Wala pay usa ka bulan nakakita kog partaym nga trabaho, ang pagtudlo sa mga bata nga adunay depekto sa panglawas.” Si Steve, nga taga-Australia ug kontraktor sa pagpanggamag atop, nag-usab sa iyang eskedyul aron mas daghan siyag panahon uban sa iyang pamilya  diha sa mga buluhaton para sa Diyos. Ang iyang asawa nga si Maureen miingon: “Mas malipayon na si Steve karon, ug malipayon na usab ko ug ang mga bata. Kon pasimplehon nimo ang imong kinabuhi, ang imong pamilya magmalipayon.”

Apan, kon nawad-an kag trabaho ug nalisdan sa pagpangitag kapuy-an, nagkinahanglan kag hugot nga pagtuo aron imong mapadapat ang tambag ni Jesus. Apan, kon unahon nimo ang Diyos ug mosalig ka kaniya, ikaw makabatog simple ug balanseng kinabuhi. Makatabang kana kanimo nga mabatonan ang “tinuod nga kinabuhi”—kinabuhing walay kataposan sa matarong ug bag-ong kalibotan sa Diyos, diin ang trabaho makapalipay na ug makapatagbaw.—1 Timoteo 6:17-19; Isaias 65:21-23.

Buot ka bang makakat-on ug dugang pa bahin sa “tinuod nga kinabuhi” nga gisaad sa Bibliya? Kon mao, kontaka ang mga Saksi ni Jehova sa inyong lugar, o pagsulat sa nahiangayng adres nga anaa sa panid 5 niining magasina.

[Blurb sa panid 9]

Sa bag-ong kalibotan sa Diyos, ang trabaho makapalipay na ug makapatagbaw

[Kahon sa panid 8]

NANGITA KA BAG TRABAHO?

Aniay pipila ka sugyot nga mahimong praktikal sa imong dapit panahon sa krisis:

● Pagbantay sa balay (kon ang tagbalay motrabaho sa laing lugar o mobakasyon ug gusto nilang dunay magbantay sa ilang balay)

● Pagpanglimpiyo: balay; tindahan; opisina; mga apartment ug balay human sa konstruksiyon o human sa sunog, human mamalhin ang namuyo; bentana (balay o opisina)

● Pagpang-ayo: bisikleta, tanang matang sa appliances (dunay mga libro nga motudlo kon unsaon kana paghimo)

● Trabahong ginagmay: pagtaod ug bungbong; pagpanday ug mga kabinet, pultahan, beranda; pagpamintal, pagpangoral, pagtaod ug atop

● Pag-uma: pagpananom, pagpamupo ug mga prutas, pagpangani

● Pag-landscape ug pag-atiman sa mga tanom: sulod sa mga opisina, bangko, mga bilding

● Pag-atiman sa propiedad: dyanitor, tigbantay (usahay libre ang puy-anan)

● Pagtaod ug paglimpiyo sa karpet ug baldosa o wooden tiles

● Paghatod ug mga mantalaan ug pag-apod-apod ug mga paanunsiyo, ug mga bill

● Pagbalhin o pagtipig ug mga gamit

● Pagpatahom o pag-atiman sa lagwerta, pagpamul-ong ug mga sanga sa kahoy, pagpanggabas ug kahoy

● Pagdrayb ug school bus

● Potograper (sa studio o mga okasyon)

● Pagbaligyag mga paon sa panagat

● Pagpakigkambiyo ug serbisyo: pag-ayog sakyanan baylo sa pag-ayog appliances, o pagtahi baylo sa pag-ayog gripo

Alang sa dugang impormasyon tan-awa ang Pagmata! nga Marso 8, 1996, panid 3-11.

[Kahon/Hulagway sa panid 9]

POSIBLENG PANGABUHIAN DIHA SA BALAY

Panid-i ang mga panginahanglan sa inyong lugar. Pangutan-a ang imong mga silingan. Pangitag mga paagi.

● Pagbantay ug bata

● Pagbaligyag mga pabugnaw, utanon o bulak gikan sa imong garden

● Pagpanahi, pagpanursi

● Paggamag pinirasong mga produkto para sa mga kompaniya

● Paglutog pan, keyk ug ubang pagkaon

● Paggamag kobrekama, paggansilyo, pag-knitting, paggamag macramé, paggamag kulonon nga kasangkapan; ug uban pa

● Upholstery

● Pag-atiman sa mga rekord sa negosyo, pagmakenilya, mga trabaho nga gigamitan ug kompiyuter

● Pagtubag sa tawag sa telepono alang sa laing tawo

● Pag-areglar sa buhok

● Pagpaabang

● Pagbutang ug adres ug sulat sa mga sobre alang sa usa ka kompaniya

● Paglimpiyog sakyanan (dad-on sa kustomer ang iyang sakyanan sa imong balay)

● Pag-areglar ug pag-ehersisyo sa mga binuhi

● Pag-ayog mga kandado ug paghimog yawi

Matikdi: Ang mga paanunsiyo alang sa kadaghanan niini nga mga serbisyo mahimong ipang-apod-apod o ibutang diha sa notice board sa dagkong tindahan.