“Hunong na sa Pagkabalaka”

“Ang among kuwarta sa bangko nahurot apil ang among tinigom para sa among mga anak. Pila ka bulan mi nga walay kita.”

● Nagdumala kog usa ka eskuylahan sa usa ka baryo sa India, ug maayo ra ang dagan niini. Dihay higayon nga miabot ug mga 500 ang among estudyante. Usa ka adlaw niana, ang usa ka iladong eskuylahan sa siyudad nagpadalag mga bus sa among lugar nga kasakyan sa mga estudyante nga gustong magpaenrol sa ilang eskuylahan. Tungod niana dili na malisdan ang mga estudyante sa pagpaenrol didto. Siyempre, daghan sa among mga estudyante ang namalhin didto. Gani, halos 60 na lang ang nabilin sa among mga 500 ka estudyante. Ang nakapait pa gyod kay nianang panahona dihay empleyado sa among eskuylahan nga nakautang kanako ug wala makabayad. Naproblema ko kay daghang empleyado ang wala pa nako masuweldohi.

Giestoryahan namo sa akong pamilya ang among problema. Nagkasabot mi nga magsakripisyo agig pagsunod sa tambag ni Jesus nga himoong ‘yano ang among mata.’ Nagpasabot kana nga among paigoon ang among kita. (Mateo 6:22, 25) May mga higayon nga dili namo gamiton ang among sakyanan aron makaekonomiyag gasolina ug dili kaayo mi makagasto sa pagmentinar niini. Gabii na kaayo mi mamalengke kay nianang mga orasa barato na ang presyo. Gipasimple usab namo ang among pagkaon.

Mga Saksi ni Jehova mi, ug hinungdanon alang namo ang pagtambong sa Kristohanong mga tigom uban sa among mga igsoon sa pagtuo. (Hebreohanon 10:25) Bisan pa sa among kalisod, naningkamot gyod mi nga makatambong sa mga tigom ug asembliya—bisan pag mobiyahe mig layo. Sa dihang kami magsangyaw, adtoon namo ang lagyong mga lugar aron tudloan ang mga tawo bahin sa Bibliya. Imbes magkotse, magmotor na lang mi, bisan tuod ug duha ra ang makasakay niana.

Tinuod dili sayon ang among kahimtang, apan kanunay gihapon ming mosangyaw. Gani, ang akong asawa ug anak nga babaye migugol ug mas daghang panahon sa pagtudlo sa uban bahin sa Bibliya. Usahay mobaktas silag unom ngadto sa walo ka kilometro sa pagpaingon pa lang sa ilang gidumalahag pagtuon sa Bibliya. Kami sa akong anak nga lalaki naningkamot usab nga dugangan ang among panahon sa pagtudlo sa uban bahin sa Bibliya.

Karon miarang-arang na ang among kahimtang. Among nakat-onan sa among nasinatian nga dili angayng hatagag dakong importansiya ang materyal nga mga butang. Nakakat-on usab kami nga dili ra kaayo mabalaka sa mga butang nga dili namo kontrolado. Nadasig gayod kami sa giingon sa Salmo 55:22 nga: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” Among napamatud-an nga tinuod gayod ang maong saad panahon sa among kalisod!—Tinampo.