Ikaw ba Gikapoy ug Tensiyonado?

SA TIBUOK kalibotan, daghan ang nalisdan sa pagbalanse sa trabaho ug pamilya. Ang usa ka reperensiya nag-ingon nga ‘tungod sa globalisasyon, modernong teknolohiya, ug mga trabahong makahurot sa panahon, ang mga tawo magsigeg obertaym o magdalag trabaho sa balay.’ Tungod niini, mokita silag dako, apan aduna kanay makadaot nga epekto. Ang usa ka awtor miingon: “Milyon-milyon kanato ang nahago ug nabug-atan pag-ayo tungod sa sobrang trabaho ug puliki nga eskedyul. Kita gikapoy ug tensiyonado.”

Ang lain pang hinungdan sa tensiyon mao ang pagkahagsa sa ekonomiya. Sa tibuok kalibotan, daghang nag-opisina o mga trabahador ang nawad-an sa ilang trabaho ug pinuy-anan. Tingali sila nangandoy nga makakitag trabaho.

Atong hisgotan kon unsa ka daghan ang naapektohan niini nga mga problema:

▶ Sa Europe, 6 sa 10 ka trabahante gikapoy ug tensiyonado sa trabaho.

▶ Sa America, 1 sa 3 ka empleyado kanunayng gikapoy tungod sa sobrang trabaho.

▶ Sa Canada, kapig 2 sa matag 3 ka tawo nalisdan pagbalanse sa ilang panahon sa pamilya ug sa trabaho.

▶ Gibanabana nga kapin sa 600 milyones ka trabahante, o 22 porsiyento sa mga trabahante sa tibuok kalibotan, ang mogugol ug kapin sa 48 ka oras matag semana diha sa ilang trabaho.

Gipakita niini nga surbi nga daghan kaayo ang apektado sa sobrang pagtrabaho. Ang pipila ka panukiduki nagpakita nga ang taas ug nag-usab-usab nga oras sa pagtrabaho moresulta sa mga sakit, dili maayong relasyon, pinasagdan nga mga anak, panagbulag, ug diborsiyo.

Komosta ka? Puliki ka ba kaayo sa imong trabaho? O usa ka sa milyon-milyon nga walay trabaho? Nangandoy ka ba nga mahimong balanse ang imong panahon sa trabaho ug pamilya? Kon mao, sa unsang paagi nimo kana mahimo?

[Kahon/Hulagway sa panid 3]

Nagpaabot Ang Mga Trabaho Sa balay

Usa ka nagtrabahong inahan mikomento: “Inig-uli nako gikan sa trabaho, ako pay magluto, manglimpyo, manglaba, mokuha sa mga bata, motabang sa ilang homwork, mohimasa ug mopakatulog kanila. Mora na kog mamatay sa kakapoy.” Sa gibanabanang 1.2 ka bilyong nagtrabahong mga inahan sa tibuok kalibotan, milyon-milyon kanila ang sama nianag kahimtang. Ingon usab niana ang kahimtang sa daghang lalaki nga nagtrabaho. Apan ang mga surbi nagpakita nga ang mga lalaki sagad dili gustong mohimo sa mga buluhaton sa balay. Ang mga babaye maoy kasagarang mohimo niana, nangempleyo man sila o wala.