Mga Batan-on Nangutana

Nganong Dili man Ganahan Nako ang mga Lalaki?

Nahibalo siya nga popular ko kay ako siyang gisultihan nga daghan ang nakagusto nako. Mikatawa siya sa dihang miingon ko nga layo ra kon itandi nako ang akong mga amiga. Nahibalo siya nga brayt ko kay gikoreksiyonan nako siya sa uban niyang gipanulti. Kanus-a kaha ko niya hagaron nga magdeyt?

Guwapa siya, apan wala ko kaangay sa iyang kinaiya! Halos siya tanan ang mobangkag estorya. Ug kon makaestorya man galing ko, iya dayon kong supohon! Unsa kahay akong himoon aron makaikyas kaniya?

NABALAKA ka ba nga walay lalaki nga makagusto nimo? Wala ka mag-inusara, bisan gani ang mga hitsurahan mobati usab niana! Usa ka pananglitan mao si Joanne. Siya guwapa, brayt, ug maayong manulti. Apan siya miingon: “Morag wala gayoy nakagusto nako. Duna untay pipila nga nagpakitag interes ug ganahan na sab unta ko, apan ang problema kay sa ngadto-ngadto naawop ang ilang pagbati nako!”

Unsa kahay magustohan sa mga lalaki sa usa ka babaye? Unsa usab ang dili nila ganahan? Unsay imong mahimo aron imong makuha ang atensiyon sa usa ka buotang lalaki, nga dili ra usab moubos ang imong dignidad?

Kon Unsay Himoon

● Hibaloa kon unsay naa sa imong hunahuna ug kasingkasing. Lagmit magsugod ka nag kaibog sa mga lalaki samtang ikaw nagkadalaga. Ug lagmit daghan kag magustohan. Normal lamang kana. Apan kon magpadala ka sa imong gibati ngadto sa lalaki nga unang magpapitik sa imong kasingkasing, nan, basin mameligro ang imong emosyonal ug espirituwal nga pag-uswag. Gikinahanglan ang panahon aron ka mohamtong, makahunahunag maayo bahin sa importanteng mga butang sa kinabuhi, ug makab-ot ang uban nimong mga tumong.—Roma 12:2; 1 Corinto 7:36; Colosas 3:9, 10.

Tinuod, daghang lalaki ang makagusto sa mga babaye nga batan-on pa ug wala pay saktong pangisip. Apan ang giapas sa maong mga lalaki mao ra ang panagway sa babaye ug dili ang iyang pagkatawo. Ang usa ka hamtong  nga lalaki mangitag babaye nga ang kinaiya mobagay sa iyang personalidad.—Mateo 19:6.

Kon unsay giingon sa mga lalaki: “Makagusto kog babaye nga may kaugalingong baroganan ug nahibalo sa kon unsay iyang gusto.”—James.

“Ganahan kog babaye nga mosulti sa iyang opinyon sa matinahorong paagi ug dili kanang magsige lag uyon-uyon. Bisag guwapa pa siya, lainan ko kon ang mga butang ra nga gusto nakong madunggan ang iyang isulti. Dili ko ganahag ingon niana nga babaye!”—Darren.

“Tinuod, makaangay kog guwapang mga babaye. Apan mahimong mohupas dayon ang akong pagbati kon mamatikdan nako nga ang babaye walay tumong sa kinabuhi. Sa laing bahin, makaangay gayod ko kon siya may mga tumong, ilabina kon nakab-ot na niya ang pipila niana.”—Damien.

● Tun-i ang pagtahod sa uban. Sama ra nga nangandoy ka nga higugmaon, buot usab sa mga lalaki nga sila tahoron. Mao kanay rason nga ang Bibliya nagmaymay sa bana nga higugmaon ang iyang asawa ug nga ang asawa kinahanglang magpakitag “halawom nga pagtahod” sa iyang bana. (Efeso 5:33) Uyon niining maalamong tambag, kapig 60 porsiyento sa gisurbi nga mga batan-ong lalaki miingon nga mas importante para nila ang pagtahod kay sa gugma. Ug kapin sa 70 porsiyento sa hingkod nga mga lalaki nga gisurbi ang sama niana ug opinyon.

Ang pagpakitag pagtahod wala magpasabot nga dili ka na makasulti sa imong opinyon. (Genesis 21:10-12) Apan ang imong paagi sa pagpahayag sa imong opinyon mahimong makapalong o kaha makahaling sa pagbati sa usa ka lalaki. Kon pirme nimong supohon o koreksiyonan ang iyang isulti, mobati siya nga wala kay tahod niya. Apan kon imong tahoron ang iyang opinyon ug dayegon siya sa nindot niyang mga ideya, lagmit pabilhan usab niya ang imong opinyon. Mamatikdan usab sa lalaki kon may pagtahod ka sa mga membro sa imong pamilya ug sa uban. a

Kon unsay giingon sa mga lalaki: “Gusto sa mga lalaki nga paminawan sila sa ilang opinyon, ilabina kon ang maminaw kanila mao ang babaye nga ilang nagustohan.”—Anthony.

“Para nako, mas importante ang pagtahod kay sa gugma bisan sa sinugdanan pa lang sa relasyon.”—Adrian.

“Kon ang babaye makamaong motahod nako, nagpasabot kana nga nahigugma siya nako.”—Mark

● Pagsininag desente ug magmahinlo. Ang imong sinina ug pamostura magpadayag gayod sa imong pagbati ug pamatasan. Bisag wala pa kay nabungat nga pulong ngadto sa usa ka lalaki, ang imong sininaan ug pamostura daghan na kaayog gisulti ngadto kaniya. Kon ang imong sinina desente, hapsay, ug hinlo, makahatag kanag maayong impresyon kanimo. (1 Timoteo 2:9) Apan ang sinina nga makapatental o gituyo nga lago tan-awon aron makakuhag atensiyon, makadaot na hinuon sa impresyon sa mga lalaki kanimo.

Kon unsay giingon sa mga lalaki: “Ang sininaan sa usa ka babaye nagpadayag sa iyang panglantaw bahin sa kinabuhi. Kon magsul-ob siyag makapatental o lago tan-awon nga mga sinina, nagpakita kana nga gusto niyag atensiyon.”—Adrian.

“Ganahan kog babaye nga maayong moatiman sa iyang buhok, humot, ug lumog tingog. Naa koy nagustohan nga guwapa, galing lang di makamaong manghinlo sa lawas. Maoy hinungdan nga wala na nako siya magustohi.”—Ryan.

“Moangay kaayo kog babaye nga dili bagag mek-ap ug dili magsul-ob ug mga sinina nga mohulma sa lawas.”—Ethan.

“Siyempre, ang babaye nga magsul-ob ug makatental nga sinina makakuhag atensiyon sa  primero. Apan dili ingon niana nga babaye ang gusto nakong matrato.”—Nicholas.

Kon Unsay Dili Himoon

● Ayaw pagbirigbirig. Dali kaayong makuha sa mga babaye ang atensiyon sa mga lalaki. Kini nga abilidad sa mga babaye mahimo nilang gamiton sa maayo o sa daotang paagi. (Genesis 29:17, 18; Proverbio 7:6-23) Kon imo kanang himoon sa tanang lalaki nga imong makaila, magtuo sila nga kiat ka nga pagkababaye.

Kon unsay giingon sa mga lalaki: “Makatapad ka lang gani ug guwapa ug magsaghiray ang inyong abaga mora ka nag makoryentehan. Busa nagtuo ko nga kiat ang babaye nga magsigeg hapak-hapak sa lalaki sa dihang makig-estorya.”—Nicholas.

“Para nako, kiat ang babaye nga magsigeg hapak-hapak sa braso sa tanang lalaki nga iyang ikaestorya o magpa-cute sa tanang lalaki nga moagi. Dili ko ganahag ingon niana nga babaye.”—José.

“Sa akong tan-aw, kiat ang babaye nga magsigeg hapak-hapak sa mga lalaki ug dayon kadto rang motubay ang iyang tagdon.”—Ethan.

● Ayaw pagdahom ug sobra. Kon ang managtrato magminyo, ang Bibliya nag-ingon nga sila mahimo nang “usa ka unod.” (Genesis 2:24) Sa dihang sila minyo na, ang bana ug asawa dili na sama ka gawasnon niadtong sila ulitawo ug dalaga pa; duna na gayod silay obligasyon sa usag usa. (1 Corinto 7:32-34) Apan kon managhigala pa lang mo, wala pa mo niana nga obligasyon. Busa, ayaw kana iinsistir kay basin madaot ang inyong panaghigalaay. b

Kon unsay giingon sa mga lalaki: “Dili ko ganahag babaye nga morag bantayan niya kanunay ang tanan nakong himoon, ug morag wala na siyay laing gibuhat kondili mag-apong nako.”—Darren.

“Kon ang usa ka babaye nga bag-o pa nakong mailaila magsigeg text nako ug mangutana kon kinsa ang mga babaye nga akong kauban, senyales kana nga siya selosa.”—Ryan.

“Dili ko moangay kon ang babaye dili mosugot nga makig-uban ko sa akong mga amigo ug masuko kon dili nako siya kanunayng ikuyog.”—Adrian.

Pabilhi ang Imong Kaugalingon

Tingali may nailhan kang mga babaye nga himoon ang tanan aron lang maangayan sa lalaki. Ang uban mosugot na lang bisag wala kaayo sila makagusto aron lang makatrato—o kaha makakitag pamanhonon. Apan, maayong hinumdoman ang prinsipyo nga “bisan unsay ginapugas sa usa ka tawo, kini usab iyang anihon.” (Galacia 6:7-9) Kon dili nimo pabilhan ang imong kaugalingon ug ang imong mga prinsipyo, lagmit ang lalaki nga imong makita ingon usab niana ug tinamdan nganha kanimo.

Ang tinuod, dili tanang lalaki makagusto kanimo—ug dili ka angayng mabalaka! Apan kon imong atimanon ang imong panagway ug pauswagon ang imong kinaiya, ikaw “dakog bili sa mga mata sa Diyos”—ug maangayan ka sa lalaki nga para gayod kanimo.—1 Pedro 3:4.

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype

[Mga footnote]

ANGAYNG PALANDONGON

● Sa unsang paagi nimo ikapakita ang imong pagtahod sa opinyon ug pagbati sa usa ka lalaki?

● Unsaon nimo pagpakita nga ikaw nagpabili sa imong kaugalingon?

[Hulagway sa panid 27]

Ang gugma ug pagtahod maoy samag duha ka ligid sa bisikleta—ang duha hinungdanon gayod