Ang Hunahuna sa Bibliya

Makigtrato sa Tuyo nga Magminyo

Ang managtrato nga si Julie ug Lee determinado gayod nga magpabiling hinlo sa moral. a Apan usa ka gabii niana nga sila rang duha, nanginit ang ilang pagbati. Maayo na lang kay nakaamgo sila una sila mahinayak sa pagpakasala.

ANG matuod nga pagsimba naglangkit ug labaw pa kay sa pagtambong sa relihiyosong mga sermon matag semana. Kini angayng mag-apektar sa panggawi ug moralidad sa tawo matag adlaw. Si Jesu-Kristo miingon nga kadto lamang “nagabuhat sa kabubut-on” sa Diyos maoy Iyang pagauyonan. (Mateo 7:21) Aron mapahimut-an ang Diyos, kinahanglang huptan natong hinlo ang atong relasyon sa kaatbang nga sekso ug makigtrato lang sa tuyo nga magminyo.

Sa unsang paagi imong mahuptang hinlo ang inyong relasyon atubangan sa Diyos, ilabina kay kusog kaayo ang sulog sa tentasyon sa paghimog imoralidad? Una, ilha nga ang mga sukdanan sa Diyos maoy alang sa atong kaayohan. Ikaduha, ilha ang imong mga kahuyangan. Ikatulo, pagtakdag mga limitasyon. Ug ikaupat, ilakip ang Diyos diha sa inyong relasyon. Atong hisgotan kini nga mga punto.

Mga Sukdanan Alang sa Atong Kaayohan

Sa Isaias 48:17, 18 atong mabasa: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”

Oo, ang mga balaod ug mga prinsipyo nga nasulat diha sa inspiradong Pulong sa Diyos, ang Balaang Bibliya, maoy alang sa atong kaayohan. (2 Timoteo 3:16, 17) Nagpakita kana nga ang atong Maglalalang interesado gayod kanato ug buot niya nga kita magmalipayon ug magmalamposon sa atong kinabuhi. (Salmo 19:7-10) Ingon ba usab niana ang imong pagbati? Kon mao, ikaw tinuod nga maalamon.

Ilha ang Imong mga Kahuyangan

Si Jehova samag usa ka tinuod nga higala, kay siya prangka nga mosulti kanato bahin sa atong mga kahuyangan. Pananglitan, ang iyang Pulong nagpasidaan kanato nga “ang kasingkasing labaw nga malimbongon kay sa bisan unsa pa ug desperado. Kinsa ang makahibalo niini?” (Jeremias 17:9) Ang Bibliya miingon usab: “Siya nga nagasalig sa iyang kaugalingong kasingkasing maoy hungog, apan siya nga nagalakaw sa kaalam mao ang makaikyas.”—Proverbio 28:26.

Unsay ilhanan nga ang managtrato nagsalig sa ilang kaugalingong kasingkasing? Ang usa ka timailhan mao nga kon sila dili maglikay sa mga situwasyon nga sila rang duha diin kusog kaayo ang tentasyon, sama sa kahimtang sa managtratong gihisgotan sa sinugdanan. Ang laing ilhanan maoy kon ilang lapason ang maalamong tambag sa ilang diyosnong mga ginikanan. Nahibalo ang mga ginikanan nga nag-uros-uros ang seksuwal nga pagbati sa mga batan-on ug kinahanglan gayod kanang kontrolahon.

Busa, ang mga batan-on nga ‘naglakaw diha sa diyosnong kaalam’ maminaw gayod sa ilang ginikanan. Oo, gihigugma gayod sa ginikanan ang ilang mga anak nga tungod niana sila andam motambag kanila bisan pag usahay dili makaangay niana ang mga anak. Ang imong langitnong Amahan, si Jehova nga Diyos, ilabinang nahigugma kanimo, ug siya nagtambag nga ‘wagtangon sa imong kasingkasing ang kaguol,  ug ipahilayo ang katalagman sa imong unod.’ (Ecclesiastes 11:9, 10) Mapadapat nimo kini kon imong suklan ang daotang mga pangibog.

Pagtakdag mga Limitasyon

“Kadtong nagkonsultahanay adunay kaalam.” (Proverbio 13:10) Sa sinugdanan pa lang sa relasyon, ang maalamong managtrato magpadapat niana pinaagi sa pagtakdag mga limitasyon sa pagpasundayag sa ilang gugma ug ila gayod kanang sundon. Kon kompiyansa ka kaayo, sama rag nagdrayb kag sakyanan nga wala mag-amping. Ulahi na ang pag-amping kon naaksidente ka na!

“Maalamon ang tawo nga nakakita sa katalagman ug nagtago sa iyang kaugalingon,” miingon ang Bibliya. Apan “ang walay kasinatian wala gayod maglikay niana ug siya magaantos sa silot.” (Proverbio 22:3; The New English Bible) Malikayan sa managtrato ang problema kon sila magpakuyog sa usa ka hamtong nga tsaperon o kaha mokuyog sa grupo sa dihang magdeyt. Kon dili mag-amping sa dihang magdeyt, mahimong mahasol ang ilang konsensiya, mawala ang ilang pagtahod sa kaugalingon o sa ilang trato, ug maulawan ang pamilya ug ang uban pa. Busa magmaalamon ug magmadeterminado sa pagpadapat sa mga sukdanan sa Bibliya!

Himoa si Jehova nga ‘Ikatulong Bakukon’

Ang kaminyoon nahisamag tulo ka bakukon nga pisi, ug ang Diyos mao ang pangunang bakukon. “Ang tulo ka bakukon nga pisi dili daling mabugto,” miingon ang Ecclesiastes 4:12. Kini nga prinsipyo ikapadapat usab sa managtrato. Kon kamong duha maningkamot nga makigsuod sa Diyos, siya magapanalangin sa inyong relasyon. Ang Salmo 1:1-3 nag-ingon: “Malipayon ang tawo nga wala magalakaw sa tambag sa mga daotan . . . Hinunoa ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii . . . , ug ang tanan nga ginabuhat niya magmalamposon.”

Oo, magmalamposon lamang ang kinabuhi, maingon man ang panagtratohay ug kaminyoon, kon atong ipadapat ang mga prinsipyo ni Jehova. Siya ang atong Maglalalang; ang romantikong pagbati ug ang kaminyoon maoy bililhong mga gasa gikan kaniya. Busa angay nato kanang pabilhan.—Santiago 1:17.

[Footnote]

NAKAPAMALANDONG KA BA?

● Sa unsang paagi kita nahibalo nga ang Diyos interesado gayod sa atong kaayohan?—Isaias 48:17, 18.

● Unsay angay natong ilhon bahin sa atong kaugalingon?—Jeremias 17:9.

● Unsay sekreto sa malamposong panagtratohay ug kaminyoon?—Salmo 1:1-3.

[Hulagway sa panid 13]

Sa sinugdanan pa lang sa relasyon, ang maalamong managtrato magsabot nga ilang ipadapat ang tambag sa Bibliya sa pagtakdag mga limitasyon sa pagpasundayag sa ilang gugma ug ilang paningkamotan nga sundon kana