Opisyal sa SS Kaniadto, Karon Alagad na sa Matuod nga Diyos

Sumala sa giasoy ni Gottlieb Bernhardt

Usa ako ka opisyal sa SS sa Germany, ang grupo sa banggiitang mga guwardiya ni Hitler. Ako giasayn sa palasyo sa Wewelsburg. Niadtong Abril 1945, gimandoan ako nga patyon ang mga piniriso sa kasikbit nga kampo. Sila mao ang mga Saksi ni Jehova. Dili gayod puwedeng supakon ang sugo sa SS ug mora kog naipit sa kahimtang. Pasuginla ko kon ngano.

AKO natawo niadtong 1922 sa usa ka baryo duol sa Rhine River sa Germany. Bisan pag daghag debotadong Katoliko sa among lugar, ang among pamilya membro sa Pietista, usa ka sekta sa Protestante nga nagsugod niadtong ika-17ng siglo. Sa 1933, sa dihang ako nag-edad ug 11, si Hitler nahimong lider sa Germany. Pipila ka tuig sa ulahi, kay maayo ako sa klase ug sa esports, gipaeskuyla ako duol sa Marienburg, (Malbork na karon) sa Poland. Sa maong eskuylahan, nga gatosan ka kilometro ang distansiya gikan sa among balay, nakat-onan nako ang mga ideolohiya sa Nazi. Ang mga estudyante gitudloan sa pagrespeto, pagkakugihan, pagkamaunongon, pagkamasinugtanon, pagkaresponsable, ug sa pagtahod sa kultura sa Germany.

Ang Gubat sa Kalibotan II ug ang SS

Sa dihang mibuto ang ikaduhang gubat sa kalibotan niadtong 1939, mientra ko sa Leibstandarte SS Adolf Hitler, usa ka grupo sa banggiitang mga sundalo nga gidumala mismo ni Hitler. Gikan sa among grupo ang himoong bodyguard sa mga opisyales sa gobyerno, ug kami usab ang gamiton sa espesyal nga mga misyon. Naasayn ko sa Belgium, France, Netherlands, Romania, Bulgaria, ug Greece. Samtang didto ko sa Bulgaria, mitambong kog misa nga gidumala sa pari sa mga sundalo. Ako nakapangutana, ‘Magmisa ba usab ang mga kaaway? May dapigan kaha ang Diyos panahon sa giyera?’

Sa ulahi, gipaeskuyla ako sa Junkerschule, nga bansayanan sa mga batan-ong sundalo nga himoong taas nga opisyal. Human niana, ako giasayn sa grupo nga magguwardiya sa hedkuwarter sa Reich sa Berlin, ug didto akong nasaksihan nga gisinggitan ni Hitler ang usa ka prominenteng politiko. Para nako makauulaw ang iyang gihimo, apan nag-amping ko nga dili nako masulti ang akong gibati.

Sa Berlin, akong nahimamat si Inge nga nagtrabaho usab sa hedkuwarter. Sa dihang kaslonon na kami, ang akong grupo kalit nga gipadala sa gubat sa Russia—nga walay igong sapot alang sa tingtugnaw! Wala mi magtuo nga pwerteng tugnawa didto, kay niadtong 1941/1942 ang temperatura miabot ug -30 grado Celsius. Didto nakadawat kog award nga Iron Cross sa ikaduhang higayon. Sa ulahi ako naangol, ug gipapauli ko sa Germany. Naminyo mi ni Inge niadtong 1943.

 Ang akong sunod nga asaynment mao ang Obersalzberg, nga hedkuwarter ni Hitler sa kabukiran sa Bavaria. Atua usab didto si Heinrich Himmler, ang pangulo sa SS, ug iya kong gipatambalan sa iyang masahista ug doktor nga si Felix Kersten. Sa ulahi akong nasayran nga si Kersten nanag-iyag propiedad nga gitawag ug Hartzwalde duol sa Berlin. Sa hapit nang matapos ang gubat, iyang gihangyo si Himmler nga tugotan ang mga Saksi ni Jehova sa duol nga kampo sa pagtrabaho sa iyang propiedad. Misugot si Himmler, ug maayo ang pagtagad ni Kersten sa mga Saksi. Ang usa ka Saksi nga nagtrabaho kang Kersten sa Sweden kanunayng magpayuhot diha sa maleta ni Kersten ug kopya sa Bantayanang Torre alang sa mga Saksi sa Germany. a

Nailhan Nako ang mga Saksi ni Jehova

Sa ulahing bahin sa 1944, giasayn ko ni Himmler ingong sekretaryo sa heneral sa SS nga maoy komander sa 400-anyos na nga palasyo sa Wewelsburg duol sa siyudad sa Paderborn. Buot ni Himmler nga himoon ang Wewelsburg nga sentro sa pagtudlog mga ideolohiya sa SS. Unahag gamay sa palasyo mao ang gamay nga bilanggoang kampo nga gitawag ug Niederhagen, diin gipriso ang gilain nga grupo—ang mga Saksi ni Jehova, nga gitawag usab ug mga Estudyante sa Bibliya.

Kapila ko giduaw sa piniriso nga si Ernst Specht aron sa pagtambal nako. “Maayong buntag, Sir,” siya miingon.

“Nganong dili ka man moingon nako ug ‘Heil Hitler!’?” ako nangutana.

Siya matinahorong mitubag, “Nagdako ka ba nga Kristiyano, sir?”

“Oo, Pietista ang among pamilya,” ako miingon.

“Kon mao,” miingon siya, “nahibalo ka nga ang Bibliya nagsaad ug kaluwasan (heil) pinaagi lamang kang Jesu-Kristo. Mao kanay hinungdan nga dili ko moingon ug ‘Heil Hitler!’”

Kay natingala ug nakadayeg sa iyang tubag, ako siyang gipangutana, “Nganong napriso man ka?”

“Estudyante man gud ko sa Bibliya,” siya miingon.

Ang among pag-estoryahanay ni Ernst ug sa lain pang Saksi nga si Erich Nikolaizig, nga usa ka barbero, nakapatandog gayod sa akong kasingkasing. Apan gidid-an mi nga makig-estorya sa mga piniriso ug bahin sa relihiyon maong gibadlong ko sa among komander. Ako nagtuo nga kon ang tanang tawo sa Germany—diin minilyon ang nag-angkong mga Kristiyano—parehas ug baroganan sa mga Saksi, wala untay gubat. Alang nako dalayegon ang maong mga tawo ug dili angayng prisohon.

 Nianang panahona, dihay nanawag nga balo nga nabalaka pag-ayo kay ang iyang anak operahanan sa apendiks ug kinahanglang idagan sa ospital. Busa nagpasugo ko nga isakay dihadiha ang bata paingon sa ospital pero wala mosugot ang akong komander. Ngano man? Ang bana diay sa maong balo gisilotag kamatayon kay apil siya sa grupo nga misulay pagpatay kang Hitler niadtong Hulyo 1944. Ang iyang anak namatay ug wala koy nahimo. Hangtod karon nakonsensiya gihapon ko niana.

Bisan ug kapig 20 pa lang ko niadtong tungora, nahigmata ko sa tinuod nga kahimtang sa kinabuhi—lahi gayod kana sa malimbongong propaganda sa Nazi. Sa samang higayon, milalom ang akong apresasyon sa mga Saksi ni Jehova ug sa ilang mga pagtulon-an. Busa natukmod ako nga himoon ang usa ka dakong desisyon sa akong kinabuhi.

Niadtong Abril 1945, nagsingabot na ang among mga kontra, ug ang among kinatas-ang opisyal mikalagiw palayo sa Wewelsburg. Dayon miabot ang usa ka grupo sa mga sundalo nga gisugo ni Himmler sa pagguba sa palasyo ug pagpatay sa mga piniriso. Gitunol kanako sa komander sa kasikbit nga kampong bilanggoan ang listahan sa mga piniriso nga ipapatay—puro sila mga Saksi. Ngano kaha? Kay nahibalo man gud kono sila kon asa gipangtago diha sa palasyo ang mga obra maestra sa arte nga kinawat sa Third Reich. Kinahanglang dili gayod mabulgar ang maong sekreto! Busa unsay angay nakong himoon?

Akong giingnan ang komander sa kampo: “Ang mga sundalo sa America nagpadulong na. Di ba mas maayo kon mokalagiw na lang mo?” Wala ko malisdi sa pagkombinsir kaniya! Dayon akong gihimo ang dili angayng himoon sa usa ka SS nga opisyal—wala nako tumana ang akong komander ug wala nako patya ang mga Saksi.

Usa ka Dakong Pribilehiyo nga Mahimong Ilang Igsoon

Human sa gubat, kami ni Inge nagtuon sa Bibliya uban sa mga Saksi ni Jehova. Gitabangan mi sa usa ka babayeng Saksi nga si Auguste ug sa uban pa. Ang akong pagkaangol panahon sa giyera ug ang krisis human sa gubat nakapalisod sa among kinabuhi. Bisan pa niana, among gipahinungod ang among kinabuhi kang Jehova ug nagpabawtismo ko niadtong 1948, ug si Inge niadtong 1949.

Sa katuigan sa 1950, daghang Saksi nga napriso kaniadto sa Wewelsburg panahon sa gubat mibalik didto aron mag-reunion. Apil kanila si Ernst Specht, Erich Nikolaizig, ug ang usa pa ka matinumanong Saksi nga gipriso didto nga si Max Hollweg. Giisip nako nga usa ka dakong pribilehiyo nga mahimong ilang igsoon, kay kining maisogong mga alagad sa Diyos nagsangyaw kanako bisan pag nameligro ang ilang kinabuhi tungod niana. Mitambong usab sa reunion si Martha Niemann nga sekretarya kaniadto sa Wewelsburg. Siya usab nakadayeg pag-ayo sa panggawi sa mga Saksi ug nahimong bawtismadong alagad ni Jehova.

Sa akong naagian sa daghang katuigan, napamatud-an gayod nako nga “ang tibuok kalibotan nailalom sa gahom [ni Satanas nga Yawa]”—usa ka butang nga wala nako mahibaloi kaniadto sa dihang ako nabutaan sa mga ideolohiya sa Nazi. (1 Juan 5:19) Nakita usab nako ang dakong kalainan sa pag-alagad sa usa ka mangtas nga lider, sama kang Hitler, ug sa pag-alagad kang Jehova. Ang pag-alagad kang Hitler pinugsanay, samtang ang pag-alagad kang Jehova maoy pinasukad sa gugma nga atong bation human nato makat-oni sa Bibliya ang iyang personalidad ug katuyoan. (Lucas 10:27; Juan 17:3) Busa si Jehova lamang ang angay nakong alagaran sa tibuok nakong kinabuhi.

[Footnote]

[Hulagway sa panid 19]

Letrato sa among kasal niadtong Pebrero 1943

[Hulagway sa panid 19]

Ang palasyo sa Wewelsburg nga gustong himoong sentro sa pagtudlog mga ideolohiya sa SS

[Hulagway sa panid 20]

Ako ug ang akong asawa nga si Inge karon