Faeroe Islands—Talagsaong Pagkakonektar

ANG Faeroe Islands maoy usa ka gamayng pundok sa 18 ka isla diha sa balorong kadagatan sa North Atlantic. Ang pinulongan sa mga tawo dinhi gitawag ug Faeroese. Niining maanindot nga mga isla, mga pangpang ang nagsilbing mga baybayon. Ang mga balay diha sa mga baryong duol sa dagat lainlaig kolor. Sa ting-init, berde kaayong tan-awon ang mga sagbot nga nagtabon sa mga bungtod.

Ang 48,000 ka molupyo niini nga mga isla nagtinabangay, apan kana dili sayon. Kaniadto naggamit silag mga sakayan sa pagtabok ug pagdalag mga panginahanglan paingon sa ubang isla. Sila magbaklay paingon sa baryo agi sa tiptip nga mga bukid ug laglom nga pangpang. Dili usab sayon ang pagtukod ug balay kay ang tanang materyales isakay pag sakayan gikan sa laing isla ug kinahanglang hakoton inigdunggo.

Ang Unang mga Molupyo

Ang unang rekord bahin sa Faeroe Islands mao ang gisulat sa usa ka monghe nga taga-Ireland niadtong mga 825 C.E. Siya miasoy nga diha nay ermitanyong mga monghe gikan sa Ireland nga nagpuyo sa maong mga isla kapig usa ka gatos ka tuig una siya miabot. Apan sa unang bahin sa ikasiyam nga siglo midaghan ang namuyo sa mga isla sa dihang miabot si Grímur Kamban gikan sa Norway.

 Bisan tuod ang panginabuhi sa unang mga molupyo mao ang pagpangisda, namuhi usab silag mga karnero. Sa pinulongang Faeroese, ang Føroyar (Faeroe Islands) nagkahulogang “Mga Isla sa Karnero,” ug hangtod karon hinungdanon gihapon sa mga taga-didto ang pagpamuhig karnero. Ang balhibo sa karnero magsilbing proteksiyon sa hangin, ulan, ug katugnaw. Diha pa ganiy panultihon nga ang ‘balhibo sa karnero maoy bulawan alang sa mga taga-Faeroe.’

Hangtod karon mas daghag karnero kay sa mga tawo sa maong mga isla. Ang karnero ihawon nila sa naandang paagi, dayon kusahoson maong lami kaayo kana.

Sanglit layo kaayo ang nahimutangan sa Faeroe Islands, ang mga tawo suod kaayo ug nagtinabangay aron mabuhi. Wala mawala ang maong batasan ilabina kay moderno na karon ang ilang transportasyon ug komunikasyon.

Nakonektar Pinaagig mga Tunel

Ang unang tunel sa Faeroe Islands gisugdan paggamit niadtong 1963. Kini mao ang tunel sa Suðuroy, ang kinatumyang isla sa habagatan. Ang maong tunel nga nagkonektar sa duha ka baryo gipalusot diha sa bukid. Ang pagbuho, pagkalot, ug pag-blasting gisugdan nga dungan sa masigkatumoy hangtod magtagbo.

Ang tunel nga gikalot dili pa dugay may giladmong mga 150 metros ilalom sa dagat ug nagkonektar sa duha ka dagkong isla. Naggamit silag drill o makina nga may gitas-ong 5 metros aron sa pagbuho sa dagkong bato. Pabuthan nilag dinamita ang buho ug habwaon ang nabungkag nga mga bato. Ingong resulta, moirog ug 5 metros ang buho sa tunel hangtod nga miabot kini ug mga 6 kilometros. Ang tunel gisugdan paggamit niadtong Abril 29, 2006.

Bisag gamay ra ang populasyon sa Faeroe Islands kini adunay 18 ka tunel, diin ang duha niana anaa ilalom sa dagat ug nagkonektar sa mga isla. Nagplano sila sa pagtukod ug dugang pa. Gani ang gobyerno nakadesisyon sa pagtukod ug duha pa ka tunel nga magkonektar sa dagkong isla. Ang usa niana nga may gitas-ong 11.9 kilometros gilaomang mahuman sa 2012. Sa tibuok kalibotan, mao unya kana ang usa sa kinatas-ang tunel nga nag-agi ilalom sa dagat.

Lain Pang Hinungdan sa Panaghiusa

Dunay grupo sa mga tawo sa Faeroe Islands nga nagkahiusa tungod sa ilang panag-igsoonay. Sila mao ang mga Saksi ni Jehova. Niadtong 1935 miduaw sa mga isla ang unang mga Saksi—duha ka kugihang babaye gikan sa Denmark. Namalaybalay sila panahon sa ting-init aron sa paghatod sa mensahe sa Bibliya bahin sa Gingharian sa Diyos. Sa ngadto-ngadto, ang pipila sa mga taga-Faeroe Islands misanong sa mensahe ug miduyog sa pagsangyaw.—Mateo 24:14.

Karon, duna nay mga usa ka gatos ka Saksi nga nagtigom diha sa upat ka Kingdom Hall sa mga isla. Sila madasigong nagsangyaw ug dako kaayong tabang kanila ang maanindot nga mga dalan ug mga tunel nga nagkonektar niining makabibihag nga mga isla nga nagpundok diha sa balorong kadagatan sa North Atlantic.

[Hulagway sa panid 17]

Kini nga tunel may giladmong mga 150 ka metros ilalom sa dagat ug nagkonektar sa duha ka dagkong isla