Gikan sa Among mga Magbabasa

Ang Krisis sa Tubig—Unsay Ginahimo Bahin Niini? (Enero 2009) Gusto lang nakong komentohan ang kataposang bahin niini nga artikulo. Imbes awhagon ang mga magbabasa nga motabang sa uban pinaagi sa paghimog mga atabay, pagsuportar sa mga programa sa pagkonserbar sa tubig, o kaha sa pagpangitag laing paagi aron masulbad ang problema, ang maong artikulo nag-ingon: “Ang labing maayong solusyon sa krisis sa tubig anaa sa mga kamot sa Diyos, dili sa tawo,” ug “‘ang tanang butang iyang bag-ohon.’ (Pinadayag 21:5)” Bisan tuod ug maayo kana nga balita, dili ba mas maayo kon motabang kita mentras nagpaabot sa saad sa Diyos? Daghan kaayog problema ang atong kalibotan. Bisan pag ang Diyos nagtaganag solusyon, kinahanglang molihok usab kita ilabina kay ang Yawa nagadaot sa atong kalibotan.

S. S., United States

Ang “Pagmata!” nagtubag: Ang maong artikulo wala magpasabot nga ang mga tawo dili maningkamot sa pagpauswag sa kahimtang karon. Sumala niana “gitugyan sa Diyos ngadto sa tawo ang responsibilidad sa pag-atiman niini nga planeta.” Busa, nag-imprenta na kamig daghang artikulo nga nag-awhag sa among mga magbabasa sa pagkonserbar sa mga kahinguhaan sa atong planeta ug sa pagpanalipod sa kinaiyahan. Ikasubo nga sagad nababagan ang mga paningkamot sa tawo sa pagpanalipod sa kahinguhaan sa yuta tungod sa mga pamalaod nga pabor sa pag-uswag sa ekonomiya bisan pag ang maong pag-uswag makadaot sa kinaiyahan. Makababag usab ang kahakog sa dili-hingpit nga tawo. Tungod niana makaingon kami nga “ang labing maayong solusyon sa krisis sa tubig anaa sa mga kamot sa Diyos.”

Yuta—Gilalang Aron Mapuy-an (Pebrero 2009) Ning atong panahon makapabalaka kanato ang atong mabasahan bahin sa mga epekto sa pag-init sa klima, apan kini nga artikulo nakahatag gayod kanakog kalinaw sa hunahuna. Nadasig usab ako nga dunay maayong kaugmaon nga nagpaabot sa yuta, nga kini mahimong paraiso ug pagapuy-an sa mga tawong matarong diin sila magkinabuhi nga malinawon. Salamat kaayo.

M. H., Japan

Ang Dyslexia Dili Babag Kanako (Pebrero 2009) Duna sab koy dyslexia ug nasayran nako nga grabe diay kini sa dihang nagtuon akog bag-ong pinulongan kay kami sa akong asawa giasayn ingong mga misyonaryo. Makapadasig kaayo kanako ang maong artikulo, ilabina ang kahon diha sa panid 22, kay natabangan ako nga masabtan ang akong kahimtang. Natandog ako sa kasinatian ni Michael Henborg kay bisan pa sa iyang kahimtang, nakakat-on siyag daghang pinulongan. Daghang salamat.

M. M., Tanzania

Mga Batan-on Nangutana . . . Unsaon Nako Paghimong Makalingaw ang Pagbasa sa Bibliya? (Abril 2009) Halap ang akong panan-aw ug naggamit kog Braille sa eskuylahan. Nagpasalamat ako sa inyong mga publikasyon kay natabangan ako niini sa pagsagubang sa akong mga problema. Kanunay kong maminaw sa inyong mga cassette ug mga CD sa dili pa ko matulog. Makatulog ako nga punog maayong mga butang ang akong hunahuna. Labing menos lima ka beses na nakong napaminawan kini nga artikulo ug nakakat-on ako sa paggahin ug panahon sa personal nga pagtuon.

S. H., France