Kon Unsay Nakapadani Kanako nga Mahimong Saksi ni Jehova

Sumala sa giasoy ni Tomás Orosco

Sa una nakong pagtambong ug tigom sa Kingdom Hall sa mga Saksi, usa ka batang lalaki ang mihatag ug pakigpulong. Bisag halos tupong lang siya sa podyum, nakadayeg gyod ko kay maayo na kaayo siyang mopakigpulong.

NAMATIKDAN nako nga ang tanan naminaw pag-ayo kaniya. Sanglit ako usa man ka komander sa mga sundalo sa Bolivia nga gipadala ngadto sa United States ug bata-bata sa presidente sa among nasod, naanad gayod ako nga respetohon. Apan ang respeto nga nadawat sa maong bata gikan sa mga mamiminaw nakapahinuklog kanako bahin sa akong mga tumong sa kinabuhi.

Ang akong amahan namatay niadtong 1934 panahon sa Gubat sa Chaco diin nag-away ang Paraguay ug Bolivia. Wala madugay, gipaeskuyla ko sa usa ka Katoliko nga eskuylahan diin didto usab ako nagpuyo. Sulod sa daghang tuig mitambong ko sa inadlawng Misa, diin nanganta mig mga alawiton sa simbahan, naminaw sa katekismo, ug nangadye. Nagsakristan pa gani ko ug miapil sa grupo sa mga mag-aawit sa simbahan. Apan sa pagkatinuod lang, wala pa gayod ko makabasa ug Bibliya ug wala pa ko sukad makakita niana.

Ganahan kaayo ko ug relihiyosong mga pista kay sadya kana ug makaparelaks. Apan ang mga pari ug ubang magtutudlo sa relihiyon maot ug kinaiya. Imbes masuod kanila, milayo hinuon ang akong pagbati ug gitab-angan ko sa relihiyon.

Ang Nindot nga Hitsura sa mga Sundalo Nakapaaghat Kanako

Usa ka adlaw niana, miduaw sa among lungsod sa Tarija ang duha ka batan-ong opisyal sa sundalo nga isputing kaayo. Gikan sila sa La Paz, nga usa ka dakong siyudad sa Bolivia. Nindot kaayo silang tan-awon samtang naglakaw diha sa plasa. Nakadayeg usab ko sa ilang pagka-desente ug sa ilang hinlo ug talahoron nga hitsura. Nag-uniporme silag patig ug nagsul-ob ug kalo sa sundalo. Sukad niadto, buot nakong mahimong usa ka opisyal sa militar. Nagtuo ako nga ang mga sundalo daghag nindot nga mga kasinatian ug dungganong mga buhat.

Niadtong 1949, sa edad nga 16 ako mieskuyla sa tunghaan sa Bolivia alang niadtong gustong magsundalo. Taas kaayo ang linya sa pagpaenrol ug miabot pa gani kini sa geyt sa baraks. Gikuyogan  ko sa akong magulang ug gipailaila sa tenyente, ug iyang gihangyo ang tenyente nga dili ko pasagdan. Dayon iya kong gidayeg agig rekomendasyon ngadto sa tenyente. Apan paghawa sa akong magulang, natilawan nako ang tinagdan alang sa mga rekluta. Ako giumod ug giingnan, “Kami ang magbuot kon kinsay among dayegon dinhi!” Mao kadtoy unang higayon nga natilawan nako ang sinundalong disiplina ug pagpanghadlok. Hinuon wala ra ako maunsa, apan natandog ang akong garbo.

Sa ngadto-ngadto nakakat-on ko sa pagpakiggubat ug nahimo kong usa ka tinahod nga opisyal. Apan sa akong naeksperyensiyahan, akong nakita nga ang hinlo ug talahorong postura sa mga sundalo usahay panggawas lamang.

Mitaas ang Akong Ranggo

Sa sinugdanan sa akong pagkasundalo, ako gibansay diha sa General Belgrano, ang barko-de-giyera sa Navy sa Argentina. Kasudlan kinig kapin sa usa ka libo ka sundalo. Sa wala pa ang Gubat sa Kalibotan II, kini nga barko ginganlag USS Phoenix nga gigamit sa United States, ug wala kini maunsa sa dihang giatake sa mga Hapon ang Pearl Harbor sa Hawaii niadtong 1941.

Sa ngadto-ngadto, mitaas ang akong ranggo ug nahimo kong ikaduha sa kinatas-ang opisyal sa Navy sa Bolivia, nga nagpatrolya sa katubigan sa among nasod. Apil sa among teritoryo ang mga suba palibot sa Amazon Basin ug ang Lake Titicaca, nga mao ang kinahabogang lanaw sa kalibotan nga kaagian ug barko.

Niadtong Mayo 1980, usa ko sa mga opisyal nga napili nga ipadala sa Washington, D.C., ang kaulohan sa United States. Usa ka taas ug ranggo nga opisyal ang gipili gikan sa matag sanga sa militar—army, air force, ug navy—ug ako ang gihimong koordinetor sa maong grupo tungod kay dugay na ko sa serbisyo. Duolag duha ka tuig kong nagpuyo sa United States una ko nahimong bata-bata sa presidente sa Bolivia.

Ingong usa ka opisyal, giobligar ako nga mosimba matag Dominggo. Ang pag-apil-apil sa mga tsaplin ug mga pari sa mga rebolusyon ug  mga giyera nakapawala sa akong gana sa relihiyon. Nahibalo ako nga dili angayng makigbahin ang relihiyon sa giyera. Apan imbes akong talikdan ang relihiyon tungod sa maong pagkasalingkapaw, natukmod na hinuon ako sa pagpangita sa kamatuoran. Wala pa nako sukad mabasa ang Bibliya, busa mobasa ko popanagsa depende sa akong mapaklian nga panid.

Pagkaorganisado Diha sa Kingdom Hall

Nasorpresa ako sa dihang akong nasayran nga ang akong asawang si Manuela nagtuon sa Bibliya uban sa usa ka misyonarya sa mga Saksi ni Jehova nga si Janet. Sa ulahi, ang akong asawa nagtambongan na sa Kingdom Hall. Ihatod nako siya didto apan dili ko motambong. Abi man gud nako ug ang ilang mga tigom banha ug naay maghilak-hilak.

Usa ka adlaw niana, gipangutana ko ni Manuela kon mosugot ba ko nga duawon sa bana ni Janet. Mibalibad ko sa primero. Apan nakahunahuna ko nga tungod sa akong kahibalo bahin sa relihiyon mapakgang nako ang tanan niyang argumento. Sa una namong pagkita ni Ian, nakadayeg ko ilabina sa iyang maayong pamatasan bisan tuod ug wala nako matiman-i ang tanan niyang gisaysay. Daghan siyag nahibaloan sa Bibliya, apan wala ko niya pakaulawi. Siya malumo ug matinahoron.

Pagkasunod semana, nakadesidir ko nga motambong sa Kingdom Hall, ingon sa gihisgotan sa sinugdanan niining artikuloha, diin nakita nako ang usa ka bata nga nagpakigpulong. Samtang iyang gibasa ug gisaysay ang mga teksto sa basahon ni Isaias diha sa Bibliya, nakaingon ako nga talagsaon kini nga organisasyon. Nahimuot ako sa paghunahuna nga sa batan-on pa ko, buot kong mahimong usa ka tinahod nga opisyal sa militar, apan karon gusto ko nga magtudlo bahin sa Bibliya sama sa gihimo sa maong bata. Daw kalit lang mihumok ang akong kasingkasing ug andam nang modawat sa pagtulon-an sa Bibliya.

Sa ulahi, nakadayeg usab ko sa pagkauntop sa mga Saksi ug sa ilang pagkamahigalaon. Gitratar ko nila nga samag igsoon. Hinlo ug desente ang ilang sinina. Ilabinang naangayan nako ang maayo kaayong pagkaorganisar sa ilang mga tigom. Kon unsang pakigpulong ang naa sa eskedyul, mao gayod kanay imong madunggan nianang adlawa. Nakita nako nga ang ilang pagka-disiplinado maoy pinasukad sa gugma, dili tungod sa kahadlok.

Human ko makatambong ug tigom sa unang higayon, nakadesisyon ko nga magpatuon sa Bibliya kang Ian. Among gigamit ang librong Ikaw Mabuhing Walay Kataposan sa Paraiso sa Yuta ingong giya sa pagtuon. a Mahinumdoman pa nako ang hulagway diha sa kapitulo tres diin dunay usa ka obispo nga nagbendisyon sa mga sundalo una moasdang sa gubat. Mouyon ako sa maong hulagway kay akong nasaksihan nga nagakahitabo gayod kana. Sa Kingdom Hall, mikuha akog libro nga Nangatarongan Pinasukad sa Kasulatan. Sa dihang akong nabasahan ang giingon sa Bibliya bahin sa neyutralidad, akong naamgohan nga dunay mga butang nga angay nakong usbon. Busa mihukom ako nga moundang sa pagka-Katoliko, ug regular na kong nagtambong sa mga tigom sa Kingdom Hall. Nagplano usab ko nga moretiro sa pagkasundalo.

Miuswag ug Nagpabawtismo

Pipila ka semana sa ulahi, nasayran nako nga ang kongregasyon manghinlo sa usa ka estadyum nga gamiton sa nagsingabot nga kombensiyon. Naghinamhinam ko sa pagtambong niana ug mitabang ko sa pagpanghinlo sa pasilidad. Nalipay kaayo ko sa pagtrabaho ug sa pagpakig-uban kanila. Samtang nanilhig ko, dihay batan-ong lalaki nga miduol ug nangutana kon ako ba ang admiral nga iyang giserbisyohan kaniadto.

“Oo,” ako mitubag.

“Dili ko makatuo nga makita ta ka dinhi!” Wala siya magdahom nga manilhig ang usa ka admiral kay ang taas-ug-ranggo nga opisyal dili  gani masugo bisan lang sa pagpunit ug papel, manilhig pa kaha! Siya ang akong drayber kaniadto ug siya usa na ka Saksi ni Jehova!

Pagpakigkooperar Tungod sa Gugma

Para sa mga sundalo ikaw tahoron kon taas kag ranggo, ug mao kana ang natisok sa akong hunahuna. Pananglitan, kaniadto ako mangutana kon duna bay ranggo-ranggo sa mga Saksi ni Jehova. Wala pa mawala ang akong panglantaw bahin sa ranggo ug posisyon, apan dihay usa ka panghitabo nga nakapausab gayod niana.

Sa 1989 nasayran nako nga ang usa ka membro sa Nagamandong Lawas sa mga Saksi ni Jehova gikan sa New York moduaw sa Bolivia aron sa paghatag ug pakigpulong diha sa usa ka estadyum. Gusto kaayo kong makakita kon unsaon nila pagtratar ang usa ka “inilang” membro sa ilang organisasyon. Nagdahom ko nga ila siyang sugaton ug magarbohong seremonyas.

Buweno, sa dihang nagsugod na ang sesyon, wala koy nakitang prominenteng tawo nga miabot, maong natingala ko. Sa among tupad dihay milingkod nga edarang magtiayon. Namatikdan ni Manuela nga ang asawa naggamit ug songbok nga Iningles. Busa panahon sa intermisyon nakig-estorya si Manuela kaniya. Apan human niadto, mibiya na ang maong magtiayon.

Nasorpresa kaayo mi sa ulahi sa dihang among nakita nga ang bana sa babaye nga among tupad misaka sa plataporma ug mao ang mihatag sa pangunang pakigpulong! Niadtong tungora, ang akong panglantaw sa ranggo, respeto, gahom ug posisyon ingong usa ka sundalo nausab gayod. “Tiaw mo na, ang brader nga among nakatapad didto sa dili-komportableng mga lingkoranan sa estadyum, mao diay ang membro sa Nagamandong Lawas!”

Mahimuot ko sa dihang akong mahinumdoman kon kapila ko gisaysayan ni Ian sa giingon ni Jesus sa Mateo 23:8 nga “Kamong tanan mga igsoon.”

Pagsangyaw sa Unang Higayon

Sa dihang ako miretiro sa pagkasundalo, giuban ko ni Ian sa pagpamalaybalay. (Buhat 20:20) Ang dapit nga among gisangyawan mao ang buot gayod unta nakong likayan kay daghang namuyo didto nga mga sundalo. Ang heneral nga akong ginalikayan mao na hinuon ang akong nasangyawan. Gikulbaan ko, ilabina sa dihang nakita niya nga nagbitbit kog bag ug Bibliya ug siya mabiaybiayong nangutana, “Unsa may nahitabo nimo?”

Human sa usa ka mubong pag-ampo, nawala ang akong kulba. Naminaw kanako ang heneral ug midawat siyag literatura sa Bibliya. Tungod sa maong kasinatian, natukmod ako nga ipahinungod kang Jehova ang akong kinabuhi. Ako nagpabawtismo niadtong Enero 3, 1990.

Sa ngadto-ngadto, ang akong asawa ug anak nga lalaki ug babaye nahimo usab nga mga Saksi ni Jehova. Karon ako nag-alagad ingong ansiyano ug bug-os-panahong magsasangyaw sa maayong balita sa Gingharian sa Diyos. Ang labing bililhong pribilehiyo nga akong nabatonan mao ang pagkahimong higala ni Jehova. Dili kini ikatandi sa bisan unsang ranggo o posisyon nga ginapangagpas sa mga tawo. Sa walay duhaduha, ang pagkaorganisado kinahanglan gayong pinasukad sa gugma ug dili sa kahadlok. Si Jehova maoy Diyos sa kahapsay, apan labaw sa tanan, siya maoy Diyos sa gugma.—1 Corinto 14:33, 40; 1 Juan 4:8.

[Footnote]

[Hulagway sa panid 13]

Uban sa akong igsoong si Renato, niadtong 1950

[Hulagway sa panid 13]

Nagtambong ko sa usa ka okasyon uban sa mga opisyal sa militar gikan sa China ug uban pang nasod