Ang Hunahuna sa Bibliya

Mapuslanon pa ba ang Tanang Bahin sa Bibliya?

“Halos wala nay pulos ang Bibliya para sa mga tawo karon. Hinuon mahimo pa kining kakuhaag impormasyon sa pagtubag ug mga crossword puzzle o mga pangutana sa contest sa TV.”

“Ang mga impormasyon sa Bibliya bahin sa mga kaliwatan, pagpabiling ulay, ug pagkahadlok sa Diyos mapadapat lamang sa mga tawo sa karaang panahon ug halos wala nay pulos karon.”

“Bisan niadtong wala pa maimprenta ang Bibliya, kana karaan na.”

MAO kini ang mga komento di pa dugay diha sa Web site nga naghisgot sa ulohang “Ang Bibliya ba karaan na ug dili na mapuslanon?” Mouyon ka ba sa maong mga komento?

Lagmit dili ka mouyon sa maong mga komento bahin sa Bibliya, apan tingali mosantop usab sa imong hunahuna kon mapuslanon ba ang tanang bahin sa Bibliya. Kadaghanan man gud sa relihiyon karon nagbahin sa Bibliya sa Daang Tugon ug Bag-ong Tugon, busa ang mga tawo nagtuo nga kapin sa 75 porsiyento sa Bibliya karaan na ug dili nunot sa panahon.

Wala nay maghalad karon ug mga hayop agig pagsunod sa Balaod ni Moises. Busa unsa pay pulos sa mga detalye bahin sa mga halad diha sa basahon sa Levitico? (Levitico 1:1–7:38) Ug komosta ang unang mga kapitulo sa 1 Cronicas nga napunog listahan sa kaliwatan? (1 Cronicas 1:1–9:44) Unsa may kapuslanan niana kon wala nay makasubay karon sa iyang mga kaliwat pinaagig pagbasa sa maong mga kapitulo?

Ibutang ta nga namupo kag mansanas. Human nimo mapupo ang bunga niana, moingon ka ba nga wala na nimo kinahanglana ang punoan? Dili gayod, ilabina kon gusto ka pang makakuhag bunga! Ang Bibliya nahisama nianang maong punoan. Ang pipila ka bahin niana, sama sa mga Salmo o sa Sermon sa Bukid, tingali makapainteres kanimo. Kon paborito nato ang maong mga bahin sa Bibliya—sama ra nga duna kitay paboritong prutas—ato na bang ibalewala ang ubang bahin sa Bibliya? Unsay giingon mismo sa Bibliya bahin niini?

Niadtong mga 65 C.E., gisulat ni apostol Pablo ang iyang ikaduhang sulat kang Timoteo, ug siya gipahinumdoman sa apostol: “Sukad pa sa pagkamasuso ikaw nahibalo na sa balaang mga sinulat, nga makahimo kanimong maalamon alang sa kaluwasan pinaagi sa pagtuo maylabot kang Kristo Jesus.” Dayon si Pablo miingon: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.” (2 Timoteo 3:15, 16) Sa dihang si Pablo miingon nga “ang tibuok Kasulatan inspirado sa Diyos ug mapuslanon,” ang Bag-ong Tugon ra ba ang iyang gipasabot?

Matikdi nga si Pablo miingon nga si Timoteo nahibalo sa ‘balaang mga sinulat sukad pa sa pagkamasuso.’ Nagtuo ang uban nga si Timoteo mga 30 anyos na sa dihang siya gisulatan ni Pablo. Sa ato pa, siya masuso pa sa dihang namatay si Jesus ug nianang panahona wala pa masulat ang Bag-ong Tugon o Gregong Kasulatan. Sanglit ang inahan ni Timoteo usa man ka Hudiya, ang balaang mga sinulat nga iyang gitudlo  sa bata pa si Timoteo lagmit mao ang Daang Tugon o Hebreohanong Kasulatan. (Buhat 16:1) Busa, sa dihang miingon si Pablo ug “tibuok Kasulatan,” kana naglakip sa tibuok Daang Tugon, nga naundan sa mga balaod sa paghalad ug talaan sa mga kaliwat.

Kapig 1,900 ka tuig sa ulahi, daghan gihapon kitag makuhang benepisyo gikan niini nga mga bahin sa Bibliya. Una, mapasalamaton kita nga giseguro sa Diyos nga kini masulat ug matipigan sa mga tawo nga iyang gipili. (Roma 3:1, 2) Sa Israel kaniadto, ang Balaod ni Moises dili lamang usa ka balaang sugo nga angayng tipigan alang sa umaabot nga mga kaliwatan kondili kini ang nagsilbing konstitusyon sa maong nasod. Ang mga detalye sa maong Balaod nga tingali dili na mapuslanon alang kanato, hinungdanon kaayo alang sa karaang Israel kay nagdepende niana ang ilang kinabuhi. Dugang pa, ang talaan sa mga kaliwat hinungdanon aron mailhan ang gitagnang Mesiyas nga matawo sa linya ni Haring David.—2 Samuel 7:12, 13; Lucas 1:32; 3:23-31.

Bisan pag ang mga Kristohanon dili na kinahanglang mosunod sa Balaod ni Moises, kinahanglang magpasundayag silag pagtuo sa gitagna nga Mesiyas, si Jesu-Kristo. Ang talaan sa karaang mga kaliwat diha sa Bibliya nagpamatuod nga si Jesus ang gisaad nga “anak ni David.” Ug ang mga detalye bahin sa mga halad nagpalig-on sa atong apresasyon ug pagtuo sa bili sa mas hinungdanong halad ni Jesus.—Hebreohanon 9:11, 12.

Sa sulat ni Pablo sa Kristohanong kongregasyon sa Roma sa unang siglo siya miingon: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Kini nga teksto nagpahinumdom kanato nga ang Bibliya makahatag ug kaayohan sa katawhan sa Diyos kaniadto ug karon. Sulod sa kapig 3,500 ka tuig, ang inspiradong mga pulong niana naggiya, nagtudlo, ug nagtul-id sa katawhan sa Diyos—sa kamingawan sa Sinai, sa Yutang Saad, sa ilang pagkabihag sa Babilonya, panahon sa Imperyo sa Roma, ug karon sa tibuok kalibotan. Wala nay libro nga makahimog sama niana. Sama sa mga gamot sa kahoyng mansanas, ang kahinungdanon sa pipila ka bahin sa Bibliya lagmit dili dayon makita. Tingali kinahanglan ka pang magkalot, ingnon ta, aron imong makita ang bili niana, apan dili kawang ang imong paningkamot!

NAKAPAMALANDONG KA BA?

● Kanus-a nakat-onan ni Timoteo ang “balaang mga sinulat”?—2 Timoteo 3:15.

● Unsang mga bahin sa Bibliya ang inspirado sa Diyos ug mapuslanon?—2 Timoteo 3:16.

● Sa unsang paagi kita makabenepisyo sa “tanang butang nga gisulat kanhi”?—Roma 15:4.

[Mga hulagway sa panid 29]

Ang mga detalye diha sa Bibliya magpalalom sa atong apresasyon sa sakripisyo nga gihimo ni Jesus