Mas Una ang Kinaiyahan

“Ang mapatalinghogong igdulungog ug ang matinan-awong mata—kining duha gibuhat ni Jehova.”—Proverbio 20:12.

ANG imong mga mata nahisamag gagmayng kamera sa telebisyon. I-convert niana ang iyang makita ingong electrical signal ug ipasa kana agi sa optic nerve paingon sa luyong bahin sa utok, ug niana imong mahibaloan kon unsay imong nakita.

Bisan pag gamay kaayo ang mata—24 milimetros lamang ang diyametro ug 7.5 gramos ang gibug-aton—katingalahan kaayo ang pagkadisenyo niini. Pananglitan, kini makapasibo sa kahayag ug sa kangitngit mao nga kon 30 minutos ka diha sa usa ka ngitngit nga lawak, ang imong mata mas sensitibo sa kahayag ug 10,000 ka pilo.

Nganong klaro man kaayo ang imong panan-aw kon normal ang kahayag? Tungod kana sa daghang selula o pixels diha sa imong mata nga sensitibo sa kahayag. Kapin kanag 100 ka pilo kon itandi sa kadaghanang video camera. Dugang pa, daghan sa maong mga selula ang anaa sa fovea, ang kinatung-an sa retina. Tungod sa fovea maklaro nimo ang detalye sa usa ka hulagway. Sanglit mapokus nimo ang imong mata sa lainlaing detalye sulod lang sa usa ka segundo, maklaro nimo ang imong makita. Ang nakapatalagsaon pa gyod sa fovea kay kana samag tuldok lamang ka gamay.

Ang mga electrical signal gikan sa mga selula nga sensitibo sa kahayag ipasa diha sa mga nerve cell paingon sa optic nerve. Apan ang maong mga nerve cell wala lang magpasa sa maong mga signal kondili paklarohon niana ang mga signal ug dili na ipasa ang wala kinahanglanang detalye.

Ang visual cortex sa imong utok maoy samag usa ka modernong video receiver. Patin-awon niana ang mga hulagway ug basahon ang mga signal gikan sa mga selula sa fovea nga makailag pula, dalag, ug asul. Tungod niana minilyong kolor ang imong makita. Matandi usab sa imong utok bisan ang gamayng kalainan sa distansiya nga makita sa imong mga mata.

Tagda pananglitan kon tan-awon nimo ang mga nawong sa tawo diha sa usa ka panon. Ang makita sa imong mata himoon niyang mga electronic signal ug ipasa niya kana sa imong utok diin ang maong mga signal mahimong klarong mga hulagway. Matikdi usab kon sa unsang paagi ang mga detalye nga anaa nang daan sa imong utok motabang kanimo nga mailhan ang imong higala bisan pag daghang nawong ang imong makita sa panon. Dili ka ba mahingangha niana?

[Hulagway sa panid 7]

Ang pagproseso sa mata sa impormasyon nga makita niana nagpamatuod nga kana talagsaong pagkadisenyo