Mga Leksiyon Gikan sa Kinaiyahan

“Pagkadaghan sa imong mga buhat, Oh Jehova! Sa kaalam gibuhat mo silang tanan.”—Salmo 104:24.

DAGHAN ang nag-ingon nga ang “kinaiyahan” maoy nagdisenyo sa tanang buhing butang. Pananglitan, ang Marso 2003 nga isyu sa Scientific American miingon: “Sa tanang proteksiyon sa panit nga gidisenyo sa kinaiyahan, ang balhibo mao ang kinadaghanag klase ug labing kahibulongan.” Bisan pag nagtuo ang maong magsusulat nga ang kinaiyahan samag usa lang ka puwersa, siya miingon nga ang kinaiyahan maoy “nagdisenyo” sa balhibo. Apan ang puwersa ba makadisenyo ug mga butang?

Ang “pagdisenyo” nagpasabot ug “pagplano (ug usa ka butang) alang sa usa ka tinong katuyoan.” (The New Oxford Dictionary of English) Dili puwersa kondili persona lamang ang makahimo sa pagdisenyo ug pag-imbento. Kon ang mga imbentor dunay ngalan, ang Maglalalang duna usay ngalan. Siya mao si Jehova, ang Tigdisenyo sa kinaiyahan. Siya lamang “ang Labing Hataas ibabaw sa tibuok nga yuta” ug ang ‘naglalang sa tanang butang.’—Salmo 83:18; Pinadayag 4:11.

Unsay atong makat-onan gikan sa kalalangan? Kini magtudlo kanato bahin kang Jehova ug sa iyang talagsaong mga hiyas, lakip na sa iyang kaalam. “Ang iyang dili-makita nga mga hiyas, nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) Nakat-onan nato sa kinaiyahan nga ang kaalam sa Diyos labaw kay sa atoa. Kon siya mas maayong modisenyo kon itandi sa mga imbentor, dili ba mas superyor ang iyang tambag kon itandi sa tawo?

Ang tambag sa Diyos wala masulat diha sa “libro sa kinaiyahan,” kondili nahisulat kana diha sa iyang Pulong, ang Bibliya. Unsay imong hunahuna? Ang usa ba nga Tigdisenyo sa mga bahin sa atong lawas aron kita makakomunikar buot usab makigkomunikar kanato? Buweno makalaom kita nga iya kanang himoon kay ang Bibliya nag-ingon: “Ang tibuok Kasulatan inspirado sa Diyos.”—2 Timoteo 3:16.

Kon makapainteres kanimo ang pagkat-on bahin sa mga imbentor, mas mainteres ka sa pagkat-on bahin sa Maglalalang. Pananglitan, basin gusto kang mahibalo sa tubag sa mga pangutana sama sa: Nganong kita mag-antos ug mamatay? Kini ba ang katuyoan sa Diyos alang sa tawo? Nganong gitugotan man sa Diyos ang pag-antos?

Ilhon man o dili sa mga siyentista, sila nakakat-on gikan sa mga disenyo ni Jehova. Daghan ka usab ug makat-onan gikan sa atong Maglalalang. Pananglitan, makat-onan nimo kon sa unsang paagi ka magmalamposon sa imong kaminyoon ug sa pagmatuto sa imong mga anak. Makakat-on usab ka sa katuyoan sa Diyos sa yuta ug kon sa unsang paagi ka magmatagbawon sa imong kinabuhi. Ang librong Unsay Tinuod nga Gitudlo sa Bibliya? nga gipatik sa mga Saksi ni Jehova, makatabang kanimo nga makakat-on sa Pulong sa Diyos.