Pagsimba sa Halas—Kaniadto ug Karon

I-PLAY

Pagsimba sa Halas—Kaniadto ug Karon

ANG mga Ehiptohanon kaniadto nagsimbag halas, maingon man ang mga Minoan nga unang mga molupyo sa Crete. Ang pipila sa mga Israelitas kaniadto naghalad ngadto sa usa ka tumbaga nga halas. Ang ubang Israelitas nagsunog ug insenso atubangan sa mga imahen sa “nagakamang nga mga linalang.”—Ezequiel 8:10-12; 2 Hari 18:4.

Kaylap usab sa karaang Mexico ang pagsimbag diyos nga mga halas. Ang supremong diyos sa mga Maya nga si Itzamná usahay irepresentar ingong usa ka serpente. Si Quetzalcoatl, ang “serpenteng dunay balhibo,” giisip sa mga Toltec nga diyos sa edukasyon, kultura, ug pilosopiya. Ang mga Aztec nag-isip usab kaniya ingong diyos sa edukasyon ug giisip pa gani nila siya ingong maglalalang sa tawo. Mahitungod sa maong diyos, ang magasing Arqueología Mexicana (Arkeolohiya sa Mexico) miingon: “Ang serpenteng dunay balhibo mas daghag titulo kon itandi sa ubang diyos.”

Sulod sa daghang siglo, ang mga molupyo sa usa ka bahin sa Central America nagsimba sa serpenteng dunay balhibo. Karon, ang mga tribong Cora ug Huichol sa Mexico nagtuo gihapon sa maong diyos. Sa ubang adlaw panahon sa ilang pista, dunay mga sumasayaw nga dayandayanag mga balhibo, ug ilang sundogon ang lihok sa serpente. Ang tribong Quiche naghimo usab ug rituwal sa pertilidad diin sila mosayaw nga naggunit ug buhing mga bitin. Ang Chorti, nga usa ka grupo sa tribong Maya sa Guatemala, nagsimba sa usa ka serpenteng dunay balhibo ug nagtuo sila nga nagrepresentar kana sa pipila ka santos sa Katoliko.

Ang pangutana mao kini, Unsa kahay hunahuna sa Maglalalang sa tawo ug mga hayop—lakip na sa mga halas—bahin sa pagsimba sa mga serpenteng diyos?

Ang Hunahuna sa Diyos Bahin sa Pagsimbag Halas

Si Jehova nga Diyos nagsugo sa nasod sa Israel kaniadto: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila.”—Exodo 20:4, 5.

Gidid-an ni Jehova ang iyang mga alagad sa pagsimbag mga imahen sa mga hayop, sama sa halas. Busa, dili ba kadtong buot mopahimuot kaniya angayng maglikay sa pagsimbag mga halas? Nganong gidumtan man sa Diyos ang idolatriya, lakip na ang pagsimbag mga halas? Ang tubag simple lang: Siya mao ang naghatag ug kinabuhi sa mga tawo, sa mga halas, ug sa tanang buhing butang. Sila maoy buhat sa iyang mga kamot, busa siya lang ang takos pagasimbahon, dili ang iyang mga linalang.

Sa pag-ilustrar: Pananglit dunay usa ka arkitekto nga nagtukod ug mga balay ug iya kanang gipapuy-an sa mga pamilya. Komosta kon ang ilang pasalamatan ug dayegon mao ang mga balay ug dili ang arkitekto? Dili ba kabuangan kana ug makapasuko sa manggihatagong arkitekto? Sa susama, ang pagsimba sa mga hayop inay sa Maglalalang makapasuko sa Diyos.

Dayag nga kadtong nagtinguha nga uyonan sa Diyos angay gayong mamati sa pasidaan ni apostol Juan: “Minahal nga mga anak, pagbantay kamo gikan sa mga idolo.”—1 Juan 5:21.

[Kahon/Hulagway sa panid 23]

PAGGAMIT UG HALAS DIHA SA PAGSIMBA

● Sa habagatan-sidlakang bahin sa United States, ang pipila ka karismatik nga relihiyon naggamit ug buhi ug lala nga mga halas sa pagsimba. Ibaliog sa pipila ang maong mga halas, samtang ang uban mopunit ug daghang halas. Tungod niana ang halas makuratan ug kana mamahit. Sa mga katuigan, ang uban sa ilang membro nangamatay kay gipaak sa halas.

Ilang giliteral pagsabot ang giingon sa Marcos 16:17, 18 diin mabasa kining mga pulonga: “Pinaagi sa ilang mga kamot mamunit sila ug mga halas.” Sa King James Version ug sa uban pang karaang mga hubad, kini nga mga bersikulo mabasa nga samag bahin sa orihinal nga manuskrito. Ang New Revised Standard Version, New American Standard Bible, ug ang The New King James Version nag-ingon nga dili kini mabasa diha sa kadaghanan sa labing daang mga manuskrito sa Ebanghelyo ni Marcos.

Ang Bibliya wala magtudlo nga ang paggamit ug mga halas dalawaton alang sa matuod nga pagsimba. Kini nag-ingon: “Ang Diyos gugma.” (1 Juan 4:8) Lagmit mouyon ka nga ang atong mahigugmaong Maglalalang dili magsugo sa iyang mga alagad nga himoon ang maong delikadong mga rituwal aron lamang siya mapahimut-an. Ang iyang Anak nga si Jesus nagdapit: “Umari kanako, kamong tanang nabudlayan ug nabug-atan, ug ako magapalagsik kaninyo.” (Mateo 11:28, 29) Sa walay duhaduha, dili gusto ni Jehova ug ni Jesus nga ang ilang mga sumusunod mag-antos sa kaul-ol, kasakit, ug kamatayon ingong resulta sa pinaakan sa halas nga ilang gigunitan!

[Credit Line]

REUTERS/Tami Chappell

[Hulagway sa panid 22]

Ulo sa serpenteng dunay balhibo diha sa templo sa mga Aztec

[Hulagway sa panid 22]

Si Quetzalcoatl, ang serpenteng dunay balhibo, nga diyos sa mga Toltec

[Picture Credit Lines sa panid 22]

PAGMATA!