Telebisyon

WALA madugay human makat-oni sa tawo ang pagsibya pinaagig radyo, buot sa mga imbentor nga masulayan usab ang pagsibyag buhing mga larawan. Aron masabtan kon unsa ka lisod ang paghimo niana, tagda kon sa unsang paagi mosalida ang telebisyon.

Una, “basahon” sa kamera sa TV ang aktuwal nga hulagway, sama rag nagbasa kag mga letra. Galing lang, imbes mga letra ang basahon sa kamera, basahon niana ang tanang detalye sa aktuwal nga hulagway. Iya kanang i-convert ingong electronic video signal ug kana mahimo nang isibya ngadto sa laing lugar. Dayon ang maong signal madawat sa receiver ug i-convert na usab ingong buhing mga hulagway.

Ang taga-Scotland nga si John Logie Baird maoy unang migamit ug telebisyon. Sa dihang miundang siya sa iyang trabaho ingong electrical engineer tungod sa sakit, gigugol niya ang iyang panahon sa usa ka butang nga nakapainteres kaniya sukad pa sa iyang pagkatin-edyer—ang paggamag instrumento nga makasibyag buhing mga hulagway.

Ang gigama ni Baird nga telebisyon-kamera may samag plaka nga instrumento (gama sa cardboard sa primero) nga may mga 30 ka buho paliyok. Samtang nagtuyok ang instrumento, molusot diha sa mga buho ang kahayag gikan sa aktuwal nga hulagway ug mapasa kana paingon sa photoelectric cell. Dayon i-convert kana ingong video signal ug ipasa paingon sa receiver. Pag-abot niana sa receiver, ang signal moagi diha sa laing samag-plaka nga instrumento ug iya kanang i-convert aron mosalida ang aktuwal nga hulagway. Ang problema maoy kon unsaon nga magkatakdo pagtuyok ang duha ka plaka. Samtang gihimo ni Baird ang maong proyekto, ang iyang pangita mao ang pag-shine ug sapatos.

Niadtong Oktubre 2, 1925, nakasibya si Baird sa unang higayon ug mga hulagway diha sa telebisyon gikan sa usa ka bahin sa iyang lawak ngadto sa laing bahin. Ang unang tawo nga nakita diha sa TV mao ang batan-ong lalaki nga trabahante sa ubos sa lawak ni Baird nga iyang gisuholan aron mosugot. Niadtong 1928, gisibya ni Baird ang unang mga hulagway diha sa telebisyon tabok sa Atlantic Ocean. Sa dihang miadto sa New York si John Baird, naulaw kaayo siya kay dihay banda sa mga musikero nga misugat kaniya. Nailado siya tungod sa iyang imbensiyon. Apan siya ba ang unang nakasibya ug buhing mga hulagway?