Kon Unsaon Pagkontrolar ang Imong Panahon

“Adunay tinudlong panahon alang sa tanang butang.”—Ecclesiastes 3:1.

ARON magahinan nimog panahon ang hinungdanong mga butang, kinahanglang imo unang sayron kon unsa kana. Mas sayon ang paghimo niana kon nahibalo ka kon unsay bililhon kanimo, kon unsang mga tumong ang buot nimong makab-ot, ug kon unsang mga buluhaton ang makatabang kanimo sa pagkab-ot niana.

Busa una sa tanan, tinoa kon unsay bililhon kanimo. Mahimo nimong isulat ang imong mahunahunaan, sama sa imong pamilya, mga higala, pagkakugihan, edukasyon, kalamposan, panagway, kuwarta, kalipay, kaminyoon, pag-ugmad ug maayong hiyas, maayong panglawas, ug maayong relasyon sa Diyos. Dayon, pangutan-a ang imong kaugalingon, ‘Hain niini ang ilabinang hinungdanon kanako?’

Ikaduha, tagda kon unsang mga tumong ang buot nimong makab-ot. Unsa may kalainan tali sa imong mga tumong ug sa mga butang nga bililhon kanimo? Niini nga artikulo, ang mga butang nga bililhon kanimo mao ang mga butang nga kanunayng hinungdanon ug dili mausab, samtang  ang imong mga tumong matapos sa dihang imo na kanang makab-ot.

Unsa ang mga tumong nga buot nimong kab-oton? Gusto ka bang mogugol ug daghang panahon uban sa imong pamilya? Mangitag mas maayong trabaho? Mohanas sa usa ka esport o kaha magtuon ug laing esport? Makaugmad ug usa ka hiyas? Magbakasyon? Makabasa o makasulat ug usa ka libro?

Pilia ang tumong nga labing importante kanimo. Paneguroa nga kana nahiuyon sa kon unsay bililhon kanimo. Pananglitan, kon tumong nimo nga madato pag-ayo, basin mosukwahi kana sa kon unsay bililhon kanimo.

Karon, sa imong gipili nga mga tumong, paghunahunag mga buluhatong makatabang sa pagkab-ot niana. Pananglitan, kon tumong nimo nga moniwang, makatabang ang pag-ehersisyo.

 Sa Unsang Paagi Kini nga Pag-analisar Makatabang Kanimo?

Kon ang imong mga tumong nahiuyon sa kon unsay bililhon kanimo ug ang imong mga buluhaton makatabang sa pagkab-ot niana, mahimong hapsay ug mabungahon ang imong kinabuhi. Mahatagan na nimog dugang panahon ang mga butang nga importante kanimo. Siyempre, wala kana magpasabot nga dili ka na maghunahuna sa uban. (Filipos 2:4) Hinunoa, mas dali na ang pagtino ug paghiklin sa mga buluhaton nga dili kaayo hinungdanon.

Buweno, dili kalikayan nga motungha ang mga kabaldahan. May mga buluhaton nga daw dili kaayo hinungdanon apan dili usab mahimong unya-unyaon. Tungod niana, mahurot ang imong tibuok adlaw ug gamay na lang ang imong panahon sa labing hinungdanong mga butang. Tingali motungha ang mga emerhensiya ug lagmit maguba ang imong eskedyul tungod sa mga kausaban. Apan, kon paningkamotan nimo nga magamit ang imong panahon sa hinungdanong mga butang, mas kontrolado nimo ang imong panahon ug ang imong kinabuhi.

[Kahon/Hulagway sa panid 6]

MAKATABANG BA ANG MGA GADYET SA PAGDAGINOT UG PANAHON?

Ang pipila nga naggamit ug elektronikong mga gadyet nakadaginot ug panahon samtang ang uban nag-usik sa ilang panahon. Pananglitan, ang personal digital assistant o PDA dunay kalendaryo, listahan sa mga numero sa telepono ug adres, reminders, word processor, memo pad, ug kamera. Mahimo sab kang mag-e-mail ug mag-Internet niini. Makatabang kini kanimo nga makadaginot ug panahon kon kanunay nimong i-update ug dad-on. Hinunoa, dali rang mausik ang imong panahon kon magsige kag tulpok-tulpok niini bisag wala kinahanglana o kaha kon mopalit ug dugang mga accessory niini nga dili importante. Mausik sab ang imong panahon kon unahon nimo ang gadyet kay sa imong mga buluhaton.

Sugyot: Suhetoha ang mga produkto ayha ka mopalit. Kon ang gadyet kanunayng madaot, mahurot lang ang imong panahon sa pagpareper niana. Ang gadyet makatabang kanimo depende sa imong paggamit niana. Busa gamita kana sa maalamong paagi aron dili mausik ang imong panahon.

[Hulagway sa panid 4, 5]

Magahinan ba nimog panahon ang hinungdanong mga butang?