Kulang Ka bag Panahon?

KON imong gibutangag tsek ang ikaduha o ikatulong kapilian sa kadaghanang pangutana sa tuo, nagpasabot kana nga kulang kag panahon. Hinuon, wala ka mag-inusara. Halos tanang tawo puliki kaayo—apan kadaghanan sa ilang ginabuhat dili kaayo importante. Nahurot ang ilang panahon sa pag-atiman sa wala damhang mga lihokon sama sa pag-ayog sakyanan, pagpahimuot sa amo, ug pag-atiman sa uban pang kabaldahan. Kon napuliki ka kaayo, mobati ka nga dili na nimo kontrolado ang imong panahon. Basin gani ug mobati ka nga kanunay kang nagdali ug wala nay panahon para sa imong kaugalingon.

Tingali mangatarongan ka nga dili kanunayng ingon niini ang kahimtang. Moabot gayod ang panahon nga moluag ra ang imong eskedyul ug may panahon ka na sa mas hinungdanong mga butang—mga buluhaton nga makapalipay kanimo, sa imong pamilya, ug sa uban. Apan kanus-a? Duna pa bay bakante sa imong eskedyul karong adlawa? Karong semanaha? Sunod bulan?

Ang tinuod, dili gayod matapos ang buluhaton. Apan mahimo nimong paigoon ang imong panahon. Sa unsang paagi?

[Kahon sa panid 3]

Kanus-a nimo ginahatagag panahon ang mga butang nga hinungdanon kanimo?

◯ Kada adlaw

◯ Ma-Sabado ug Dominggo

◯ Wala gayod

Sa ordinaryong adlaw,

◯ Ginahimo ba nimo kon unsay imong giplanong buhaton?

◯ Duna ka bay ginasunod nga rutina nga makababag sa imong plano?

◯ Unahon ba dayon nimo ang motungha nga mga buluhaton nga wala sa imong plano?

Sa ordinaryong adlaw, mobati ka ba nga

◯ Ikaw ang tag-iya sa imong panahon?

◯ Nabug-atan tungod kay daghan kaayo ang gipatrabaho kanimo?

◯ Morag walay kataposan ang imong buluhaton?

Human sa usa ka adlaw nga trabaho, imo bang

◯ Nahimo ang importanteng mga butang?

◯ Nahuman ang mga buluhaton para nianang adlawa, bisag wala nimo ayoha?

◯ Gibati nga wala ka nay panahon sa mas hinungdanong buluhaton?

Unsay sagad nimong bation human sa usa ka adlaw nga trabaho?

◯ Natagbaw ug nalipay

◯ Gikapoy ug tensiyonado

◯ Dili kontento