Pagpaniid sa Kalibotan

“Mga $1,464 bilyones ang nagasto sa gubat sa tibuok kalibotan niadtong 2008. Mas taas kini ug 45 porsiyento kon itandi sa nagasto niadtong 1999.”—STOCKHOLM INTERNATIONAL PEACE RESEARCH INSTITUTE, SWEDEN.

“Sumala sa Google, bilyon-bilyon ka web page ang madugang [diha sa Internet] matag adlaw.”—NEW SCIENTIST, BRITAIN.

“Gibanabana nga 1,020 ka milyong tawo ang gigutom matag adlaw niadtong 2009, ug mao kini ang kinadaghanan sa kasaysayan.”—FOOD AND AGRICULTURE ORGANIZATION OF THE UNITED NATIONS, ITALY.

Unang Kamelyo nga Gi-clone

Sukad na-clone ang unang karnero niadtong 1996, ang mga siyentista naka-clone na sab ug baka, kanding, ug kabayo. Karon, ang mga siyentista sa usa ka laboratoryo sa mga beterinaryo sa Dubai naka-clone ug kamelyo sa unang higayon. Ang clone nga baye ginganlag Injaz, nga sa Arabiko nagkahulogan ug “kalamposan.” “Ang pag-clone ug mga mananap . . . dili na usa ka eksperimento,” miingon ang mantalaang The National sa Abu Dhabi. “Sa umaabot, buot nilang gamiton ang cloning sa pagpreserbar sa maayong rasa sa mga kamelyong pangkarera ug gatasan.”

“Pagbanggaay” sa mga Satelayt

“Nagkadaghan ang satelayt diha sa kawanangan, ug niadtong Pebrero [2009] nahitabo ang grabeng pagbanggaay sa duha ka satelayt sa unang higayon,” miingon ang Science News. Mga 800 kilometros ibabaw sa Siberia, usa ka satelayt sa komunikasyon nga gigamit sa America mibangga sa giabandonar nga satelayt sa militar sa Russia. Tungod sa maong aksidente, mga 700 ka dagkong bahin sa maong mga satelayt ang nagkatag diha sa kawanangan ug posible nga hinungdan na usab kini sa laing aksidente. Sa pagkakaron dunay nakita nga mga 18,000 ka basura diha sa kawanangan nga kapig 10 sentimetros ang gidak-on. Gani, kon ang satelayt o mga sakyanan sa kawanangan makabangga ug basura nga mas dako lag gamay sa liso sa gisantes, kini makapahinabo nag grabeng kadaot.

Dili Moandar Kon Dili Mabayran

“Tagsa ray tawong dili mobayad ug bill sa cellphone kay nahibalo sila nga kon dili sila makabayad, dili na nila kana magamit,” mireport ang The Wall Street Journal. Ingon usab niini ang pamaagi nga gigamit sa mga tigbaligyag segunda-manong sakyanan. “Gitaoran nilag instrumento ang ilang baligyang sakyanan aron ilang mapalong ang makina sa dihang mopalta pagbayad ang kustomer,” sumala sa mantalaan. Apil sa mga kondisyones sa hulogan nga mga sakyanan ang pag-instalar sa maong instrumento diha sa ignition system ug ang pagtangtang niana kon maimpas na pagbayad sa tag-iya. Hinuon, tagsa ray sakyanan nga palongon sa mga tigbaligya kay kon magsiga-siga na ang suga ug mo-alarm ang sakyanan, “matarantar na ang mga kustomer pagbayad,” miingon ang mantalaan.