Gidisenyo ba Kini?

Sungo sa Tikarol

● Ang bullet train sa Japan, nga modagan ug halos 300 kilometros matag oras, mao ang usa sa kinatulinang tren sa kalibotan. Ang usa ka bahin sa disenyo niini gisundog gikan sa usa ka gamayng langgam—ang tikarol o kingfisher. Sa unsang paagi?

Hunahunaa: Inigdayb sa tikarol aron sa pagkuhag pagkaon, ang tubig halos dili mokisaw. Nainteres niana ang inhenyerong si Eiji Nakatsu nga nagdumala sa pagtesting sa dagan sa bullet train. Nahibulong siya nga dili mausab ang katulinon sa tikarol bisan pag motidlom kini sa tubig. Iya kanang giestudiyohan aron masulbad ang sagad nga problema sa pagdagan sa bullet train. Si Nakatsu miingon: “Inigsulod niining paspas nga tren sa hiktin nga tunel, mopatungha kinig kusog kaayong dahunog. Ug tungod niana mireklamo ang mga molupyo bisag 400 metros ang ilang gilay-on gikan sa baba sa tunel.”

Busa ang atubangan sa bullet train gidisenyo nga samag sungo sa tikarol. Unsay resulta? Ang bullet train mas paspas ug 10 porsiyento ug makadaginot ug 15 porsiyentong enerhiya. Mius-os usab ug 30 porsiyento ang dinahunog sa tren, ug dili na kaayo kini banha sa dihang mosulod sa tunel.

Unsay imong hunahuna? Ang sungo ba sa tikarol sulagma lang nga mitungha, o dunay nagdisenyo niini?

[Picture Credit Lines sa panid 29]

Kingfisher diving: Woodfall/Photoshot; bullet train: AP Photo/Kyodo