Talagsaong Pagpitik sa Kasingkasing

● Ang imong kasingkasing mao ang pangunang organo sa sistema sa sirkulasyon sa imong lawas ug kini kugihan kaayo. Kon ikaw adulto, ang imong kasingkasing lagmit mopitik ug kapin sa 100,000 ka beses matag adlaw. Bisag wala ka maglihok, ang imong kasingkasing nagtrabaho gihapon—gani doble ang paghago niini kon itandi sa kaunoran sa imong tiil sa dihang ikaw modagan. Ug kon gikinahanglan, mahimong doblehon niana ang pagpitik sulod lamang sa lima ka segundo. Sa mga adulto, ang gidaghanon sa dugo nga bombahon sa kasingkasing sulod sa usa ka minuto maoy 5 litros—lima ka litro ang gibanabanang gidaghanon sa dugo sa lawas—ug moabot kinig mga 20 litros sa usa ka minuto sa dihang mag-ehersisyo.

Ang maayong pagkadisenyo nga nervous system mao ang nagkontrol sa pinitik sa imong kasingkasing. Ipahinabo niini nga ang ibabawng bahin sa kasingkasing o atria mouna paghiyos kay sa ubos nga bahin o ventricle sa wala pay usa ka segundo. Ang pinitik sa kasingkasing nga madungog sa mga doktor sa ilang stethoscope naggikan sa pagsira sa mga balbula sa kasingkasing ug dili sa pagpitik sa kaunoran niana.

Binilyong Pagpitik

Sagad, ang kasingkasing sa dagkong mananap mas hinay mopitik kay sa gagmayng mananap. Pananglitan, ang aberids nga pinitik sa kasingkasing sa usa ka elepante maoy 25 ka beses matag minuto, samtang ang kasingkasing sa langgam nga kanaryo mopitik ug mga 1,000 ka beses matag minuto! Ang kasingkasing sa bata pagkahimugso mopitik ug mga 130 ka beses matag minuto ug mahimo na lang nga mga 70 ka beses inigkahingkod.

Ang kasingkasing sa kadaghanang mammal mopitik ug mga usa ka bilyon ka beses sa ilang tibuok kinabuhi. Busa ang ilaga, nga ang kasingkasing mopitik ug 550 ka beses matag minuto, mabuhi ug duolan sa 3 ka tuig; samtang ang blue whale, nga ang kasingkasing mopitik lang ug mga 20 ka beses matag minuto, mabuhi ug kapin sa 50 ka tuig. Lahi ang kahimtang sa mga tawo kay kon pagpitik sa kasingkasing ang basehan, kita mabuhi lang unta ug mga 20 ka tuig. Apan ang himsog nga kasingkasing mopitik ug tulo ka bilyong beses o kapin pa ug sa ingon kita mabuhi ug kapin sa 70 o 80 ka tuig! *

Bisan pa niana, walay usa kanato nga gustong mamatay kay naabot na nato ang gitakdang gidaghanon sa pinitik sa kasingkasing. Buot gayod sa tawo nga mabuhi sa walay kataposan. Sa pagkatinuod, normal kini nga pagbati kay gibutang kini sa Diyos diha kanato. Dugang pa, hapit nang moabot ang panahon sa dihang wad-on na ang sala—nga maoy hinungdan sa kamatayon. (Roma 5:12) Sa ingon, “ang kamatayon mawala na,” miingon ang Pinadayag 21:3, 4.

[Footnote]

[Diagram/Hulagway sa panid 29]

(Alang sa aktuwal nga porma, tan-awa ang publikasyon)

HULAGWAY SA KASINGKASING

Tuo nga atrium

Wala nga atrium

Tuo nga ventricle

Wala nga ventricle