Ang Hunahuna sa Bibliya

Angay Ka Bang Pabayron sa Relihiyosong mga Serbisyo?

DIHA sa daghang dapit, ang mga lider sa mga relihiyong nag-angkong Kristohanon ug kadtong dili Kristohanon magpabayad sa ilang relihiyosong mga serbisyo. Lakip niini nga mga serbisyo mao ang bunyag, kasal, o paglubong. Ang bayad mokabat ug ginatos o kaha libo-libo ka pesos.

Ang ubang mga klero suweldado sa gobyerno sa paghimog mga seremonyas ug serbisyo ingong pari o pastor ug sa pag-ampo inigsugod sa sesyon sa mga magbabalaod kada adlaw. Seguro giapresyar sa mga tawo ang ilang mga serbisyo, ug ang simbahan duna poy mga bayranan. Apan giuyonan ba sa Bibliya ang pagpabayad sa maong mga serbisyo o ang pagpabati sa mga tawo nga sila obligado sa pagbayad?

“Balay sa mga Tinda”?

Sa dinhi pa si Jesus sa yuta, gipahimuslan sa Hudiyong mga lider sa relihiyon ang relihiyosong mga okasyon aron makanegosyo, ilabina panahon sa Paskuwa. Giuyonan ba kini ni Jesus? Wala gayod! Gani ang Bibliya nag-ingon nga “giyabo niya ang mga sensilyo sa mga tig-ilis ug salapi ug gipanglintuwad ang ilang mga lamesa.” Siya miingon: “Ihunong na ninyo ang paghimo sa balay sa akong Amahan nga balay sa mga tinda!”—Juan 2:14-16.

Nahitabo usab kini kaniadto sa panahon ni manalagnang Miqueas, kinsa nabuhi sa ika-walong siglo B.C.E. Ang Bibliya nag-ingon nga ang mga lider sa relihiyon sa Israel, ‘nagdumot sa hustisya,’ ug ang mga saserdote ‘nanudlo tungod lamang sa suhol.’ Apan sa samang higayon, sila nangangkon nga gipaluyohan sa Diyos, nga nag-ingon: “Dili ba si Jehova ania man sa atong taliwala?” (Miqueas 3:9, 11) Apan si Jehova nga Diyos wala mouyon sa ilang gibuhat. Hinunoa, siya nasuko sa ilang panggawi ug iyang gipadayag kana pinaagi sa iyang manalagna.

Daghang lider sa relihiyon karon migamit ug susama niini nga mga taktika aron makasapi, busa naghimo sa ilang mga dapit sa pagsimba ingong “balay sa mga tinda.” Gani ang mga organisasyon sa relihiyon sa katibuk-an dunay mga negosyo nga dakog kita, nga sagad pagpamaligyag mga rebulto ug uban pang mga gamit sa pagsimba. a—1 Juan 5:21.

“Nadawat Ninyo nga Walay Bayad, Ihatag nga Walay Bayad”

Sa dihang gisugo ang iyang mga apostoles sa pagwali sa maayong balita, pagpang-ayog mga  masakiton, ug bisan sa pagbanhaw sa mga patay, si Jesus miingon: “Nadawat ninyo nga walay bayad, ihatag nga walay bayad.” (Mateo 10:7, 8) Klaro nga ang iyang matuod nga mga sumusunod gisugo nga dili magpabayad sa ilang mga serbisyo. Si Jesus usab naghatag ug panig-ingnan pinaagi sa pag-alagad sa uban nga walay bayad.

Gisundog ni apostol Pablo ang panig-ingnan ni Jesus pinaagi sa pag-alagad nga “walay bayad.” (1 Corinto 9:18) Kon magkinahanglan siyag kuwarta, siya manahig tolda. (Buhat 18:1-3) Bahin sa iyang kaugalingon ug sa iyang mga kauban sa pagsangyaw, siya miingon: “Kami dili mga tigbaligya sa pulong sa Diyos ingon sa daghang tawo.” (2 Corinto 2:17) Apan komosta ang bahin sa pagpatunghag pondo alang sa galastohan sa kongregasyon, tingali sa pagpalit o pagbayad sa abang sa dapit sa pagsimba?

“Gihigugma sa Diyos ang Malipayong Maghahatag”

Ang mga Saksi ni Jehova makatigom ug gikinahanglang pondo pinaagi sa kinasingkasing nga pag-amot. Ilang gipadapat kini nga prinsipyo: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Busa ang mga Saksi dili magpabayad sa ilang mga basahon o mga serbisyo, sama sa bawtismo, kasal, o paglubong. Sila dili mangayog ikapulo ug dili usab magpasag sibot panahon sa mga tigom. Diha sa ilang mga tigomanan, dunay mga kahon para niadtong buot moamot sa ilang tibuok-kalibotang buluhaton sa pagsangyaw.

Sa tibuok-kalibotan, ang ilang mga Kingdom Hall, Assembly Hall, mga sangang buhatan, ug mga imprentahanan maingon man mga programa sa hinabang gisuportahan pinaagig kinasingkasing nga pag-amot. Ang uban, sama sa kabos nga babayeng balo nga gidayeg ni Jesus, makahatag lang ug gamayng kantidad. (Lucas 21:2) Ang uban makahatag ug dako-dakong amot. Bisag unsa pay kahimtang, kadtong nagpadapat sa mga prinsipyo sa Bibliya ug naghatag sumala sa ilang maarangan nakatagamtam ug katagbawan, dagayang panalangin sa Diyos, ug tinuod nga kalipay.—Buhat 20:35; 2 Corinto 8:12.

[Footnote]

NAKAPAMALANDONG KA BA?

● Unsay giingon ni Jesus niadtong namaligya diha sa templo?—Juan 2:14-16.

● Nagpabayad ba si apostol Pablo sa iyang relihiyosong serbisyo?—2 Corinto 2:17.

● Unsang matanga sa paghatag ang makapahimuot kang Jehova?—2 Corinto 9:7.

[Blurb sa panid 23]

“Ihunong na ninyo ang paghimo sa balay sa akong Amahan nga balay sa mga tinda!”—Juan 2:14-16