Pagkontrolar sa Tensiyon

Ang Bibliya naghisgot bahin sa “lisod nga mga panahon nga punog tensiyon ug problema.” Tingali mouyon ka nga kita nagkinabuhi na nianang panahona.—2 Timoteo 3:1, The Amplified Bible.

NAHIBALO ka nga ang gamayng kalayo mas sayon pagngon kay sa nag-ulbo-ulbong kalayo. Sa susama, ang ginagmayng tensiyon mas daling kontrolahon kay sa grabeng tensiyon nga dugay na nimong gibati. Usa ka doktor miingon nga “kinahanglang atong kontrolahon matag adlaw ang atong tensiyon bisag unsa pa kita ka puliki.” a

Dunay duha ka rason kon nganong kontrolahon nato ang atong tensiyon matag adlaw. Una, atong mamenosan ang mga situwasyon nga makapatensiyon. Ug ikaduha, atong makontrolar ang reaksiyon sa atong lawas sa mga tensiyon nga dili kalikayan.

Ang Bibliya ba dunay giya nga makatabang kanato sa pagsagubang sa tensiyon?

Mga Kamatuoran sa Bibliya Hinungdanon

Pinaagi sa pagtuon sa kamatuoran nga mabasa diha sa Bibliya, atong makat-onan ang makapahupay ug makapalig-ong tambag sa atong Maglalalang. Ang Pulong sa Diyos mao ang tuboran sa mapuslanong giya. Sa pagkatinuod, puno kinig mga kamatuoran nga makapahupay  sa tensiyon. Tungod niini kita dili makalitan o mahadlok, ug atong masagubang usab ang adlaw-adlawng tensiyon.—Josue 1:7-9.

Ang Bibliya makatabang kanato sa pagpamenos sa tensiyon kay kini nagpasalig nga ang atong langitnong Amahan nga si Jehova, “malumo kaayo sa pagmahal ug maluluy-on.” (Santiago 5:11) Si Patricia, nga propesor sa usa ka unibersidad sa California miingon: “Ang nakatabang gayod kanako mao ang pagpamalandong sa kabubut-on sa Diyos ug sa maanindot nga mga butang nga iyang ginahimo.”

Palandonga kon sa unsang paagi ang malumong pulong ug buhat ni Jesu-Kristo nakahupay sa iyang dinaogdaog ug tensiyonadong mga mamiminaw. “Umari kamo, kamong tanan nga nabug-atan ug nabudlayan,” siya nangaliyupo, “ug hatagan ko kamog kapahulayan [sa espirituwal nga diwa].”—Mateo 11:28-30, The New Testament—An Understandable Version; braket ilaha.

Nahiuyon sa iyang gipamulong, si Jesus dili mapintas. Hinunoa, siya mahunahunaon sa emosyonal ug pisikal nga mga panginahanglan sa iyang mga tinun-an, ug iya pa gani silang gipapahulay sa ilang pagsangyaw kanunay. (Marcos 6:30-32) Kita makasalig nga si Jesus, kinsa Hari na karon sa langit, maluoy kanato sa dihang kita matensiyon pag-ayo. Siya maluluy-ong motaganag “tabang sa hustong panahon.”—Hebreohanon 2:17, 18; 4:16.

Ang Papel sa Maayong Komunikasyon

Ang maayong komunikasyon maoy usa sa labing hinungdanong tabang sa pagkontrolar sa tensiyon. Ang Bibliya nagtudlo: “Mapakyas ang mga plano kon walay kompidensiyal nga panagsultihanay, apan diha sa panon sa mga magtatambag adunay kalamposan.” (Proverbio 15:22) Busa nakita sa kadaghanan nga ang pagpakigsulti sa ilang mga kapikas, higala, o kauban sa trabaho nakatabag dako sa pagpamenos sa tensiyon.

Ang labing hinungdanon, mapuslanon, ug daling paagi sa pagpakigsulti mao ang pag-ampo  ngadto sa Diyos. Ang pag-ampo kanunay makatabang kanimo sa dili ‘pagkabalaka sa bisan unsang butang.’ Nakita sa kadaghanan nga pinaagi sa pag-ampo kanunay, ilang nasinati ang “kalinaw sa Diyos nga labaw sa tanang panghunahuna.” Sumala sa saad sa Bibliya, ‘ang kasingkasing ug panghunahuna’ sa mga tawong mainampoon mapanalipdan.—Filipos 4:6, 7; Proverbio 14:30.

Usa ka basahon bahin sa tensiyon nag-ingon nga ang “mga tawong may mga higala nga matinabangon mas makasagubang sa tensiyon ug mas himsog ug pangisip kay niadtong moako sa pagtrabaho sa tanang butang.” Wala nay mas maayo pang matinabangong grupo kay sa grupo nga nagsimba sa matuod nga Diyos, si Jehova. Agig pagsunod sa tambag sa Bibliya, sila regular nga motambong sa mga tigom ug magdinasigay sa usag-usa. (Hebreohanon 10:24, 25) “Usahay mogugol kog taas nga oras sa trabaho, ug tensiyonado kaayo ko,” matod pa sa usa ka tigtambongan ug tigom. “Apan sa motambong kog tigom, akong nakita nga inig-abot na sa paniklop nga pag-ampo mawala ug mahupayan ko sa akong tensiyon.”

Importante usab nga kita dunay sense of humor sa pagsagubang sa tensiyon. Ang Ecclesiastes 3:4 nag-ingon nga dunay “panahon sa paghilak ug panahon sa pagkatawa.” Ang pagkatawa makaparelaks ug makapaayo sa panglawas, kay matod pa sa usa ka doktor, “sa dihang kita mokatawa, ang lawas mopatunghag mga endorphin nga makasanta sa paggamag adrenaline.” Usa ka asawa miingon: “Ang akong bana magpakatawa sa panahong grabe ang tensiyon, ug nakatabang kanag dako.”

Mga Hiyas nga Makapamenos sa Tensiyon

Ang Bibliya nagpasiugdag mga hiyas nga makapamenos sa tensiyon. Lakip niining mga  hiyasa mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, [ug] pagpugong-sa-kaugalingon,” nga gitawag ug “bunga sa espiritu” sa Diyos. Dugang pa, ang Bibliya nag-awhag kanato sa paglikay sa “mapangdaot nga kayugot ug kasuko ug kapungot ug sininggitay ug mapasipalahong sinultihan.” Kini midugang: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa.”—Galacia 5:22, 23; Efeso 4:31, 32.

Usa ka doktor miingon nga hinungdanong ipadapat ang maong mga tambag sa Bibliya, ilabina sa atong panahon karon. Siya midugang nga “mamenosan gayod ang tensiyon kon matinahoron ka sa mga tawo.” Ang Bibliya makatabang usab kanato nga magmapainubsanon, nga sa ato pa, makamao kitang modawat sa atong mga limitasyon.—Miqueas 6:8.

Buot sa Diyos nga atong ilhon ang atong pisikal, mental, ug emosyonal nga mga limitasyon ug nga dili nato mahimo ang tanang butang nga gusto natong buhaton. Bisag unsa pa ka lisod, kinahanglang dili nato pugson ang atong kaugalingon sa pagbuhat ug usa ka butang nga dili nato arang mahimo.

Wala kini magpasabot nga kon ipadapat kini nga mga tambag sa Bibliya, dili ka na matensiyon. Ang tinuod, nagtinguha si Satanas nga Yawa nga matensiyon ang mga magsisimba sa Diyos aron ilang isalikway ang matuod nga pagsimba. (Pinadayag 12:17) Apan sumala sa atong nakita, dunay daghang paagi nga ang Diyos nagtaganag tabang sa pagpamenos ug pagsagubang sa tensiyon. b

[Mga footnote]

[Kahon sa panid 9]

MGA PAAGI SA PAGPAMENOS SA TENSIYON

● Isipa nga ikaw ug ang uban dunay mga limitasyon.—Ecclesiastes 7:16.

● Unaha ang mas hinungdanong butang.—Filipos 1:10, 11.

● Pag-ehersisyo kanunay.—1 Timoteo 4:8.

● Kalipayi ang kalalangan ni Jehova.—Salmo 92:4, 5.

● Paggahin ug panahon nga mag-inusara.—Mateo 14:23.

● Paggahin ug igong panahon sa paglingaw-lingaw ug pagkatulog.—Ecclesiastes 4:6.

[Hulagway sa panid 7]

Ang pagpakig-estorya makatabag dako sa pagpamenos sa tensiyon

[Hulagway sa panid 7]

Ang pag-ugmad ug diyosnong mga hiyas makatabang sa pagpamenos sa tensiyon