Pagpaniid sa Kalibotan

“Niadtong Enero 2009, walo ka estado ang dunay kapin sa 23 ka 300-nukleyar nga mga hinagiban.”—STOCKHOLM INTERNATIONAL PEACE RESEARCH INSTITUTE, SWEDEN.

Sa Aprika, libo-libong tubo nga giugbok sa yuta, atabay, mga bomba sa tubig—nga ang kadaghanan bag-o pang gihimo sa tabang sa ubang nasod— nangadaot “tungod sa simple ug kalikayang rason: wala mamentinar.”—INTERNATIONAL INSTITUTE FOR ENVIRONMENT AND DEVELOPMENT, BRITANYA.

Gi-scan sa mga Siyentipiko ang Anak sa Mammoth

Nakuhaag detalyadong mga hulagway sa mga siyentipiko sa Rusya ang organo sa sulod sa lawas sa usa ka mammoth. Kini nga mananap—mga tulo o upat ka bulan ang edad dihang namatay—tibuok pa nga nakit-an diha sa yelo sa Yamalo-Nenets sa rehiyon sa Arctic Russia. “Kini ang labing maayong pagkapreserbar nga espisimen dili lang sa mammoth kondili sa tanang mananap nga nabuhi sa panahong wala pa magrekord ang tawo ug kasaysayan,” miingon si Alexei Tikhonov, ang luyo-luyong direktor sa Russian Academy of Science’s Zoological Institute. Ang computer tomography, nga susama nianang gigamit sa pag-scan sa mga tawong pasyente, nagpakita nga walay diperensiya ang mga organo sa lawas niini. Sanglit ang sistema sa respiratoryo ug ang tinai niini nabarahan ug daw mga balas-balas, ang mga siyentipiko nakahinapos nga kining mananapa “posibleng nalumos.”

Sayon nga Diborsiyo

Mas sayon na karon ang pagkuhag diborsiyo sa Mexico City, miingon ang mantalaang El Universal. Sa 2008, giwala na diha sa ilang balaod ang 21 ka hinungdan sa pagdiborsiyo, sama sa pagpanapaw, pagmaltrato, ug uban pa. Ang buhaton na lang karon niadtong buot makigdiborsiyo mao ang pagdeposito ug mga $400 (U.S.) sa bank account sa usa ka law office ug pagpadala ngadto sa korte ug aplikasyon, nga makuha diha sa Internet, nga iyang isulat diha niana nga siya wala na mahigugma sa iyang kapikas. Dili na kinahanglan ang desisyon sa huwes. Duha ngadto sa upat lang ka bulan makuha na ang sertipiko sa diborsiyo, dili sama kaniadto nga modagan pag pila ka tuig. Ang bahin sa kon kinsay manag-iya sa mga anak, sustento, pagbahin-bahin sa mga propiedad, ug uban pa, husayon na lang sa ulahi.

Humming Bird—Mas Kusog Pa kay sa Fighter Jet

Kon ibase sa gitas-on sa lawas, ang nagdayb nga hummingbird mas kusog molupad kay sa fighter jet, miingon ang usa ka tigdukiduki sa University of California, Berkeley, U.S.A. Nakuhaag video ni Christopher Clark ang naglupad nga laki nga Anna’s hummingbird nga nagpaibog ug baye, ug siya nagbanabana nga inigdayb, 400 ka pilo sa gitas-on sa lawas niini ang iyang malupad matag segundo. Kini nga gikusgon “mas kusog pa sa gihurot pagpatoda nga fighter jet,” miingon si Clark. Inigsaka gikan sa pagdayb, sungsongon niini ang puwersa nga napulo ka pilo sa puwersa sa grabidad—nga dili na maagwanta sa mga piloto sa fighter jet kay niini nga gikusgon, sila mawad-an nag panimuot.