“Ang Pagtuon sa Bibliya Nakatabang sa mga Amang”
“Ang Pagtuon sa Bibliya Nakatabang sa mga Amang”
MAO kini ang ulohan sa usa ka artikulo sa magasin para sa mga amang didto sa Czech Republic. Gidayeg sa magsusulat nga si Zdeněk Straka ang mga Saksi ni Jehova sa ilang pagtuon ug senyas nga pinulongan sa pagtabang sa mga amang.
Unsay nakaaghat kang Mr. Straka sa pagsulat sa maong artikulo? Niadtong ting-init sa 2006, mitambong siya sa kombensiyon sa mga Saksi ni Jehova sa Prague, diin ang programa gihubad sa senyas nga pinulongan alang sa mga 70 ka amang nga mitambong. Tuig-tuig, ang mga Saksi ni Jehova naghikay ug mga kombensiyon sa tibuok kalibotan aron sa pagtudlo bahin sa Bibliya ug sa pagdinasigay sa usag-usa. Lakip niana ang mga amang. Sa dili pa dugayng tuig nga milabay, 96 niini nga mga kombensiyon gihimo alang lang sa senyas nga pinulongan sa tibuok kalibotan ug sa laing 95 ka lokasyon, ang programa gihubad alang sa mga amang.
Sa panahon sa kombensiyon sa Prague, ang kongregasyon sa senyas nga pinulongan nianang siyudara nagdumalag pagtuon sa Bibliya sa mga 30 ka amang. Kadtong nagtuon sa Bibliya nakabenepisyo sa ilang nakat-onan, ingon sa gipakita sa mosunod nga eksperyensiya.
Si Markéta mobiyaheg kapin sa 100 kilometros matag semana aron sa pagdumalag pagtuon sa Bibliya sa usa ka amang nga taga-Mongolia. Ang senyas nga pinulongan sa Czech lahi nianang sa Mongolia, busa si Markéta mangitag paagi aron makasabot ang iyang estudyante sa ilang ginatun-an. Tungod niini, nagantihan ang paningkamot ni Markéta. Ang estudyante ni Markéta nga nagsabak sa iyang ikaduhang anak nagplano sa pagpakuha sa bata, apan nausab ang iyang hunahuna. Si Markéta miingon, “Dihang gipangutana nako siya bahin niana, siya misenyas sa pagtubag, ‘Supak si Jehova sa aborsiyon.’ Nalipay ako nga siya nakasabot sa panglantaw sa Diyos bahin sa kinabuhi!” a
Sa tibuok kalibotan, daghang amang ang nakabaton sa tukmang kahibalo sa Diyos pinaagi sa pagtuon sa iyang Pulong. Sa dihang sila magpakigsuod sa ilang Diyos ug mahimong mas malipayon, ang ilang kinabuhi nahimong mas makahuloganon.—Isaias 48:17, 18.
[Footnote]
a Alang sa dugang impormasyon labot sa panglantaw sa Bibliya bahin sa aborsiyon, tan-awa ang Pagmata! sa Hunyo 2009, panid 3-9.
[Kahon sa panid 26, 27]
NAHIBALO KA BA?
● Ang mga Saksi ni Jehova naghimog mga programa diha sa DVD sa 43 ka senyas nga pinulongan. Dunay mga impormasyon nga ma-download para sa amang diha sa Web site nga www.pr418.com.
● Aron makabaton pag dugang nga mga publikasyon ang mga amang, ang mga Saksi ni Jehova nag-organisar ug 59 ka grupo sa mga tighubad sa senyas nga pinulongan sa tibuok kalibotan.
● Dunay kapin sa 1,200 ka kongregasyon sa senyas nga pinulongan sa mga Saksi ni Jehova sa tibuok kalibotan.
[Diagram sa panid 26]
(Alang sa aktuwal nga pagkahan-ay, tan-awa ang publikasyon)
www.pr418.com