Ang Hunahuna sa Bibliya

Angay Bang Mahimong Ministro ang mga Babaye?

“NAHIBULONG ko ug nasuko nga walay kausaban ang kahimtang sa mga babaye kon bahin sa pagkahimong ordinado,” misulat ang usa ka Katolikong babaye ngadto sa mantalaang USA Today. Daghan ang mibati usab ug ingon niana tungod kay sa ubang mga relihiyon, ang mga babaye nag-alagad ingong mga ministro, pari, obispo, ug mga rabbi.

Ang mga relihiyon niadtong nagdili sa mga babaye nga mahimong mga ministro ug kadtong nagtugot kanila sa pagwali diha sa pulpito, nangangkon nga nagsunod sa Kasulatan. Apan ang Bibliya wala magpaluyo niining duha ka panglantaw. Ngano? Sa pagtubag, atong konsiderahon una kon giunsa paggamit sa Bibliya ang pulong “ministro.”

Unang-Siglong mga Ministro

Unsay kahulogan alang kanimo sa pulong “ministro?” Ang mosantop dayon sa hunahuna sa kadaghanan mao ang usa ka lider sa relihiyon, lalaki man o babaye, kinsa nagdumalag usa ka kongregasyon alang sa pagsimba. Apan gigamit sa Bibliya ang pulong sa daghang kahulogan. Tagda ang Kristohanong babaye nga ginganlag Febe, kinsa gipailaila ni apostol Pablo ingong “atong igsoong babaye, nga usa ka ministro sa kongregasyon sa Cencrea.”—Roma 16:1.

Imo bang mahanduraw si Febe nga nagtindog atubangan sa kongregasyon sa Cencrea, nga nagdumalag usa ka relihiyosong serbisyo? Unsang matanga sa pag-alagad ang gihimo ni Febe? Diha sa sulat ni Pablo alang sa mga taga-Filipos, siya miingon nga dunay pipila ka babaye nga “nag-alagad uban nako . . . sa pagwali sa maayong balita.”—Italiko amoa; Filipos 4:2, 3, Contemporary English Version.

Ang pangunang paagi sa pagsangyaw sa maayong balita sa unang-siglong mga Kristohanon mao ang sa “publiko ug sa balay ug balay.” (Buhat 20:20) Kadtong nakigbahin nianang buluhatona maoy mga ministro. Naglakip kana sa mga babaye sama kang Priscila. Siya, uban sa iyang bana, ‘nagpatin-aw sa dalan sa Diyos sa mas husto nga paagi’ ngadto sa usa ka diyosnong tawo nga wala pa mabawtismohi ingong Kristohanon. (Buhat 18:25, 26) Sama kang Febe, si Priscila lagmit maoy usa ka epektibong ministro—maingon man ang daghan pang mga babaye.

Usa ka Dungganong Papel

Ang pag-alagad ba alang sa katawhan maoy usa ka gamayng asaynment, nga dili kaayo importanteng buluhaton nga gihatag ngadto sa mga babaye samtang ang mga lalaki maoy nag-akata sa importanteng buluhaton sa pagdumala sa kongregasyon? Dili gayod, tungod kini sa duha ka katarongan. Una, gipatin-aw sa Bibliya nga ang tanang Kristohanon—lakip sa mga lalaki nga dunay dakong mga responsibilidad sa kongregasyon—kinahanglang makigbahin usab sa pagsangyaw. (Lucas 9:1, 2) Ikaduha, ang pag-alagad alang sa katawhan kaniadto ug karon mao ang pangunang paagi sa pagtuman sa Kristohanong mga lalaki ug  babaye sa sugo ni Jesus sa ‘paghimog mga tinun-an sa katawhan sa tanang kanasoran, . . . nga magatudlo kanila.’—Mateo 28:19, 20.

Adunay laing hinungdanong papel ang ubang mga babaye diha sa kongregasyon. Si Pablo misulat: ‘Tugoti nga ang tigulang nga mga babaye mahimong . . . mga magtutudlo sa maayo; aron ilang ikapasig-uli ang batan-ong mga babaye sa ilang kaamgohan sa paghigugma sa ilang mga bana, sa paghigugma sa ilang mga anak.’ (Tito 2:3, 4) Busa ang hamtong nga mga babaye nga sinati sa Kristohanong pagkinabuhi dakog papel sa pagtabang sa mas batan-on ug kulag eksperyensiya nga mga babaye sa pagkahimong hamtong. Kana usab maoy dungganon ug dako nga responsibilidad.

Pagpanudlo Diha sa Kongregasyon

Apan walay giingon ang Bibliya nga gisugo ang mga babaye sa pagpanudlo atubangan sa kongregasyon. Hinunoa, giingnan sila ni apostol Pablo nga “magpakahilom diha sa mga tigom.” Ngano? Siya misulat nga ang usa ka rason maoy aron ang mga butang mahimo “sa husto ug sa hapsayng paagi.” (1 Corinto 14:34, 40, Today’s English Version) Aron hapsay ang kongregasyon, ang papel sa pagpanudlo gitudlo sa Diyos diha sa usa ka grupo. Apan matikdi nga ang usa ka tawo dili hatagan ug responsibilidad sa pagpanudlo sa kongregasyon tungod lang kay lalaki siya; kini ihatag lamang ngadto sa mga lalaki nga kuwalipikado gayod. a—1 Timoteo 3:1-7; Tito 1:5-9.

Ubos ba ang papel nga gihatag sa Diyos ngadto sa mga babaye? Dili. Hinumdomi nga gihatagan sila ni Jehova nga Diyos ug importanteng buluhaton—ang pagpamatuod bahin kaniya ngadto sa katawhan. (Salmo 68:11) Taliwala sa mga Saksi ni Jehova karon, ang mga lalaki ug babaye nga nag-alagad sa katawhan nakatabang ug milyon-milyon sa paghinulsol ug pagbatog kaluwasan. (Buhat 2:21; 2 Pedro 3:9) Dili kana tiaw nga buluhaton!

Ang kahikayan alang sa mga lalaki ug mga babaye makahatag ug kalinaw ug sa samang higayon makapasidungog sa usag-usa. Sa pag-ilustrar: Ang mata ug dalunggan dunay kaugalingong papel sa pagtabang sa tawo sa pagtabok sa trapik kaayo nga dalan. Sa susama, kon tumanon sa lalaki ug babaye ang kabubut-on sa Diyos sumala sa papel nga gisangon kanila, panalanginan sa Diyos ang kongregasyon ug kalinaw.—1 Corinto 14:33; Filipos 4:9. b

[Mga footnote]

NAKAPAMALANDONG KA BA?

● Sa unsang paagi nanudlo ang mga babaye diha sa Kristohanong kongregasyon sa unang siglo?—Buhat 18:26.

● Kinsay gitudlo sa pagdumala sa kongregasyon?—1 Timoteo 3:1, 2.

● Unsay paglantaw sa Diyos bahin sa ministeryo sa Kristohanong mga babaye karon?—Salmo 68:11.

[Blurb sa panid 29]

“Si Jehova nag-ingon; ang kababayen-an nga nagapahayag sa maayong balita maoy usa ka dakong panon.”—SALMO 68:11