“Ayaw Kamo Kabalaka sa Sunod nga Adlaw”

Halos dili na maagwanta ni Renée ang iyang kabalaka. Ang iyang bana nga si Matthew, walay tarong nga trabaho kapin na sa tulo ka tuig. “Bug-at kaayo ang akong dughan,” nahinumdom si Renée. “Naluya gyod ko kay wala ko mahibalo kon unsay dangatan namo!” Gihupay ni Matthew ang iyang asawa pinaagi sa pag-ingon nga ang ilang mga panginahanglan natagan-an ra man. “Pero wala gihapon kay trabaho!” Si Renée mitubag. “Nagkinahanglan tag kuwarta!”

ANG pagkataktak sa trabaho makapabalaka. ‘Kanus-a pa man ko makakitag trabaho?’ tingali mangutana ang tawong walay trabaho. ‘Unsa may atong isapal sa atong galastohan sa pagkakaron?’

Bisag normal ang pagkabalaka niana, si Jesu-Kristo naghatag ug praktikal nga tambag nga makahupay sa kabalaka. Siya miingon: “Ayaw kamo kabalaka sa sunod nga adlaw . . . Ang matag adlaw adunay iyang kaugalingong kabalaka.”—Mateo 6:34, The New Jerusalem Bible.

Sayra ang Imong mga Gikabalak-an

Si Jesus wala mag-ingon nga molihok kita nga morag wala kitay problema. Apan ang pagkabalaka sa kon unsay lagmit mahitabo sa sunod adlaw makapabug-at lang sa pagbati. Sa pagkatinuod, dili kaayo kita makakontrolar sa mahitabo sa umaabot. Apan duna kitay mahimo sa pagsagubang sa atong presenteng kahimtang.

Sayon lang kining isulti apan lisod buhaton! Si Rebekah, kansang bana walay trabaho sulod na sa 12 ka tuig, miingon: “Kon grabe ang imong kabalaka,  dili ka na makahunahunag tarong. Pero kinahanglan gyod. Busa naningkamot ko nga magmakalmado. Sa dihang ang akong gikahadlokan wala mahitabo, akong nakita nga walay kapuslanang mabalaka. Kon ang presente lang nga problema ang atong hunahunaon, dili kita matensiyon.”

Pangutan-a ang imong kaugalingon: ‘Unsay akong gikabalak-an pag-ayo? Mahitabo ba gyod kaha ang akong gikabalak-an? Unsa ka grabe ang akong pagkabalaka sa mga butang nga posibleng mahitabo o dili mahitabo?’

Magmakontento

Ang atong panglantaw makaapektar sa atong emosyon. Busa ang Bibliya nagdasig niini nga tinamdan: “Kon kita adunay makaon ug ikabesti, kita magmakontento na niining mga butanga.” (1 Timoteo 6:8) Kon kita kontento, dili nato patuyangan ang atong gusto ug tagbaw na kita dihang ang atong adlaw-adlawng panginahanglan matagan-an na. Ang pagpangamas sa pagbatog mas daghan pa makadaot sa imong paningkamot sa pagpasimple sa imong kinabuhi.—Marcos 4:19.

Si Renée nakakat-on sa pagkakontento human makapamalandong sa iyang tinuod nga kahimtang. Siya miingon: “Wala pa kami sukad maputlig koryente ug mahutdag gas, wala pod mahitabo nga wala kami makabayad ug abang sa balay. Ang problema, wala kami maanad sa ingon niini nga pagkinabuhi, ug ang akong pagdumili sa pagdawat sa among presenteng kahimtang nakapasamot sa akong kaguol.”

Naamgohan ra ni Renée nga ang iyang panglantaw—dili ang iyang kahimtang—ang nagpalisod kaniya. “Kinahanglang dawaton nako ang among kahimtang ug dili na maghunahuna pa sa kon unsay akong gustong mahitabo,” siya miingon. “Mas malipayon na ako sa dihang nagmakontento ako sa kon unsay itagana sa Diyos adlaw-adlaw.”

Pangutan-a ang imong kaugalingon: ‘Ang ako bang panginahanglan karong adlawa natagan-an ra? Kon mao, makahimo ba ako nga ang problema lang karong adlawa ang akong hunahunaon, nga masaligon nga ang akong mga panginahanglan sa umaabot matagan-an ra?’

Ang pagbaton ug hustong panglantaw mao ang unang lakang sa pag-atubang sa problema sa pagkinabuhi nga menos ang kita. a Apan unsang praktikal nga mga lakang ang imong mahimo kon menos na ang imong kita tungod sa kawalay trabaho?

[Footnote]

[Kahon sa panid 5]

Pagkamalahutayon Mabaslan Ra!

Human sa daghang semana sa pagpangitag trabaho, si Fred daw nawad-an ug paglaom. “Sama ra kadtog naghulat kag tawo diha sa hunonganan ug bus apan walay miabot sa pagkuha nimo,” siya miingon. Si Fred nakadesisyon sa pagkontrol sa usa ka butang nga iyang makontrol—ang iya mismong lihok. Nagpadala siyag aplikasyon sa mga kompaniya bisan niadtong wala magkinahanglan sa iyang kahanas. Iyang gi-follow up ang tanang kompaniya nga iyang giaplayan ug nangandam pag-ayo sa matag interbiyo, nga kombinsido nga “ang mga plano sa kugihan mosangpot gayod sa kaayohan.” (Proverbio 21:5) Si Fred miingon, “Sa usa ka kompaniya, duha ka beses kong giinterbiyog maayo sa mga manedyer.” Ang pagkamalahutayon ni Fred nabaslan ra. “Nadawat ko sa trabaho!” siya miingon.

 [Kahon/Hulagway sa panid 6]

Ang Mas Importante kay sa Kita

Unsa ang mas importante—imong kinaiya o imong kita? Tagda ang duha ka panultihon sa Bibliya.

“Maayo pa ang kabos nga nagalakaw sa integridad kay kaniya nga baliko sa iyang mga dalan, bisan pag siya dato.”—Proverbio 28:6.

“Mas maayo pa ang pagkaong utanon diin anaay gugma kay sa pinatambok nga torong baka nga inubanan sa pagdumot.”—Proverbio 15:17.

Nan klaro nga ang maayong kinaiya ug ang imong pagkatawo dili mawala bisag menos kag kita. Busa sa nawad-ag trabaho ang bana ni Renée, iyang gisultihan ang iyang mga anak: “Daghang amahan mobiya sa ilang mga pamilya. Apan wala gayod kamo biyai sa inyong amahan. Nahibalo kamo nga gimahal mo niya pag-ayo ug gitabangan sa tanan ninyong mga problema. Dili na kamo makakitag laing amahan nga mas maayo pa kay kaniya!”