Gisusi sa Abogado ang mga Saksi ni Jehova

“WALA kaayo koy nahibaloan bahin sa mga Saksi ni Jehova,” miingon si Les Civin, nga abogado ug direktor sa usa ka law firm sa South Africa. Nganong iya mang gisusi ang mga pagtulon-an sa mga Saksi? Unsay iyang nahinapos? Kini ang iyang giingon sa Pagmata!

Unsay imong relihiyon kaniadto?

Judaismo ang akong tinuohan, apan sa unang bahin sa katuigan sa 1970, naminyo ako kang Carol nga usa ka Anglikano. Wala siyay interes sa relihiyon, ug kaniadto dili kaayo importante namo ang relihiyon. Apan dihang nag-otso anyos ang among anak nga si Andrew, nakaamgo si Carol nga kinahanglang kami dunay himoon aron ang among anak magdako nga dunay relihiyon. Giingnan ako sa rabbi nga kon makombertir si Carol sa Judaismo, si Andrew awtomatiko nga mahimong Hudiyo ug pahinungdan siyag seremonyas nga Bar Mitzvah pagtungtong niyag 13. Busa nagsugod kami ni Carol pagtambong ug senemanang mga klase sa Judaismo diha sa sinagoga.

Sa unsang paagi nimo nahimamat ang mga Saksi ni Jehova?

Sa dihang moduaw ang mga Saksi, ako dayon silang sultihan, “Ang among relihiyon Judaismo ug dili kami motuo ug Bag-ong Tugon.” Unya gisultihan ako ni Carol nga duna siyay amiga nga Saksi ug nga daghan kaayo siyag nahibaloan sa Bibliya. Giingnan ako ni Carol nga maayong magtuon kamig dugang bahin sa Bibliya. Busa misugot na lang ko sa pagtuon uban sa mga Saksi.

Unsay imong reaksiyon sa imong pagtuon sa Bibliya?

Dako kaayo kog garbo. Ang akong pagtuo ingong Hudiyo napukaw pag-usab ug nagtuo nga sakop ako sa usa ka piniling nasod. Miingon ko sa akong kaugalingon, ‘Unsa may ikatudlo niining mga tawhana nako?’ Sa among unang pagtuon, akong gisultihan ang Saksi nga miduaw namo: “Natawo ako nga Hudiyo. Kon unsay akong namat-an maoy akong pakamatyan. Bisag unsa pay inyong isulti, dili gyod ko ninyo makabig.” Iyang gitahod ang akong baroganan. Busa sa mga gabii sa Biyernes ug Lunes, motambong kami sa mga pagtuon sa Judaismo ug matag Dominggo sa buntag (kon dili ko makaikyas) magtuon kami uban sa mga Saksi. Ang ilang mga pagtuon walay bayad, dili sama sa mga klase sa sinagoga.

Gigamit nako ang akong Hudiyonhong Bibliya kay nagtuo ko nga naggamit ang mga Saksi ug hubad nga mopabor sa ilang ginatudlo. Apan nakurat ko kay kining duha ka Bibliya wala gayod magkasumpaki. Misamot na hinuon ko ka porsigido sa pagpamatuod nga ang mga Saksi wala mahibalo sa ilang gipanulti.

 Human makatambong ug pipila ka klase nga gidumala sa mga rabbi, miingon si Carol nga para niya ang rabbi wala kaayoy alamag sa iyang Bibliya. Iya akong giingnan nga dili na siya magpatuon sa rabbi ug nga motuo na siya kang Kristo. Sa akong kaguol, nakahunahuna ko sa pagpakigbulag kaniya. Apan sa naulian ako, nakahunahuna kog laing estratehiya—akong gamiton ang akong pagkaabogado sa pagpamatuod kang Carol nga sayop kining binuang nga sekta.

Milampos ka ba?

Gihatagan ako sa usa ka rabbi ug libro nga gituyo pagsulat sa pagpanghimakak nga ang mga tagna bahin sa Mesiyas wala matuman kang Jesus. Desiotso ka bulan namong gitun-an ni Carol kadtong libroha. Nagpadayon usab kami sa among senemanang pagtuon uban sa mga Saksi. Apan samtang among gisusi ang matag tagna nga gihisgotan sa libro sa rabbi, misamot ang akong pagduhaduha. Lahi sa pangatarongan diha sa libro, ang mga tagna bahin sa Mesiyas diha sa Bibliya nagpunting gayod sa usa lang ka persona—si Jesu-Kristo. Mas mitin-aw kining tanan sa dihang among gitun-an ang tagna sa Daniel 9:24-27, nga nagtagna nga ang Mesiyas motungha sa tuig 29 C.E. a Ang mga Saksi nagpatik ug interlinear sa Hebreohanong Bibliya nga literal nga pagkahubad sa Iningles ubos sa matag pulong. Akong gisusi ang mga pulong, giihap nako mismo ang mga tuig sumala sa rekord sa kasaysayan sa Bibliya, ug miingon: “Okey, ang tagna mosangko sa tuig 29 C.E. Unya unsa may labot niini kang Jesus?”

“Nianang tuiga gibawtismohan si Jesus,” miingon ang Saksi.

Nakuratan ko! Nahingangha ko sa katukma sa mga tagna sa Bibliya ug sa kaharmonya niini.

Unsay reaksiyon sa imong mga higala sa kausaban sa imong panglantaw?

Ang uban nabalaka pag-ayo ug nanaad nga ila kaming ipailaila sa mga tawo kinsa mopamatuod kanamo nga kami na-brainwash. Apan ang among pagtuo gipasukad sa detalyadong pagsusi ug tin-awng pangatarongan—nga kasukwahi kaayo kon ang usa na-brainwash.

Nganong nakadesidir ka sa pag-Saksi?

Sa primero, nagsugod ako sa pagtambong ug pipila ka tigom diha sa Kingdom Hall uban sa akong asawa, kinsa Saksi na niadtong higayona. b Nakadayeg gyod ko sa pagkamahigalaon sa mga Saksi ug sa ilang gugma sa usag usa, bisag unsa pay rasa. Wala nako kini masinati sa akong relihiyon. Busa human sa mga tulo ka tuig nga pagtuon, gibawtismohan ako.

Unsay imong gibati sa imong desisyon nga mag-Saksi?

Dako kaayong dungog ang pag-ingon nga, “Saksi ni Jehova ko.” Apan sa mamalandong ko sa akong pagsupak sa kamatuoran kaniadto, mobati ako nga dili takos sa pagdawat sa espirituwal nga mga panalangin nga gihatag ni Jehova kanako. Wala gayod ako magmahay sa akong desisyon.

Unsang mga panalangin ang imong natagamtam?

Daghan. Una, nalipay kaayo ko sa pribilehiyo sa pag-alagad ingong ansiyano, o espirituwal nga magbalantay ug magtutudlo sa among kongregasyon. Dugang pa, nakatabang ako sa Legal Department sa sangang buhatan sa mga Saksi ni Jehova sa South Africa. Apan ang kinadak-ang panalangin nga akong nadawat mao ang pagkaila kang Jehova ug sa iyang Anak ug ang pagkasabot sa tinuod nga kahulogan sa atong panahon ug sa dagkong mga panghitabo nga nakapakurat sa kalibotan.

[Mga footnote]

[Blurb sa panid 11]

Nahingangha ako sa katukma sa mga tagna sa Bibliya ug sa kaharmonya niini