Mga Pangutana nga Kanunayng Gisukna

Nganong ginadaot man sa ubang tawo ang mga Saksi ni Jehova?

Daghang tawo wala lang mahibalo sa tinuod. Ang uban tingali wala makaangay sa ilang pagsangyaw. Apan ang tinuod, ang mga Saksi nagsangyaw tungod sa ilang gugma sa silingan, kay sila nahibalo nga ang “matag usa nga magatawag sa ngalan ni Jehova maluwas.”—Roma 10:13.

Ang mga Saksi ni Jehova ba mga Protestante, Pundamentalista, o usa ka sekta?

Ang mga Saksi ni Jehova maoy mga Kristohanon, apan dili sila mga Protestante ni mga Katoliko—sila nahibalo nga ang ubang mga doktrina niining mga relihiyona dili pinasukad sa Kasulatan. Pananglitan, ang Bibliya wala magtudlo nga ang Diyos—ang personipikasyon sa gugma—magpaantos sa mga tawo hangtod sa hangtod diha sa nagdilaab nga impiyerno. Wala usab sila magtudlo nga ang tawo dunay kalag nga dili mamatay o nga ang mga Kristohanon mag-apil-apil sa politika.—Ezequiel 18:4; Juan 15:19; 17:14; Roma 6:23. a

“Ang pundamentalismo maoy usa ka dakong kalihokan sulod sa Protestantismo didto sa Amerika,” nag-ingon ang The World Book Encyclopedia. Ang ubang mga organisasyon sa Pundamentalista “naghupot ug pangatilingban ug politikanhong posisyon pinasukad sa ilang literal nga pagsabot sa mga teksto sa Bibliya.” Dili ingon niana ang mga Saksi ni Jehova. Sumala sa gihisgotan na, sila dili mag-apil-apil sa politika ug dili nila ipamugos ang ilang hunahuna sa uban pinaagi sa politikanhon o ubang mga paagi. Hinunoa, sila makigsulti sa mga tawo, nga kasagaran sa personal, pinaagi sa pagpangatarongan ug pagpresentar ug lig-ong ebidensiya, sama sa unang mga Kristohanon.—Buhat 19:8.

Ang sekta maoy usa ka grupo nga mibulag sulod sa usa ka relihiyon sa tuyo nga makatukod ug bag-ong relihiyon. Ang mga Saksi ni Jehova dili maoy usa ka grupo nga mibulag gikan sa bisan unsang relihiyon. Sila dili usa ka sekta.

Unsay ginahimo diha sa tigom sa mga Saksi?

Ang ilang mga tigom, nga bukas sa tanan, maoy mga pagtuon sa Bibliya diin ang mga mamiminaw makahatag ug komento. Ang usa sa ilang senemanang mga tigom, ang Teokratikanhong Tunghaan sa Ministeryo, magtabang sa mga membro sa kongregasyon sa pagpauswag sa katakos sa pagpanudlo, pagbasa, ug pagpanukiduki. Dugang pa, duna usay 30-minutos nga pakigpulong sa Bibliya bahin sa usa ka ulohan nga makapainteres sa mga dili Saksi. Kini sagad sundan sa pagtuon sa Bibliya pinaagi sa magasing Bantayanang Torre.  Ang mga tigom sugdan ug taposon pinaagig awit ug pag-ampo, ug walay pagpangolekta nga himoon o sibot nga ipasa.—2 Corinto 8:12.

Sa unsang paagi gisuportahan sa pinansiyal ang buluhaton sa mga Saksi ni Jehova?

Gisuportahan kini pinaagi sa kinasingkasing nga mga kontribusyon. Ang mga Saksi dili magpabayad sa pagbawtismo, pagkasal, paglubong, o bisan sa ubang relihiyosong serbisyo. Dili usab sila maningil ug ikapulo. Ang tanang gustong moamot makahimo niana pinaagi sa paghulog diha sa kahon para sa kontribusyon diha sa Kingdom Hall. Ang mga Saksi ni Jehova nagpatik ug literatura sa Bibliya nga ilang gigamit, nga nakapamenos sa gasto, ug ang ilang simpleng mga Kingdom Hall ug mga pasilidad sa sanga kasagaran gitukod sa mga boluntaryo.

Ang mga Saksi ni Jehova modawat bag pamaagi sa pagtambal?

Siyempre. Sa pagkatinuod, sila mangitag kinamaayohang paagi sa pagtambal alang sa ilang kaugalingon ug sa ilang mga minahal. Dugang pa, daghang Saksi nagtrabaho ingong mga nars, paramedic, doktor, ug siruhano. Apan ang mga Saksi ni Jehova dili magpaabonog dugo. Ang Bibliya nag-ingon: ‘Magpahilayo gikan sa dugo,’ (Buhat 15:28, 29) Makaikag, nagkadaghang doktor naglantaw sa paagi sa pagtambal nga dili gamitag dugo ingong kinamaayohan, kay pinaagi niini malikayan ang daghang komplikasyon tungod sa paggamit ug mga produkto gikan sa dugo.

[Footnote]

[Kahon/Hulagway sa panid 7]

DAPIT DIIN ANG USAG USA NAGTINAHORAY

Ang lungsod sa Bejucal de Ocampo sa habagatang Mexico medyo talagsaon. “Ang kadaghanan sa molupyo maoy mga Saksi ni Jehova,” nagtaho ang mantalaang Excélsior, kini midugang: “Dinhi ang relihiyon nagtinahoray ug ang gobyerno masinabtanon. . . . Ang mga molupyo dili maghubog-hubog ug manigarilyo, sila malinawong magkanta-kanta ug magbasag Bibliya. Matinahoron usab sila sa mga awtoridad.”

Bisan pag nagkalainlain ang relihiyon sa lungsod, “walay nahitabong panag-away o panaglalis bahin sa relihiyon,” nag-ingon ang report. Kini usab midugang: “Walay pagdumot dinhi, ug ang mga tawo magtimbayaay bisag managlahig relihiyon . . . Ang matag pamilya dunay kaugalingong relihiyon, ug dili kana babag kanila sa pagkinabuhi nga malinawon. Nahibalo ang tanan nga dakog impluwensiya ang mga Saksi ni Jehova sa Bejucal.” Dugang pa, ang ilang mga anak ‘desenteng mamesti, tag-as ug grado, ug buotan sa klase,’ miingon ang usa ka maestro sa hayskul didto nga dili Saksi.