“Basig Usa Lang ka Awit”

● Si Juliana maoy usa ka minahal nga tigulang nga Saksi sa Pilipinas nga dunay sakit nga Alzheimer. Dili na siya makaila sa iyang mga anak. Bisan pa niana, duawon nako si Juliana kon moadto ko sa ilang lugar.

Si Juliana naglubog na sa banig ug siya magsige na lag tan-aw sa bentana. Maglisod ko sa pagpakig-estorya kaniya kay wala na siya makahinumdom nako. Tutokan ko niya, pero ang iyang dagway morag blangko o wala nay timaan nga siya nakaila nako. “Naghunahuna ka pa ba bahin kang Jehova?” nangutana ko. Ako siyang giasoyan ug usa ka eksperyensiya ug nangutana na usab kaniya, apan wala gyoy timaan nga nakasabot siya. Dayon mikanta ko. Makapatandog kaayo ang sunod nga nahitabo!

Milingi si Juliana, ug mitan-aw nako, ug miduyog siya kanako sa pagkanta! Dayon, mihunong ko sa pagkanta kay wala ko makasag-ulo sa mga liriko niini sa Tagalog. Apan si Juliana nagpadayon sa pagkanta. Iyang nahinumdoman ang tanang liriko sa awit. Akong gihangyo ang akong kauban sa paghulam ug songbok sa Saksi nga nagpuyo sa duol. Mibalik dayon siya. Wala ako mahibalo sa numero sa awit apan nabuksan nako ang hustong panid. Niining higayona dungan namong gikanta ang tibuok awit! Sa dihang gipangutana nako si Juliana kon may mahinumdoman pa ba siya nga laing mga awit, mikanta siyag karaang Pilipinong awit sa gugma.

“Dili na, Juliana,” miingon ko, “dili nang kanta sa radyo kondili kanang kanta sa Kingdom Hall.” a Dayon mikanta akog laing awit gikan sa among songbok, ug miduyog siya nako. Akong nakita ang kalipay diha sa iyang mga mata. Nawala ang blangko niyang panagway, ug ang iyang pahiyom abot sa dunggan.

Niining higayona ang mga silingan nanggawas sa pagsusi kon kinsay nanganta. Nanindog sila duol sa bentana ni Juliana aron mamati kanamo. Makapalipay gyod nga makita nga natandog sa musika ang kasingkasing ni Juliana! Kini nakapahinumdom kaniya sa mga liriko sa awit.

Akong nakat-onan niini nga kasinatian nga dili gyod nimo mahibaloan kon unsay makapukaw sa hunahuna niadtong halos dili na makasabot o makakomunikar. Basig usa lang ka awit ang makahimo niana.

Wala magdugay human niadto, si Juliana namatay. Akong mahinumdoman kini nga kasinatian dihang mamati ako sa makapatandog nga bag-ong narekord nga musika nga giluwatan sa mga Saksi ni Jehova niadtong 2009. Kon gusto kang makabaton niini nga mga rekording, pangutana bahin niini diha sa inyong lugar.

[Footnote]