Gikan sa Among mga Magbabasa

Mga Panalangin nga Labaw Pa kay sa Bahandi (Marso 2009) Ang artikulo nagkutlo kang Kostas, kinsa miingon: “Dili gusto ang Diyos nga magmaluho kita.” Abi nakog wala maghatag si Jehova ug limitasyon kon unsa ka daghan o kadiyutay ang kabtangan sa iyang alagad basta unahon lang Siya. Sayop ba kon magmaluho kita, samtang matinumanong nag-alagad kang Jehova?

J. D., Tinipong Bansa

Ang “Pagmata!” nagtubag: Ang Bibliya wala magdili sa bahandi. Gani, dunay daghang adunahan nga mga alagad sa Diyos sa unang panahon. (Genesis 25:5; 26:12-16; Job 1:1-3) Apan angayng hinumdoman sa mga adunahan nga ang ‘mapagawalong pagpasundayag sa mga kahinguhaan sa kinabuhi sa usa wala magagikan sa Amahan, apan nagagikan sa kalibotan.’ (1 Juan 2:16) Dugang pa, si apostol Pablo nag-ingon: “Ang gugma sa salapi maoy gamot sa tanang matang sa makadaot nga mga butang.” Siya miingon nga tungod sa pagsakripisyo sa espirituwal nga mga butang sa tinguha nga madato, “ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.” (1 Timoteo 6:10) Hinuon, ang Pulong sa Diyos wala mag-ingon nga ang mga adunahan angayng mobati nga sad-an kay mas daghan silag nabatonan kay sa uban. Ang mga Kristohanon gidasig nga “magmahinatagon, andam sa pagpaambit,” bisag unsa pay ilang kahimtang sa materyal.—1 Timoteo 6:18.

Madunggan Bisag Dili Makasulti (Oktubre 2008) Nadasig gyod ko niining artikuloha bahin kang Hillary, kinsa dunay Rett syndrome. Ang akong singko anyos nga apo dili makakita, makadungog, makalakaw, makasulti, o makalingkod. Karon naglaom ako nga sa dihang ako mokanta, mobasa, mosulti, ug mohapohap kaniya, mosanong ang iyang utok. Nakahilak ko sa nagbasa ako sa gisulti sa inahan ni Hillary: “Bisag dili nako madunggan ang iyang gisulti, si Jehova makadungog niana.” Nakatabang kini kanako sa pagkaamgo nga bisag ang akong apo dili makasulti, si Jehova nahibalo kon unsay anaa sa iyang kasingkasing.

M. A., Japan

Ang akong anak nga babaye 43 anyos na, apan kini pa ang unang artikulo nga akong nabasa nga nakatabang kanako sa pagsabot sa iyang kahimtang ug sa hinungdan sa diperensiya sa iyang lawas. Naluoy ako kang Hillary ug sa iyang inahan ug igsoong babaye. Bisag ania kami sa layong dapit, kami samag kahimtang nila, ug nakadayeg ako sa ilang sulondang pagtuo, gugma, ug pagkamalahutayon.

T. Y., Ghana

Aborsiyon—Usa ka Komplikadong Solusyon (Hunyo 2009) Salamat sa mga artikulo bahin sa aborsiyon. Sa nag-edad kog kapin sa 20, akong gipakuha ang akong gisabak, usa ka desisyon nga gibasolan nakog dako. Kon wala pa ako makakat-on sa kamatuoran, wala gyod unta koy paglaom. Mapasalamaton kaayo ko nga duna koy paglaom ug nahibalo ako nga si Jehova mopasaylo.

Wala magpaila sa ngalan, Tinipong Bansa

Mga Batan-on Nangutana... Sa Unsang Paagi Akong Masagubang ang Kamatayon sa Akong Ginikanan? (Agosto 2009) Ako 22 anyos pa lang, ug naguol pag-ayo ko sa kalit nga kamatayon sa akong amahan. Ingon sa gipadayag niining artikuloha, dili na niya makita ang importanteng mga hitabo sa akong kinabuhi. Bisag tulo ka tuig na ang milabay, naglisod gihapon ako sa pagbalik sa normal nga pagkinabuhi. Bisan pa niana, ang artikulo nakahupay kaayo kanako. Ang mga sugyot nga gihatag, bisan tuod lisod sundon, epektibo gayod. Salamat sa inyong maayo kaayong buluhaton.

N. P., Pransiya