Kamingaw sa Kalibotan nga Daghag Paagi sa Pagpakigkomunikar

MGA tawag pinaagig cellphone, text message, e-mail, social network sa Internet, chat room—karon ang kinadaghanang paagi sa pagpakigkomunikar ug dali usab mabatonan. Apan bisan pa niana, daghang tawo karon—bata ug tigulang—mibatig grabeng kamingaw. Ngano?

Diha sa ilang librong Loneliness—Human Nature and the Need for Social Connection, detalyadong gihisgotan sa mga tigdukiduki nga si John T. Cacioppo ug William Patrick ang ulohan bahin sa kamingaw. Ilang gihisgotan ang usa ka pagtuon nga nag-ingon nga “ang pagsigeg Internet makapasamot sa kiling sa tawo sa pagpalain sa iyang kaugalingon ug sa depresyon kon kini maoy ipuli sa personal nga pagpakigkomunikar sa uban.”

Ang puliki nga kinabuhi nga resulta sa modernong katilingban nakababag sa mga tawo sa pagpakigsandurot sa usag usa. Ang pahiyom ug ang kahinangop nga makita diha sa mata sagad dili makita diha sa telepono o sa message sa kompiyuter.

Ang gihisgotan sa ibabaw mahimong mahitabo diha sa trabahoan apan labaw na sulod sa pamilya. Diha sa kadaghanang panimalay, ang mga membro sa pamilya wala nay panahon sa pag-uban sa pagpangaon o pag-estoryahanay kay dili na sila mag-abot sa balay. Ang mga tin-edyer dunay ilang kompiyuter ug dili na kaayo makapakig-uban sa ubang mga membro sa pamilya. Sa katingalahan, daghang batan-on ang nagmamingawon bisan pa sa ilang elektronikong mga gamit sa komunikasyon.

Bisan ang kaminyoon karon mameligro tungod sa kamingaw. Ang kawalay komunikasyon sa mga magtiayon makapatunghag situwasyon diin ang duha ka tawo nag-ipon ug puyo pero halos walay pagpakigsandurot sa usag usa. Ang pagbati nga nag-inusara bisan pag nag-ipon ug puyo uban sa kapikas mao ang usa sa labing makapaguol nga matang sa kamingaw.

Sagubangon ilabina sa nag-inusarang mga ginikanan ang kamingaw. Ang kalibotan nga daghan kaayog gamit sa pagpakigkomunikar, ug ang uban pang butang, makahikaw sa nag-inusarang ginikanan sa pagpakig-uban sa ilang mga anak, nga makapasamot sa kamingaw. Dugang pa, daghang nag-inusarang mga tawo nangandoy nga maminyo, apan pakyas ang ilang pangandoy.

Ang kamingaw nahimong dakong problema nga makapatunghag uban pang mga problema sama sa alkoholismo, pagpalabig kaon, pag-abuso sa droga, mahilayong batasan sa sekso, ug bisan paghikog. Busa importanteng mahibaloan ang mga hinungdan sa kamingaw. Ang paghimo niana makatabang sa pagsagubang sa problema.