Pagpaniid sa Kalibotan

Sumala sa usa ka surbi, mga 10.3 porsiyento sa aktibo sa sekso nga mga lalaki sa Brazil nga nag-edad ug 15 hangtod 64, nakigsekso sa labing menos usa ka tawo nga ilang nakaila diha sa Internet sulod sa milabayng 12 ka bulan.—BRAZILIAN MINISTRY OF HEALTH.

Ang Arctic Ocean kaniadto naputos sa yelo sa gibag-ong kutob sa 260 piye. Karon kining “naglut-od-lut-od nga yelo nga mikabat ug daghang tuig sa pagporma . . . halos nangatunaw na—usa ka dakong kausaban nga makapasayon sa pagbukas ug mga ruta sa barko didto sa polar region.”—REUTERS NEWS SERVICE, CANADA.

Ang Moscow ug ang Vatican nagpahibalo nga sila duna nay bug-os nga diplomatikong relasyon.—RIA NOVOSTI, RUSYA.

Ang Kilimanjaro, nga kinatas-ang bukid sa Aprika, “natunawan ug 26 porsiyento nga yelo sa taluktok niini sa mga tuig tali sa 2000 ug 2007.”—DAILY NATION, KENYA.

Tig-iyahay Apan Masulob-on

Sumala sa mga panukiduki, ang Britanya mao ang “labing tig-iyahayng katilingban sa tibuok kalibotan, nga naghatag ug dakong importansiya sa kaugalingon kay sa grupo,” nagtaho ang Daily Telegraph sa London. Nakita sa laing pagtuon nga ang mga taga-Britanya nag-antos sa grabeng depresyon ug kabalaka. Ang ubang eksperto nagtuo nga dunay koneksiyon ang pag-iya-iya ug depresyon. Gitandi sa pagtuon ang mga katilingban sa mga nasod sa Kasadpan nianang sa China ug Taiwan. Sa China ug Taiwan, ang paghatag ug dakong importansiya sa panaghiusa sa katilingban kay sa pag-iyahay daw nakatabang sa mga tawo sa pagbaton ug maayong panglawas. Sa mga nasod sa Kasadpan, “ang maakohon nga katilingban . . . nakahatag kanatog depresyon,” nag-ingon ang Telegraph.

Pagkasal sa Managsamag Sekso Diha sa Simbahan sa Sweden

Sa Oktubre 2009, giaprobahan sa Lutheran Church sa Sweden ang pagkasal sa mga homoseksuwal diha sa simbahan. Ang maong desisyon gibase sa balaod maylabot sa pagkasal sa managsamag sekso nga gipakanaog sa parliamento pipila lang ka bulan nga milabay. “Sa ato pa, ang Church of Sweden mao ang usa sa unang dagkong mga simbahan sa kalibotan nga mitipas sa naandang panglantaw bahin sa kaminyoon ingong panaghiusa tali sa lalaki ug babaye,” nag-ingon ang mantalaang Dagens Nyheter.

Unsang Pinulongan ang Gamiton sa mga Masuso sa Paghilak?

Sa ikaduha pa ganing adlaw sa kinabuhi, ang masuso mohilak sama sa tono sa pinulongan sa ilang inahan, sumala pa sa mga tigdukiduki sa Würzburg University, sa Germany. Girekord sa mga tigdukiduki ang paghilak sa 30 ka Pranses ug 30 ka German nga mga masuso, ug gianalisar ang tono sa ilang hinilakan. Ang paghilak sa Pranses nga mga masuso sagad magsugod sa ubos nga tono ug dayon magkataas, samtang ang sa German nga mga masuso sagad magsugod sa taas nga tono ug dayon magkaubos. Nianang duha ka kahimtang, ang mga masuso nagsundog sa tono sa pinulongan sa ilang ginikanan. Busa gituohan nga ang pagkakat-on ug pinulongan magsugod diha pa sa tagoangkan ug nga ang pinulongan sa bata magsugod sa iyang unang paghilak.